Yʉanes 21

Yesʉs lé ebâʼle lɛʼle nyʉl é jɔʼ lɛl

1Jɔʼ ze laa ba, Yesʉs ze bâʼle lɛʼle ompʉn be nyʉl. Yé a be ó é maŋ mo Tiberias#21.1 Maŋ mo Galɨle, mé a be lé ejebɔ nteme ó, maŋ mo Tiberias.. Mbi nye a lɛʼle be nyʉl ɨ, wé ó wi.

2Yé a be ó, bʉʉ bʉr é l'esama le ompʉn be, bé osi to é nkpah maŋ. Tɨʼ é sama yaa, yé a be ó Simɔn Pyɛr e Tomas (waa bé ejebe-jebe ó, Egbah ɛ), bé e Natanaɛl (mʉr Kana, lal Galɨle), ndwe e mɨsoho mo Zebede, ka kɛl bʉʉ ompʉn oba. 3Simɔn Pyɛr, nye e be ó: «Me mu ó lé eto é gbà kaʼ dibe.» Bé e nye ó: «Ncʉʼ ga! Bɨna to ga bɨbɛh!» Bé ze kable é byɛl, ntɔʼ toŋɔ é maŋ. Pum nɨ wiwɛh, bé a baajʉ sɔʼɔ. 4Ngbaa le eka be, yé mu é molama mo mɛn nɛʼɛ, bé ze bee Yesʉs cɨcyel é l'ebʉm laa. Sa gwar, ompʉn be, bé a baadweʼe nye. 5Yesʉs, nye e be ó: «Bwan ɔɔ! Bɨn bé apa jʉ fu ngwar, zê yé abe no ɛ?» Bé e nye ó: «Eee, yé ó no ɔɔ!» 6Nye ó: «Filɨ ga be kʉa é nko paʼ mbo ejʉm ɔɔ! Bɨn bé óbee ɔɔ!» Bé ze fil kʉa é nko paʼ waa, bé ntɔʼ kœb ó, bé a baaka koʼo lé edwih kʉa é modibe, nye osi loŋlo e l'ofu. 7Mpʉn Yesʉs a bul kpɛl ɨ,#21.7 Yʉanes, nye efol die le é Mbɨambɨa Lɔɔ nye a tile e. Dwɛʼa nteme Yʉanes 13.23, 19.26, 20.2, 21.20. nye e Pyɛr ó: «Da ó nɨ!»

Jɨh tɨʼ Simɔn Pyɛr a kʉ joʼo ó, «Yé ó Da», nye ntɔʼ ze bwar len kʉr we, ebe, nye a be ó fufwah. Nye ntɔʼ ze guho nyʉl é modibe maŋ. 8Bʉʉ ompʉn ntɔʼ duʼo byɛl, lé eze le edulo kʉa lwɨŋla e l'ofu. (Bé a baacɛra e l'ebʉm, kwoʼ be omɨra mowʉm bu.) 9É jɔʼ bé a syel byɛl, bere tin ɨ, bé a kœb ó, duro, lé osi tirɔ, e mbuba fu tɨʼ ndwe e bler. 10Yesʉs, nye e be ó: «Ntaʼ ga e bʉʉ ofu é baa bɨn jʉ onɨ.» 11Simɔn Pyɛr ze kable é byɛl, dwih kʉa lwɨŋla e l'ofu onɨnɨ nter e l'ofu mowʉm motɛn e l'olɛl (153). Dam be bim ofu baa, kʉa a baanyɛɛ! 12Yesʉs, nye e be ó: «Ntaʼ, ze de ga cyam-ekaʼ.» Abe e mpʉn ngwar a dî e nye ó: «Yé gwɔɔ zé?», ebe, bé a be ó si gʉa ó, yé ó bana kʉ be Da Yesʉs. 13Yesʉs ze nʉa bler, pɛ̂ʼ be ya bɨpeh, ze dwe nteme be ofu.

14É mbi nɨ ó Yesʉs a lɛʼle ompʉn be nye mʉr tɨʼ pie pɛ̀ha foo we.

Yesʉs bé e Pyɛr

15Ngbaa be, bé mu si de cyam-ekaʼ nɛʼɛ, Yesʉs ze dî e Simɔn Pyɛr ó: «Simɔn, mwan mo Yʉanes, zê go lé ekpɛl me, laa bim bʉr baʼ ɛ?» Nye ze mɛʼle ó: «Eee, Da, go egʉa ó, me ekpɛl go.» Yesʉs, nye e nye ó: «Kobla bwa o bɨntœme byam.» 16Nye ze dî e nye é jɔʼ mba ó: «Simɔn, mwan mo Yʉanes, zê go lé ekpɛl me ɛ?» Nye e nye ó: «Eee, Da, go egʉa ó, me ekpɛl go.» Yesʉs, nye e nye ó: «Kobla daa e bɨntœme lam.» 17Pie tɨ, nye ze bâʼle dî e nye é jɔʼ lɛl ó: «Simɔn, mwan mo Yʉanes, zê go lé ekpɛl me ɛ?» Pyɛr ntɔʼ liʼ é gœʼra-gœʼra e mocyɛʼ mo nyʉl, ebe, Yesʉs a si bâʼle dî e nye é jɔʼ lɛl ó: «Simɔn, mwan mo Yʉanes, zê go lé ekpɛl me ɛ?» Nye e nye ó: «Da, go egʉa sa yiyɛh! Go ekʉ gʉa nteme ó, me ekpɛl go!» Yesʉs, nye e nye ó: «Kobla daa e bɨntœme lam. 18Me elɛɛ go cyecye ó nɛɛ: é jɔʼ go a be, go dina ma soho e, go mʉr tɨʼ ó b'a tiile-tiile kana go, to nko go a kpɛl ɨ. Sa gwar, é jɔʼ go óbe, go mu si jwɨm ɨ, go óbɨr mobo, mʉr fih ze tiile go kana, to e go nko gwɔɔ ndɨ akpɛl to e.» 19(Yesʉs a lwib no ó, lé elɛʼle mbi efie Pyɛr ódwè e. Mbi efie we waa, wé ósa ó, bʉr dweʼ Zyɛm kum.) Yesʉs, nye e nye ó: «Duʼo me.» 20Pyɛr ze dwibra, dwɛʼ pihe nɛʼɛ, nye ze bee mpʉn Yesʉs a bul kpɛl ɨ#21.20 Yʉanes, nye efol die le é Mbɨambɨa Lɔɔ nye a tile e. Dwɛʼa nteme Yʉanes 13.23, 19.26, 20.2, 21.7., lé edu be é koo pihe. (Nye ó b'a jyɛʼ lʉ é bɨr mo Yesʉs é jɔʼ bé a be lé ede é l'ebʉʼ ɨ#21.20 Dwɛʼa lɔb wiʼ é l'ontwɛmle, é paʼ «Paska.». Nye nteme ó b'a dî ó: «Da, zé ókɛha go ɛ?») 21Mbea Pyɛr a bee nye lé edu be e, nye e Yesʉs ó: «Da! A waa nwaʼ nyɛɛ, nye ósa nyá ɛ?» 22Yesʉs, nye e nye ó: «ǃMe si kpɛl ó, nye diʼe tɨʼ, to pyal é dobo me óbula ze nɛʼɛ, go e wáa lɔb tɨ? Gwɔɔ, duʼo me!» 23Taare é jɔʼ yaa, ze pyal é muh é dobo lɨ, lɔɔ, wi ze myɛma é l'esama le obuʼla ó, mpʉn waa, nye aŋa ka dwè. To kœb ó, Yesʉs a baalɛɛ Pyɛr ó: «Nye ákwoʼ dwè!» Nye a kʉ ka lɛɛ ó njɨ: «ǃMe si kpɛl ó, nye diʼe tɨʼ, to pyal é dobo me óbula ze nɛʼɛ, gwɔɔ, go e wáa lɔb tɨ?»

24Mʉr lé eboʼlo le etile bɨsa biʼ ɨ, nye ó ndɨ mpʉn we waa! Bɨh bé ekʉ gʉa ó, bɨsa nye lé eboʼlo e, byé ó cyecye.

25Yesʉs a be ó si sa byʉʉ bɨsyɛɛla é buobuo. Mbea wam, wé ó, nkʉ bɨsyɛɛla byaa, byé a be ó be, taŋlɔ bibyɛh nɛʼɛ, me abuʼla ó si nwaʼ a ngbaa koʼo ebeʼe le okalara o mɨtɔɔlʉ myaa.

Currently Selected:

Yʉanes 21: ozmBad

Highlight

Copy

Compare