ZACARIAS 11
11
1Yaw Libano orqo, yaykumuq ñannikikunatapas kichariyá.
Qampaqa cedro sachaykikunapas kachun kañasqayá.
2Yaw cipres sacha, qaparkachayñayá qamqa.
Ñam wichiykunña chaypi kaq cedro sachaqa.
Chaypi kaq hatun sachakunaqa ñam wichiykunña.
Yaw Basan lawpi encina sachakuna,
qamqa aullakuchkaq hinayá waqakuyña.
Sipuy-sipuy sachakunaqa ñam wichiykunña.
3Michiqkunapa qaparkachasqantayá uyariychik.
Michinanku sumaqllaña pastonkum purmarunña.
Malta leonkunapa ñawrawyasqantayá uyariychik.
Jordan Qechwapi sumaqllaña montekunam purmarunña.
Iskay michiqkunamanta
4Yupaychasqanchik Tayta Diosmi kaynata niwarqa:
—Wañuchinapaq kaq ovejakunataqa qamñayá michimuy. 5Chay ovejakunataqariki rantiqkunam mana pipapas “ama” nisqan wañuchinku hinaptinmi *f**rantikuqkunapas kaynata ninku: “Alabasqayá kachun Tayta Dios, ñoqaqariki apuyaruniñam” nispa. Chaynapim kikin oveja michiqkunapas mana llakipayarinkuchu. 6Ñoqapas kay nacionpi *f**yachaq runakunamantaqa manañam huktawanqa llakipayarikusaqchu, sapakamatam ñoqaqa entregaykusaq runamasinkupa munaychakuyninmanña chaynataq reyninkupa munaychakuyninmanña, paykunañam nacionninkuta purmarachinqa, paykunapa munaychakuyninmantaqa manam pitapas librasaqchu. Chaynatam nini Ñoqa Tayta Dios.
7Chaynapim ñoqaqa chay wañuchinapaq kaq ovejakuna michiytaña qallaykurqani, chaynataqa rurarqani negociantekunapaqmi. Chaypaqmi iskay tawnakunata hapiykurqani, huknintam suticharqani Kusichikuq Tawnawan, huknintañataqmi suticharqani Hukllawanachiq Tawnawan. Chaynapimá ñoqaqa chay ovejakunata michirqani. 8Chaynapim ñoqaqa huk killallapi kimsa michiqkunata qarqorurqani.
Ovejakunapas llumpa-llumpaytañam amirachiwarqa, paykunapas cheqnipakuruwarqañam. 9Chaymi ovejakunataqa kaynata nirqani:
—Manañam qamkunataqa michisqaykichikñachu. Wañuptikichikpas manam imapas qokuwanñachu, chinkaruptikichikpas manam imapas qokuwanñachu. Puchuqkunapas lliwyá mikunakuruychik —nispa.
10Hinaptinmi kusichikuq sutiyoq tawnayta hapiykuspay pakirurqani, chaynataqa rurarqani llapallan nacionkunawan Tayta Diospa contrato rurasqanqa pakisqaña kasqanta qawachinaypaqmi. 11Chay punchawpimá chay contratoqa yanqachasqa karqa hinaptinmi chay ovejakunawan negociaqkunapas chay imam rurasqayta qawarkuspa yacharqaku Tayta Diospa palabran kasqanta. 12Chaymi paykunata nirqani:
—Munaspaykichikqa llamkasqaymantayá pagaykapuwaychik, mana munaspaqa amataqyá pagawaychikchu —nispa.
Hinaptinmi pagawarqaku kimsa chunka qollqeta.
13Hinaptinmi Tayta Diosñataq niwarqa:
—Chaynasu pagaykususqayki qollqetaqa manka ruraqmanyá wischuykamunki —nispa.
Chaynapim ñoqaqa Diospa templonpi kaq manka ruraqman wischuykamurqani. 14Chaymantam ñoqaqa Hukllawanachiq sutiyoq tawnayta hapiykuspay pakirurqani, chaynataqa rurarqani Juda nacionwan Israel nacion manaña hukllaña kasqankuta qawachinaypaqmi. 15Hinaptinmi Tayta Diosñataq niwarqa:
—Kunanñataqyá hapiy michiqpa huk tawnanta hinaspayá tikrakuruy mana imapas qokuq michiqmanña. 16Kay nacionpi michinanpaqmi churamusaq chinkaruq ovejakunapas mana watukuq michiqta, payqa manam maskanqachu qeparuq ovejakunatapas nitaqmi hampiykunqachu chakin pakisqa ovejakunatapas. Payqa manam mikuchinqachu kawsaqraq ovejakunatapas, aswanqa wiran ovejakunata nakakuykusparaqmi mikukunqa. Chaki sillunkunatapas payqa lliwmi wikaparunqa.
17¡Imallapiraq rikukunqa
mana valeq michiqkunaqa!
¡Imallapiraq rikukunqa
ovejakuna saqeruq michiqkunaqa!
Chayna michiqkunapaqa makinpas
espadawan kuchusqayá kachun.
Chayna michiqkunapaqa *f**alleq ñawinpas
espadawan tuksisqayá kachun.
Chayna runapaqa makinpas chakiruchunyá.
Paypaqa alleq ñawinpas ñawsayaruchunyá.
Currently Selected:
ZACARIAS 11: QUEAYA87
Highlight
Copy
Compare
Share
Want to have your highlights saved across all your devices? Sign up or sign in
