Yʉanes 20

Epàh e foo mo Yesʉs

(Mataos 28.1; Markus 16.1; Lʉkas 24.1)

1É dwine mɛn kuno, dobo e sono#20.1 É lwib grɛk, yé ó «dobo le efoʼ é sono». , edurʉ dina si, Maaria, sile Magdala, ze to nko foo waa. Nye ntɔʼ to bee ó, ekoʼ, lɨ pɛʼɔ é nʉm foo! 2Nye ntɔʼ ze bula e kam, to bee Simɔn Pyɛr bé e nuu mpʉn, waa Yesʉs a bul kpɛl ɨ.#20.2 Yʉanes, nye efol die le é Mbɨambɨa Lɔɔ nye a tile e. Nye ó «mpʉn Yesʉs a bul kpɛl ɨ». Dwɛʼa nteme Yʉanes 13.23, 19.26, 21.7, 21.20. Nye ó: «Bɨ pɛʼ muu mo Da Yesʉs é foo! No ó, bɨh bé agʉa nko bé to e nye e!»

3Pyɛr bé e nuu mpʉn ze pyal kʉl, ó bé to ó, gʉʼ nko foo. 4Bɨbɛh oba ze buma mɨkam. Sa gwar, mpʉn waa nuu a be ó si bul lɨ kam, laa Pyɛr. Nye ó b'a taare to pyal efoʼ é foo, 5nye ze kubro si lé edeŋle foo. Nye a kʉ ka bee ó njɨ mɨmyɔʼ mɨ dɨla myé ome. (Mɨmyɔʼ myaa, myé a be ó mɨsɛa e ndomo kan é pumo-pumo.) Nyɛɛ a be ó, ani é foo tʉŋlʉ. 6Mpʉ Simɔn Pyɛr a be ó lé edu nye e, nyi ka ze pyal é foo, ze ni tɨʼ tʉŋlʉ é piʼlɨ, bee nteme mɨmyɔʼ mɨ dɨla 7ndwe e kan wé a taare be Yesʉs é mpom ɨ. Kan waa, wé a baabe gumo mɨmyɔʼ mɨ dɨla, myé a be e. Wé a be ó mbɛ̂ʼa, koma é l'empàh. 8Pie tɨ, mpʉn a taare pyal é foo e, nteme ze ni, ze bee, ntɔʼ kʉ buʼla. 9(Yé a be ó, ompʉn l'apa gʉa joʼo mpʉ Kalara Zyɛm a bɛa lɛɛ ó, yé a kʉ jala ó, nye pàha é foo e.) 10Bé ze bula toŋɔ é modia mɔɔ.

Yesʉs bé e Maaria, sile Magdala lé ebɛɛla

(Markus 16.9)

11Maaria a cyɛb ó kunokuno e foo, lé ejɨ. Nye dina lé ejɨ nɛʼɛ, nyi ze kubro si lé edeŋle foo, 12ze bee ó, beengles oba e mɨkan é pumo-pumo, ondindil gumo muu mo Yesʉs, wé a taare be e, nwaʼ nko lʉ we, wé a taare be e, nuu nko mokʉ me, mé a taare be e. 13Beengles onɨ, bé ze dî e nye ó: «Mʉma! Ebe yé go lé ejɨ ɨ?» Nye ó: «Bɨ pɛʼ Tî wam wâ. No ó, me agʉa nko bé to e nye e.»

14Jɔʼ nye a sil lɛɛ be no e, ǃnye ka dwibra mpʉʼ nɛʼɛ, bee Yesʉs naa cɨcyel! Sa gwar, Maaria a baadweʼe nye. 15Yesʉs ze dî e nye ó: «Mʉma, ebe yé go lé ejɨ ɨ? Zé go lé esaa wâʼ ɛ?» Maaria a jwɨʼ ó, yé a be ó mbɔʼlʉ peme. Nye e nye ó: «Da! Yé be ó, go ô nkɛɛ muu we, to e we nɛʼɛ, lɛŋɨ me. Me óto nʉa we.» 16Yesʉs, nye e nye ó: «Maaria!» Nye ze bâʼle dwibra nko Yesʉs a be e. Nye e nye é lwib arameyɛŋ ó: «Rabuni!» (No yé elɛɛ ó: «yeʼle».)

17Yesʉs, nye e nye ó: «Daʼ nara e me, ebe, me dina ó apa to é jobo kʉ, boo Sɔŋ. Toʼ, to lɛɛ obɨɔ bam ó: “Me mu ó lé ebere, bula to nko Sɔŋ wam ndɨ ɨ. Nye nteme, nye ó sɔŋ win. Nye ó Zyɛm wam. Nye ó Zyɛm win nteme.”»

18Maaria, sile Magdala ntɔʼ to lɛɛ ompʉn ó: «Mɨ bee Da!» Nye ntɔʼ lɛɛ be sa nye a lɛɛ nye e.

Yesʉs lé elɛʼle ompʉn be nye mʉr tɨ

(Mataos 28.16; Markus 16.14; Lʉkas 24.36)

19É bii kʉʼ é dobo e sono laa, esama le ompʉn be, bé a be ó si to syɛŋa é guu mbɛr, pɨrɔ mobe e mongʉŋ, ebe, bé a be ó lé ekpɛɛ oYʉden. Bé ka twɨra nɛʼɛ, Yesʉs nye mʉr tɨ, nyi ze cyɛb teme ompʉn be! Nye ó: «Motala, mé swɨŋɨ é bɨn.»

20Jɔʼ nye a sil lɛɛ be no e, nye ze lɛʼle be mokœh me ndwe e bɨmpah bye. Ompʉn be ntɔʼ ze soho lé ebee Da Yesʉs. 21Nye#20.21 Myʉʉ mɨnjʉ̌m mɨtila mɨ lwib grɛk myɛɛ, myé elɛɛ ó: «Yesʉs ntɔʼ bâʼle lɛɛ e be ó:» ntɔʼ bâʼle lɛɛ e be ó: «Motala, mé swɨŋɨ é bɨn. Mpʉ Sɔŋ wam a lomo me e, mɛm nteme, mɨ lomo bɨn.»

22Jɔʼ nye a sil lɛɛ be no e, nye ze gumlo be ngul é monyʉl. Nye ó: «Nʉa ga Mbɨambɨa Sisim é monyʉl! 23Mʉr nyiwɛh bɨn bé ópɛʼ bɨbaa bɨn bé a niʼe é lɔb mɨsyem mye e, Zyɛm nteme ópɛʼ bɨbaa nye mʉr tɨʼ a niʼe é lɔb mɨsyem myaa ɛ. Mʉr nyiwɛh bɨn bé ódi, apɛʼ bɨbaa bɨ ebebe bye e, Zyɛm nteme ódi, apɛʼ nye bya.»

Yesʉs lé ebâʼle lɛʼle nyʉl é jɔʼ mba

24Tomas, mʉr ngwar é l'Esama le ompʉn ewʉm e l'oba, waa bé lé ejebe ó, Egbah ɛ, a baabe tɨʼ é jɔʼ Yesʉs a pyal ɨ. 25Bʉʉ ompʉn, bé e nye ó: «Bɨh bɨ bee Da!» Tomas, nye e be ó: «ǃMe baabee mojwɨɨ bɨmpɨma é mokœh me, laʼ dine yam tɨ, fwam nteme mbo wam é bɨmpah nɛʼɛ, me l'abuʼla lɔɔ win.»

26Molu mwom, mé osi laa nɛʼɛ, ompʉn mo Yesʉs bâʼle to syɛŋa é mbɛr waa. Tomas a be ó tɨ. Mobe, mé a be ó mɨpɨra e mongʉŋ. Yesʉs ze pyal, cyɛb teme ompʉn be. Nye ó: «Motala, mé swɨŋɨ é bɨn.» 27Nye e Tomas ó: «Ntaʼ, ze laʼ dine yo wâ. Go à dwɛʼ mokœh mam. Go òfwam mbo go é mpah yam. Gwaʼa mosono. Buʼla.» 28Tomas ze lɛɛ e nye ó: «Go ó Tî wam ndwe e Zyɛm wam!» 29Yesʉs, nye e nye ó: «Zê go lé ebuʼla ó, ebe, gɨ bee me ɛ? Mocyɛʼ mo mpom, mé ó e bʉr o ndɨ ebuʼla lɔɔ wam, abeɔ me e.»

Lʉ ekan é kalara nwa

30Yesʉs a be ó si sa byʉʉ bɨdweʼle bɨ nkul we é buobuo é mih mo ompʉn be. Bibyɛh, byé abe tila é kalara nwa. 31Sa ndɨ tɨʼ tila ɛ, yé a tilɔ ó, é l'efu ó, bɨn buʼla ó, Yesʉs, nye ó Lœma mulo mo Zyɛm le Mwan mo Zyɛm. ǃBɨn si jyɛʼ taa buʼo yin boo nye nɛʼɛ, bɨn bé óbi tiʼ molu mo mpoʼ mɨmɛh é zi we#20.31 Nkʉ «É die le»..

Currently Selected:

Yʉanes 20: ozmBad

Highlight

Copy

Compare