ZACARIAS 10
10
Runankunataqa Tayta Dios librananmanta
1Poqoy tiempopiyá parachimunanpaq
Tayta Diosta mañakuychik.
Tayta Diosqa llipyarichispam
sinchillataña paraykachipusunkichik.
Payqa sapakamamanmi
sumaqllaña plantakunata qosunkichik.
2Taytacha-mamachakunapa rimasqankuqa llullallam.
Adivinaq runakunapa imapas qawasqankuqa yanqallam.
Mosqoyninkumanta willakusqankuqa mana valeqllam rikurirun.
Paykunapa consuelakusqankuqa mana valeqñam rikurirun.
Runakunaqa chullaruq ovejakuna hinañam purillachkanku.
Mana michiqniyoq ovejakuna hinam ñakarillachkanku.
3Chayraykum Tayta Dios nin kaynata:
Michiqkunapa contranpim piñasqa kachkani ñoqaqa.
Runaykuna pusaqkunatam castigasaq ñoqaqa.
Llapallan Kamachiq ñoqa Tayta Diosmi
runaykunataqa yanapasaq.
Llapallan Kamachiq ñoqa Tayta Diosmi
Juda castakunataqa yanapasaq.
Guerrapaq kallpasapa caballota hinam rurarusaq.
4Juda castamantam lloqsimunqa
wasipa esquinanpi hapiq rumiqa.
Paykunamantam lloqsimunqa
karpata takyachiq estacaqa.
Juda castamantam lloqsimunqa
guerrapaq flechana arcoqa.
Paymantam lloqsimunqa
llapallan gobiernaqkunaqa.
5Soldadokuna hinam paykunaqa kanqaku.
Ñankunapipas soldadokuna hinam mituta sarupanqaku.
Tayta Diospuni yanapasqanraykum paykunaqa peleanqaku.
Sillada tropakunatapas penqaymanmi paykunaqa churanqaku.
6Juda castakunataqa ñoqapunim kallpanchasaq.
Josey castakunataqa ñoqapunim salvaykusaq.
Paykunataqa llaqtankumanñam kutichisaq.
Ñoqaqa llakipayanim paykunataqa.
Manam qarqoruqnin Diospaqñachu
hapiwanqaku paykunaqa.
Paykunapa yupaychasqanku Tayta Diosmi kani.
Mañakuwasqanku uyariykuq Tayta Diosmi kani.
7Efrain castakunaqa kallpasapa soldado hinam kanqaku.
Vino tomaqkuna hinam tukuy sonqonkuwan kusikunqaku.
Wawa-churinkupas chaykunata qawaykuspam kusikunqaku.
Tayta Diosraykum tukuy sonqonkuwan kusikunqaku.
8Paykunataqa kikiypunim qayarisaq.
Paykunataqa kikiypunim huñurusaq.
Preso kasqankumantam libraykusaq.
Chaynapim achka-achkaman mirarunqaku.
Ñawpaq tiempopi hinaraqmi mirarunqaku.
9Maqchichkaq hinam nacionkunaman
cheqerachisaq paykunataqa.
Chaywanpas karu llaqtakunapim
yuyariwanqaku ñoqataqa.
Chaynapim wawa-churintin kawsaruspanku
hina wawa-churintintaq kutimunqaku.
10Egipto nacionmantam kutichimusaq.
Asiria nacionmantam huñumusaq.
Galaad lawmanñam pusamusaq.
Libano lawmanñam pusamusaq.
Manaña sitiopas kanankamam huñumusaq.
11Lamar qocha hinaña sasachakuykunapa
chawpintam ñoqaqa pasarachisaq.
Lamar qochapa hoqarikusqantapas
ñoqam waqtaparusaq.
Nilo Mayupa ukullay-uku yakunkunapas chakirunqam.
Asiriapa hatunchakuyninpas kanqa wischusqam.
Egiptopa munaychakuyninpas kanqa qechusqam.
12Kikiy Tayta Diosñam kallpanchasaq runaykunataqa.
Chaynapim ñoqata yupaychawastinña kawsanqaku paykunaqa.
Currently Selected:
ZACARIAS 10: QUEAYA87
Highlight
Copy
Compare
Share
Want to have your highlights saved across all your devices? Sign up or sign in
