Galat 2

Pol bé e myʉʉ mɨlʉmlʉ

1Pie e mɨmbu ewʉm e mɨnâ, me a si bâʼle to Yerʉsalɛm. Me a si gba bɨh Barnabas bé e Tit é sama cyen yaa. 2Me a to no ó, ebe mɨfela mɨlɔb Zyɛm a gwih me e. É jɔʼ me a pyal gʉʼ ɨ, bɨh e mɨlʉ mɨ mbɛr Zyɛm waa, bé a be ó si sa bʉm. Me ntɔʼ ze lɛʼle be mpʉ me ndɨ elɛɛ Mbɨambɨa Lɔɔ boo bʉr o ndɨ abe oYʉden ɨ. Me a baamɛʼle ó, syɛɛ me a be lé ebɛa sea ɛ, yé dwèʼ ntuʼ. 3Dam be mpʉ mʉr nduo wam Tit ndɨ mʉr Grɛs ɨ, bé a baatine nye ó, nye saŋɔ mpʉn. (Sa gwar, bé a si ngbaa sa no.) 4Bʉʉ bʉr o nkɔm waa, bé a be ó okristen o bɨkʉʉŋʉ. Bé a niŋle monyʉl é mbɛr Zyɛm ga wina é nyololo ó, lé ejɨ bee nkʉ bɨna ga mu ó é dia otî é zyɛŋa ga wina boo Yesʉs-Krɨst. Bé a bà jwɨʼ ó, bé óbɛm bâʼle liŋ bɨna molʉa. 5Sa gwar, bɨh bé a baadwe be ba jɔʼ, dam be ba titia. Bɨh bé a baabir ó, bé lɨrɨ Mbɨambɨa Lɔɔ, pɛʼ ocyecye we. Bɨh bé a kpɛl ó, bɨn joʼa we mpʉ wé a taare be e.

6Me a si to bee baa bé a nyin é mih ó, bé ó ocyɛb be efoʼ e... Nkʉ bé ó ocyɛb be efoʼ é l'ocyecye, nkʉ bé abe be, no yé asa mɛm sɔʼɔ, ebe, Zyɛm, nye adwaabe bʉr é lɔb mompom mɔɔ... Bʉr o b'a bul nyin no e, é jɔʼ me a lɛɛ be Mbɨambɨa Lɔɔ me lé elɛɛ bʉr ɨ, bé a baakɛl ekan egwar tɨʼ kʉ. 7Yé a baakunbo le esyɛɛlɨ no, ebe, bé a mɛʼle ó, Zyɛm, nyi timle me Mbɨambɨa Lɔɔ, ó me toʼ le elɛɛ we é jɔʼ me ndɨ e bʉr o bɨkul bɨfih ɨ. Nye a timle me wa ó, é l'efu e bɨkul bɨfih, mpʉ nye a timle Pyɛr wa é l'efu le oYʉden ɨ... 8ebe, mʉr ngwar e ngwar a sea e nkul é zi mo Pyɛr ó, nye diʼe lʉmlʉ mo Krɨst boo oYʉden ɨ, nye nteme ó ndɨ esea é jɔʼ yiyɛh é zi wam é l'efu ó, me toʼ boo bɨkul bɨfih. 9Jacques bé e Sefas ndwe e Yʉanes, bé ó b'a bul nyin é mih ó, bé ó ndɨ modwii mo sɔŋ é Mbɛr-Zyɛm tʉŋlʉ. Bé a si gʉa é l'ocyecye ó, Zyɛm a si lɛʼle me ncwɨncwɨa we, bé ntɔʼ bara e bɨh e Barnabas, lé elɛʼle bʉr ofih ó, bɨh e boo nɔɔ, bé a kʉ be ó e mpaʼra osyɛl o mosa mpwar. Bɨh ntɔʼ twe twii ó, bɨh bé óto boo bʉr o ndɨ abe oYʉden ɨ, bɛɛ, lé eto boo oYʉden. 10Bé a kʉ lɛɛ e bɨh ó, njɨ bɨh saʼ sa gwar yi: egul baanteʼenteʼe. Leme, wé a be ó me nteme é ntɨɨɨŋ ó, me saʼ syɛɛla yaa.

Pyɛr bé e Pol ɨ Antios, yaa lal Siria

11Pie tɨ, é jɔʼ Pyɛr a ze kœb me é nkana Antios ɨ, me a si siila twii e nye, ebe, yé a si kʉ nyin é kpɛŋlɛm ó, nye a be ó e mobe. 12É l'etɔɔrʉ, bé e bʉr o bɨkul bɨfih, bé a de-de mode ó, lé epuhba mobo gumo gwar. Pie tɨʼ nɛʼɛ, Jacques ze lomo bʉr gʉ. É jɔʼ mɨlʉmlʉ mye myaa, myé a pyal ɨ, Pyɛr ntɔʼ dulo nyʉl, aka puhba mobo, bé e bʉr o Antios. Yé a pyal nye no ó, é bʉa nye a joʼo obuʼla bé a gwɨm tine bʉʉ bʉr ó, bé saʼ mpʉn ɨ. 13Bʉʉ obuʼla bé a byɛl oYʉden, baa b'a be é sama cyen mo Pyɛr ɨ, bé a be ó baanya-bɨkʉʉŋʉ, mpʉ Pyɛr nteme a be e. Dam be ó Barnabas nye mʉr tɨ, nye a si twe twii e be, bé e boo nɔɔ bɨbɛh, bé ze taare lé esa bɨkʉʉŋʉ. 14Mpʉ me a bee ó, bé a baaka be lé ekœʼ ebò e cyen é l'ocyecye mpʉ Mbɨambɨa Lɔɔ lé etɨe bɨna ga ɛ, me a ze lwib e Pyɛr, bɨbɛh é modia. Me e nye ó: «Gwɔɔ mʉr Yʉden nwa, go ekœʼ ebò e cyen wâʼ ó, mpʉ bʉr o bɨkul bɨfih, yé abe no? É mpʉ yé ndɨ no e, a, ebe yé go lé ekpɛl tine bʉr baʼ ó, bɛɛ kœʼœ ebò e cyen mpʉ oYʉden? 15Bɨna ga ó ndɨ bɨmpɛh bɨ oYʉden, abe bʉr o bɨkul bɨfih, baa lé ejebɔ-jebɔ ó, osyɛl o mɨsyem ɨ. 16To kœb ó, bɨna mu lé egʉa ga ó, mʉr, nye aŋa bi mokebe é mih mo Zyɛm ebe mbi nye lé edu motie e. Mʉr, nye ebi mokebe é mih mo Zyɛm ó, ebe taa buʼo nye lé ejyɛʼ boo Yesʉs-Krɨst ɨ. Bɨna bɨ jyɛʼ ga taa buʼo yina nteme boo Krɨst é l'efu ó, bɨna nkʉʼ bi ga mokebe é zi buʼo gwar yaa. Abe e mʉr lé ebi mokebe ebe mbi nye lé edu motie e. Mʉr ákwoʼ bi mokebe é mih mo Zyɛm ebe mbi nye lé edu motie me e.

17«Bɨna oYʉden, bɨ buʼla ó, bɨna bé óbi ga mokebe é mih mo Zyɛm ó, abe é dɔɔ mbaʼla motie ga wina, njɨ ebe zyɛŋa ga wina boo Krɨst. Yé mu lé enyin ó, bɨna ga mu ó mpʉ baa bɨna bé a jebe-jebe ga ó, osyɛl o mɨsyem ɨ. Zê no ó ndɨ elɛɛ ó, Krɨst, nye ó syɛl mosa mo Syem ɛ? Hɨʼɨ, yé abe ba no! 18ǃƗ mʉr si pɛʼ leme we é mbi nye lé edu motie e, nye ze bâʼle gwɨm gwɨmɨ ó, nye nkʉʼ bi tiʼ molu mo mpoʼ mɨmɛh ebe mbi nye lé edu me nɛʼɛ, nye elɛʼle tɨʼ ó, nye ó ntɔɔ motie mo Zyɛm. 19É jɔʼ me a taare be é monkara mo mɛra motie mo Moyiz ɨ, me a be ó si ntaa motie maa, é ntaa ntaa, me ntɔʼ dwè. É jɔʼ me a dwè ebe motie maa ɛ, efie lam, lé ó b'a sa ó, me pʉʼa tɨ, ó me l'aka nyamle cwɨɨ tɨ. Sa yaa yiyɛh, yé a syɛɛlɨ no ó, me nkʉʼ nʉa edwan e tiʼ yam, ze dwe le Zyɛm nye mʉr tɨ. 20É jɔʼ bé a cyèl Yesʉs-Krɨst é klos kʉ ɨ, me nteme, me a si bomlɔ tɨ, bɨh e nɔɔ. Ntʉʼ me ndɨ etiʼe é banana. Yesʉs-Krɨst ó ndɨ etiʼe é me tʉŋlʉ. Tiʼ me lé eka tiʼe é si nwaʼ ɛ, me etiʼe ye ó, ebe taa buʼo me lé ejyɛʼ boo Mwan mo Zyɛm ɨ. Nye a si kpɛl me, ze dwe tiʼ ye é ziila e me. 21Me abe e nkul epyeh ncwɨncwɨa mo Zyɛm. Yé be ó, mʉr fih mʉr kɛ̀l, nyi pʉʼa é nkar, sɔba é feerɨ ebe mbi nye lé edu motie nɛʼɛ, lɛɛ ó, Yesʉs-Krɨst a kʉ dwè ó, mbɛh!»

Currently Selected:

Galat 2: ozmBad

Highlight

Copy

Compare