1~Timoteo 1
1
Cartapa qallariyninmanta
1Ñoqa Pablom Cristo Jesuspa apostolnin kani, salvaqninchik Dioswan hinaspa suyasqanchik Cristo Jesuspa kamachisqanman hina. 2#Hch 16.1.Kuyasqay Timoteo rimaykamuykim, qamqa iñiypi cheqap churiymi kanki. Dios Taytanchikwan Señorninchik Jesucristoyá kuyakuynintawan hawkayayninta qampa hawaykiman chaqchurimuchun.
Mana allin yachachikuykunamanta
3Macedonia lawman rispay ruegakusqayman hinayá Éfeso llaqtapi qepaykuy wakinkunata kamachinaykipaq, chaynapi amaña sapaq yachachikuykunata yachachinankupaq. 4Amataqyá kasuchunkuchu cuentokunatapas nitaq ñawpaq taytakunapa sutinmanta manaña tukuy atina listatapas, chaykunaqa atipanakuykunallatam hatarichin, Diospa ruwayninkunapiqa manataqmi imapipas yanapakunchu, chay munayninkunataqa iñiyllawanmi reqsinchik.
5Kay kamachikuykunaqa cheqaptapuni kuyanakunanchikpaqmi, chay kuyanakuyqa hamun, chuya sonqomanta, allin concienciayuqmanta hinaspa cheqap iñiyniyuqkunamantam. 6Wakinkunam chayna kawsakuymanta karunchakuruspa yanqa atipanakuykunapi pantarunku. 7Paykunaqa allin yachachikuq tukusparaqmi leymanta yachachikuyta munanku, rimasqankutawan yachachisqankutam ichaqa mana entiendeyta atinkuchu.
8Yachanchikmi kamachikuykunaqa allin kasqanta, sichum chay kamachikuyman hina ruwaptinkuqa. 9Yachasqanchikpi hinapas leyqa qosqa karqa manam allin ruwaq runakunapaqchu, aswanqa leyta qepanchaqkunapaqmi, mana kasukuqkunapaqmi, millay ruwaqkunapaqmi, huchasapakunapaqmi, Diosta mana manchakuqkunapaqmi, tayta-maman wañuchiqkunapaqmi, runa wañuchiqkunapaqmi, 10waqllikuqkunapaqmi, qaripura kakuqkunapaqmi, runamasin suwaqkunapaqmi, llullakuqkunapaqmi, yanqapas-yanqa Diospa sutin rimaqkunapaqmi hinaspa allin yachachikuykunapa contranpi kaqkunapaqmi. 11Chay allin yachachikuyqa yupaychasqanchik Diospa kunawasqan ancha allin noticiam.
Pablopa Diosman graciasta qosqanmanta
12Señorninchik Jesucristom allinpaq hapiwaspan serviqnin kanaypaq akllaykuwarqa hinaspam kallpanchaykuwarqa, chaymi llumpayta agradecekuni. 13#Hch 8.3; 9.4-5.Ñawpaqtaqa ñoqaqa Diospa contranpim karqani, paypi iñiqkunatam qatikacharqani, chaynata ruwaspaymi payta piñachirqani. Ichaqa Diosmi llakipayariykuwarqa manaraq iñisqayrayku mana yachaywan chayta ruwasqaymanta. 14Señorninchikmi kuyakuyninta ñoqaman achkanpi chaqchurimuwarqa hinaspam Jesucristopi kaq iñiytawan kuyakuyta qoykuwarqa.
15Kay palabraqa cheqapmi, lliwmi chaskispa iñinanchik, Jesucristom kay pachaman hamurqa huchasapakuna salvananpaq, paykunamantaqa aswan huchallikuqmi kani. 16Chaywanpas Diosmi ñoqata llakipayariykuwarqa, chaynapi Jesucristo pacienciakuyninta ñoqantakama qawachikunanpaq chaynataq haykam iñikuspanku wiñay kawsay haypaqkunapaq ejemplo kanaypaq. 17Chayraykuyá Diosta yupaychaspa hatunchasun wiña-wiñaypaq. Payqa mana wañuq kaspam wiña-wiñaypaq munaychakuchkan, payqa mana rikuy atina chullalla Diosmi. Amén.
18Kuyasqay churiy Timoteo kaytam kamachimuyki: Ñawpaqmantaraq qanmanta profetizasqankuta yuyarispayá allin peleaq soldado hina mayna sasaña kaptinpas sunita sayay. 19Iñiynikitawan sonqoykitayá allinta takyachiy, wakinqa concienciankuta mana kasuspam yakupi heqepachkaq hina iñiyninkuta chinkarachinku. 20Chaynatam Himeneowan Alejandropas pantarurqaku. Chaymi Diospa contranpi manaña rimanankupaq Satanasman qoykuni.
Currently Selected:
1~Timoteo 1: RCQ12
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
