Hebreos 6
6
1Chaynaqa, Cristomanta chayllaraq punta yachachikuykunaman amaña kutirispayá yuyayniyuqña kasunchik. Amañayá rimasunchu huchapi wañusqa hina kasqanchikmantapas, wanakuymantapas, Diosman iñiymantapas, 2bautismomantapas, iñiqkunapa hawanman maki churaymantapas, wañuqkuna kawsarimunanmantapas chaynataq wiñaypaq castigomantapas. 3Dios munaptinqa chaynatam ruwasunchik.
4Huk kutinpi achkiy chaskiqkunataqa, Diospa atiyninta chaskiqkunataqa, Chuya Espíritu chaskiqkunataqa, 5Diospa allin yachachikuynin chaskiqkunataqa hinaspa hamuq punchawkunapi admirakuypaq kaqkuna chaskiqkunataqa, 6huktawan huchaman wichiykuptinkuqa manañam pipas Diosman kutiykachiytaqa atinmankuñachu. Paykunaqa Diospa Churinta yapamanta chakataspankum penqayman churachkanku. 7Allinta parata chaskiq allpaqa tarpuqninpaqmi allin cosechata qon, chay allpaqa Diospa chaninchasqanmi. 8#Gn 3.17-18.Kichkakunatawan kichkasapa qorakunata wiñachiq allpam ichaqa mana valeq, chayna allpaqa ñakasqa kaspanmi kañasqa kanqa.
Kallpanchakuq palabrakunamanta
9Kuyasqay wawqe-panillaykuna, chaynakunata rimachkaspapas ñoqaykuqa manam iskayrayanikuchu, salvakunaykichikpaq allin kaqkuna qamkunapi kasqanmantaqa. 10Diosqa allin ruwaqmi, paypaq llamkasqaykichiktaqa manam qonqanqachu, manataqmi qonqanqachu payta kuyaspa wawqe-panikunatapas yanapaspa kuyasqaykichiktapas, arí, chaynatam kunanpas servichkankichik. 11Aswanqa munachkanikum kawsanaykichikkamaqa sapakama hina chayna kallpanchakuyllawan kanaykichikta, chaynapi suyasqaykichikta chaskinaykichikpaq. 12Amayá qellaqa kaychikchu, aswanqa iñiywan hinaspa pacienciawanyá Diospa promesan chaskiqkunapa ruwasqanta hina ruwaychik.
13Diosqa Abrahamman prometespanqa, paymanta aswan munayniyuq mana pipas kaptinmi kikinpa sutinpi jurarqa. 14#Gn 22.16-17.Paymi nirqa:
Anchallatañam bendecisqayki, chaynataqmi miraynikikunatapas anchallataña mirachisaq, nispa.
15Chaynapim Abrahamqa pacienciawan suyaspan, Diospa prometesqanta chaskirqa. 16Runakuna juraspaqa paykunamanta aswan atiyniyuqpa sutinpim juranku imam rimasqankuta ruwayman churanankupaq hinaspa ima chaqwatapas upallachinankupaq. 17Chaynapunim Diospas tanteasqanmanta qepamanqa mana kutinmanchu. Chayraykum prometesqankunataqa herencia qosqan chaskiqkunaman juraspan cheqap kasqanta qawachirqa. 18Kay iskay rimasqankunaqa manam imaraykupas tikrakunmanchu, manataqmi Diospas llullakunmanchu, haykam Diosman hapipakuqkunaqa kallpanchakuytawan waqaychakuynintam chaskinchik, hinaspam confianza qowasqanchikman hapipakunchik. 19#Lv 16.2.Lamar qochapa patanpi barca watasqa hinam confianzanchikqa almanchikta takyachin. Hanaq pacha templopi rakinaq telapa qepanpiñam confianzanchikqa Diospi churasqa kachkan. 20#Sal 110.4.Chaymanmi Jesusqa yaykurqa lliwmantapas puntata, ñoqanchikpaq ñanta kichapuwananchikpaq, yaykurqaqa Melquisedecman rikchakuq sacerdotekunapa kamachiqnin wiñaypaq karuspanmi.
Currently Selected:
Hebreos 6: RCQ12
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
