GENESIS 32
32
Jacob wawqen Esauwan tupanakusqanmanta
1Jacob riptinmi Diospa angelninkuna lloqsimurqa chaskiqnin. 2Chaymi Jacob paykunata rikuruspan nirqa:
—Diospa tropanpa campamentonmi kayqa —nispa.
Hinaspam chay lugarta suticharqa Mahanainwan.
3Chaymi Jacob kacharqa willakuqkunata Esau wawqenman. Paymi kachkarqa Seir law Edom nacionpi. 4Kachaspam nichimurqa:
—Kaynatam nin serviqniki Jacob: “Kunankamam *f**yachamurqani tionchik Labanwan. 5Kapuwanñam vacaykuna, asnoykuna, ovejaykuna, cabraykuna chaynataq sirvienteykunawan sirvientaykunapas chaymi qam señorllayman willachimuyki ama hina kaspa favoreceykuwanaykipaq” nispa.
6Chaymantam willakuqkuna kutimurqa Jacobman kaynata nispa:
—Rirqanikum wawqeki Esauman chaymi paypas hamuchkan chaskisuqniki tawa pachak runakunawan.
7Chaymi Jacob anchata mancharikuspan hukmanyarurqa, chayraykum paywan kaq runakunata iskayman rakirqa, iskaymantaqmi rakirqa ovejakunatapas, vacakunatapas chaynataq camellokunatapas 8kaynata piensaspan: “Esau hamuspa huknin hatajota wañuchiptinpas huknin hatajoqa lluptinqaraqmi” nispa. 9Jacobmi mañakurqa:
—Abueloy Abrahampa chaynataq taytay Isaacpa yupaychasqan Tayta Dios, qanmi niwarqanki: “Kutikuy taytaykipa kasqan aylluykikunaman hinaptinmi allinta rurasqayki” nispa. 10Cheqap kuyapayakuynikitaqa manam chaskinaypaq hinachu kani. Tawnallaywanmi kay Jordan Mayutaqa chimpamurqani kunanqa iskay hatajoman rakinasqa kapuqniyoqñam kachkani. 11Wawqey Esaumantayá libraykullaway Taytáy, paytaqa manchakunim. Hamuspachá wañurachinqa warmiykunata wawantinta. 12Qamtaqmi niwarqanki Taytáy: “Ñoqam yanapasqayki allin kanaykipaq chaynataq lamar qochapi aqo hinaña mana yupay atina castayoq kanaykipaq” nispa.
13Chay tutam chaypi Jacob puñururqa hinaspam kapuqninmanta wawqen Esauman regalananpaq akllarqa: 14iskay pachak cabrakunata, iskay chunka chivatokunata, iskay pachak ovejakunata, chunka carnerokunata. 15kimsa chunka china camellokunata ñuñuq uñantintakama, tawa chunka vacakunata, chunka novillokunata, iskay chunka china asnokunata, chunka orqo asnokunata. 16Hinaspam sirvientenkunaman sapa hatajota entregaykurqa kaynata kamachispan:
—Ñawpachiychik hatajo animalkunata huknin hatajomanta karunchasqata —nispan.
17Punta riqtam kamachirqa:
—Wawqey Esauwan tuparuptiki: “¿Pitaq kachkanki? ¿Maytataq richkanki? ¿Pipataq kay qatisqayki animalkunaqa?” nispa tapusuptikiqa kaynatam ninki: 18“Señorlláy Esau, kay regalokunaqa serviqniki Jacobpa qanman apachimuwasqanmi, paypas qepaykutam hamuchkan —nispa.
19Kamachirqataqmi qepata atajontin riqkunatapas:
—Esauwan tupaspaykichikqa chay nisqayman hinamá ninkichik: 20“Serviqniki Jacobqa qepaykutam hamuchkan” nispa.
Chaynataqa nirqa kaynata piensasqanraykum:
—Regalokunata puntarachispaymi piñakuyninmanta sonqonta llampuyaykachisaq hinaspañam tupaykusaq icharaqpas chaynapi chaskiykuwanman —nispa.
21Chaymi puntata pasachirqa regalokunata hinaspanmi chay tuta puñurqa campamentopi.
Angelwan Jacob peleasqanmanta
22Hina chay tutallam hatariruspan iskaynin warminkunata, iskaynin sirvientankunata hinaspa chunka hukniyoq churinkunata Jaboc mayupa vadonta chimparachirqa. 23Pasachirqamá paykunata llapa imankunatawan. 24Chaymi Jacob sapallan qeparurqa hinaspam pelearqa huk qariwan achikyanankama. 25Hinaptinmi Jacobta mana venceyta atispan waqtarurqa weqaw moqonpi hinaptinmi chay qariwan peleachkaptin Jacobpa huknin piernan moqakururqa. 26Chay qarim nirqa Jacobta:
—Achikyamuchkanñam kachaykuway pasakunaypaq —nispa.
Chaymi Jacobñataq nirqa:
—Manam kacharikimanchu mana bendiciwaptikiqa —nispa.
27Hinaptinmi chay qari tapurqa:
—¿Imataq sutiki? —nispa.
Hinaptinmi payñataq nirqa:
—Jacobmi —nispa.
28Chaymi pay nirqa:
—Manañam Jacobñachu sutikiqa kanqa, aswanqa Israelñam Dioswan chaynataq runakunawanpas peleaspa vencerusqaykirayku —nispa.
29Jacobñataqmi chay qarita tapurqa:
—Kunanyá willaykuway sutikita —nispa.
Chaymi payñataq nirqa:
—¿Imapaqtaq tapuwanki sutiytaqa? —nispa.
Hinaspanmi chaypi bendeciykurqa. 30Chaymi Jacob chay lugarta suticharqa Penielwan:
—Diosta rikuruchkaspaypas kawsachkaniraqmi —nispa.
31Penielta pasaruptinmi inti qespiramurqa, Jacobñataqmi rirqa wistutyastin. 32Jacobta weqaw moqonpi waqtarusqanraykum Israelpa castankunaqa mana mikunkuchu animalpa weqawninpi kaq ankutaqa kay libro qellqasqa kasqan tiempokama.
Currently Selected:
GENESIS 32: QUEAYA87
Highlight
Share
Copy
Want to have your highlights saved across all your devices? Sign up or sign in