GENESIS 33
33
Jacob wawqen Esauwan allinyanakusqanmanta
1Jacobmi rikururqa Esauta tawa pachak runantin hamuchkaqta chaymi rakirqa wawakunata Leaman, Raquelman hinaspa iskaynin sirvientankunaman. 2Puntatam churarqa sirvientankunata wawantintakama, qepanmanñataqmi churarqa Leata wawankunatawan, lliwpa qepanmanñataqmi churarqa Raquelta wawan Joseytawan. 3Jacobñataqmi pasarqa paykunapa ñawpaqninman hinaspam qanchis kutikama qonqorakuspa pampaman kumuykurqa chaynapi wawqenman asuykunanpaq. 4Chaymi wawqen Esau kallpaykurqa tupaykuq hinaspam Jacobta abrazaykuspan muchaykurqa hinaspam kuskanku waqarqaku. 5Chaymantam Esau rikururqa Jacobpa warminkunatawan churinkunata chaymi tapurqa:
—¿Pikunataq kay qanwan hamuqkunaqa? —nispa.
Chaymi Jacob nirqa:
—Paykunaqa favorecewaspa Diospa qowasqan churiykunam —nispa.
6Chaymi sirvientakuna wawankunapiwan asuykamuspa qonqoranpa kumuykurqaku. 7Leapas wawankunapiwanmi asuykamuspa qonqoranpa kumuykurqaku, chaymantañataqmi asuykamurqa Josey maman Raquelpiwan hinaspam qonqoranpa kumuykurqaku. 8Chaymi Esau tapurqa:
—¿Imatataq munanki llapallan hatajontin animalkuna tarimusqaykunawanqa? —nispa.
Hinaptinmi Jacob nirqa:
—Qampa favorniki tariykuyllatam —nispa.
9Hinaptinmi Esauñataq nirqa:
—Wawqelláy, ñoqataqa manam imapas pisiwanchu, kay kapusuqnikiqa qampaqyá kachun —nispa.
10Chaymi Jacob nirqa:
—Ama hina kaspaykiyá chaskiykuway regaloyta, Diospa uyantapas rikuykuchkaq hinam qampa uyaykita rikuykuni, qampas kusisqamiki kachkanki ñoqawan. 11Regalo apamusqaytayá chaskiykuway. Tukuy kaykunaqa Diospa qowasqanmi —nispa.
Chaynata hikutaptinmi Esau chaskiykurqa. 12Chaymi Esau nirqa:
—Hakuchik kuska, ñawpaqnikitam risaq —nispan.
13Hinaptinmi Jacob nirqa:
—Wawqelláy, rikuchkankim churiykunaqa llumpay wawallaraq kasqanta chaynataq cabraykunapas, ovejaykunapas, vacaykunapas llullu uñayoq kasqanta, pisiparuspankuchá llapallan huk punchawllapi wañurunman. 14Taytáy, kay serviqnikipa ñawpaqniytayá puntachkay, ñoqaqa allillamantam hamusaq animalkunapa purisqanman hina. Wawakunapa risqanman hinalla allillamanta hamuspaymi Seir orqopiña tupasunchik —nispa.
15Chaymi Esau nirqa:
—Chaynaqa ñoqawan hamuq runaykunatayá wakinta saqeykusqayki —nispa.
Hinaptinmi Jacobñataq nirqa:
—Señorlláy, amañayá saqewaychu —nispa.
16Chaynapim Esau kutikurqa Seir lawman chay punchawlla. 17Jacobñataqmi pasarqa Sucot lawman hinaspam chaypi wasita rurarqa, animalninkunapaqpas chaypim ramadakunata rurarqa. Chayraykum suticharqa chay sitiota Sucotwan.
18Padan-aram lawmanta Jacob hamuspam Canaan allpapi kaq Siquem llaqtaman chayarurqa hinaspam karpankunata sayachirqa chay llaqtapa chimpanpi. 19Chaypim huk chakrata rantirurqa Siquempa taytan Hamorpa churinkunamanta tawa kilo parten qollqewan hinaspam chaypi karpanta sayachirqa. 20Hinaspam chaypi altarta ruraspa suticharqa #Hebreo simipi El-Elohe-Israel ninanqa “Diosmi Israel runakunapa Diosnin” ninanmi.El-Elohe-Israelwan.
Currently Selected:
GENESIS 33: QUEAYA87
Highlight
Share
Copy
Want to have your highlights saved across all your devices? Sign up or sign in