Mɨlʉmlʉ 25

Pol lé ekar é mih mo Fɛstwis

1Fɛstwis ze tɨ cyen, to Yerʉsalɛm, é jɔʼ yaa, nye osi pyal ɨ Sezare e molu molɛl. 2Ojwɨɨ be opara ndwe e l'ocyɛb be efoʼ o Yʉden ze cyɛb é mih me, lé eto pur Pol. No ó bé a dî e Fɛstwis ó, 3nye loma bʉr ó, bé baŋla Pol ɨ Yerʉsalɛm, ebe, bé a si bòno pɨʼ é lɔb we, beɔ ó, bé óbono nye temezi, jʉ nye. 4Fɛstwis a bɨha e be ó, Pol a be é mbʉʼ ó, ɨ Sezare. Fɛstwis nteme a be e jwɨʼ ó, nye ókpahbe fiʼ, to kœb nye gʉ. 5Nye a lɛɛ nteme ó: «Ojwɨɨ bɨn, bé toʼ, to liʼle me Sezare. Yé be ó, Pol a be ó si sa ebebe nɛʼɛ, bé toʼ, to pur nye gʉ.» 6Fɛstwis a ja é sama yɔɔ ó, molu mwom, nkʉ ewʉm. Nye ntɔʼ bâʼle to Sezare.

É mɛn tɨ, nye ze di é dia tiʼà mɨlɔb ye, nye ntɔʼ dwe nkul ó, bé ntaʼ e Pol. 7É jɔʼ Pol a pyal ɨ, oYʉden bé a duho Yerʉsalɛm ɨ, bé a si bʉmra nye é nka, ze buʼɔ nye mɨlɔb é buobuo. Sa gwar, bé a baabe e dweʼle, sa yé a ngbaa lɛʼle ó, nye a be ó si byaʼ nuu mʉr lɔb.

8Pol, nye ze komo nkar si, lé elɛɛ ó: «Me a baasa syɛɛla ebebe gwar é nko paʼ motie mo oYʉden, nkʉ nteme é maa mo Mpah Zyɛm, nkʉ maa mo Kɛɛza#25.8 Njwɨɨbʉr nɨnɨ a taare cyɛb njwɨɨ é lal Rom wiwɛh ɛ, a be die ó Yʉlios Kɛɛza. Pie koo we ó bé a nʉa die le mpʉ njɨblɨ ɨ..» 9Fɛstwis nyɛɛ a be lé ejɨ sa ó, oYʉden, bé beŋɨ ó, nye é mbɨa. No ó nye a ka dî e Pol ó: «Zê go lé ekpɛl ó, go to ó, ɨ Yerʉsalɛm, bé toʼ, to lwib lɔb go gʉʼ é mih mam ɛ?» 10Pol ze bɨha e nye ó: «Me ecyɛb ó wâʼ cɨcyel é mpah mɨlɔb mo Kɛɛza! Ɨ tɨʼ nteme ó lɔb wi, wé lé ekʉ jala le elwibɔ ɛ. Me a baasa oYʉden sa ebebe gwar, é mpʉ go mʉr tɨʼ lé egʉa ɛ. 11Yé be ó, mɨ ntaa lʉʉ etie, ntɔʼ dweŋɔ mobe mo jala e l'efie nɛʼɛ, me abene lé edwè, jala e ye. Yé be ó, mɨlɔb bé lé epur me tɨʼ ɨ, myé abe cyecye nɛʼɛ, yé abe e mʉr ndɨ e nkul ebir me é mobo mɔɔ ó, bé jʉʼo me. Me ecen lɔb wam ó, boo Kɛɛza!» 12No ó, Fɛstwis, é jɔʼ nye a sil lwib e bʉr o bʉm ye e, nye ze bɨha ó: «É mpʉ go lɛɛ ó, go ecen lɔb go ó, boo Kɛɛza ɛ, go ókʉ ka to ó njɨ nye ye!»

Pol é mih mo njwɨɨbʉr Erod Agripa Mba bé e kɛl we Benik

13Bwa molu, bé osi laa nɛʼɛ, njwɨɨbʉr Erod Agripa bé e Benik ze pyal ɨ Sezare, lé eze sohɔ Fɛstwis. 14É mpʉ bé a di tɨʼ molu é buobuo e, Fɛstwis ze lɛɛ njwɨɨbʉr waa lɔb Pol a be e we e. Nye e nye ó: «Nuu mʉr Felik a liʼe wâʼ é mbʉʼ ɨ, nye dina ó tɨʼ é mbɛr mɨmbʉʼ. 15É jɔʼ me a to Yerʉsalɛm ɨ, ojwɨɨ be opara ndwe e l'otamabʉr oYʉden, bé a si pur nye, bɛɛ lé elɛɛ nteme ó, me dweʼ nye mobe, le ekab nye bɨntɨʼa. 16Me ze bɨha e be ó, bɨh bʉr o Rom, bɨh bé abe e njwɨr ó, bɨh kɛha mʉr é mobo mo bʉr o ndɨ epur nye e, nye l'apa cyɛb é mih mɔɔ, ó nye fua nyʉl lé ekar mɨnkar mye. 17Bé a si ka ze wâ. É mpʉ me a baasa tab ɨ, é mɛn tɨ, me ze di si é dia tiʼà mɨlɔb yam. No ó me a dwe nkul ó, bé ntaʼ me e mʉr waa. 18Bʉr o b'a pur nye e, bé a si cyɛb nteme. Sa bé a pur nye tɨʼ ɨ, yé a baabe mobyaʼ mo ebebe me a gʉa ó, bé óbɛm lɛɛ ɛ. 19Bé a kʉ ka pɨra mokan ó njɨ é lɔb buʼo yɔɔ, é lʉ mo nuu mʉr a dwè, die le Yesʉs ɨ. Pol nyɛɛ, nye ekʉ lɛɛ ó, mʉr waa, nye mu ó lé etiʼe! 20Me a be ó leme é mo é zaaama, agʉa tiʼa me a be e nkul enʉa é lɔb waa ɛ. Ebe no ó me a dî e Pol, nkʉ nye óbɛm kpɛl to Yerʉsalɛm é l'efu ó, lɔb we, wé toʼ, to lwibɔ gʉʼ ɨ. 21Pol nyɛɛ ze bene. Nye ó, nye cen ó lɔb we dolo. Nye a dî ó, bé baʼla nye é mbɛr mɨmbʉʼ, é mbi ndɨ ó, Kɛɛza, nye nʉŋa tiʼa é lɔb we e. Me a be ó si kʉ dwe nkul ó, bé baʼla nye, to pyal é jɔʼ me óbe e l'epʉla ó, me cenɨ nye boo Kɛɛza ɛ.» 22Agripa ze lɛɛ e Fɛstwis ó: «Mɛm mʉr tɨʼ nteme, me egwɨm joʼo mpʉ mʉr nɨ lé elwib ɨ.» Fɛstwis ntɔʼ lɛɛ e nye ó: «Omɛn, go ójoʼo mpʉ nye lé elwib ɨ.»

23No ó, é mɛn tɨ, njwɨɨbʉr Erod Agripa bé e Benik, bé ntɔʼ ze pyalɔ é mpah mɨlɔb e l'ekɛn é buobuo. É jɔʼ gwar yaa ó bé a ze e l'ojwɨɨ o bɨzima onɨnɨ ndwe e mɨnjwɨ̂ʼ mɨ bʉr o nkana ɛ. Pie tɨ, Fɛstwis ze dwe nkul ó, bé toʼ, to nʉa Pol. 24No ó, Fɛstwis a lɛɛ ó: «Tamamʉr Agripa, bʉr o bɨh e boo nɔɔ ndɨ wâʼ ɛ, bɨn bɨ gʉa mʉr nwa. Nye ó waa oYʉden bɨbɛh lé eze pur é mih mam ɨ. Lé etaare ɨ Yerʉsalɛm, ze kumo wâ, bé ebɨn mocel kʉ kʉ, lé elɛɔ ó, nye ajala le eka tiʼe. 25Mɛm, me abee sa nye a sa ndɨ ejala ó, nye dwèʼ. Dam be no, é mpʉ nye mʉr tɨʼ a bɛa lɛɛ ó, nye to ó, to kar lɔb we boo Kɛɛza ɨ, no ó me a fuo ka nʉa tiʼa ó, me cen ó nye gʉ. 26Me abe e simsim sɔʼɔ me ndɨ e nkul etile tî wam é lʉ mo Pol. Ebe no ó me ze e nye kaʼ é mih mɨn ɨ. Me kʉ bul ze e nye wâʼ ó, é mih mo, Tamamʉr Agripa, é l'efu ó, é jɔʼ bɨna bé ósil pahle lɔb we e, me nkʉʼ gʉa sa me tila tî wam ɨ. 27Mɛm, mɨ bee ó, yé ajala ó, mʉr liʼla mbʉʼ boo Kɛɛza, abe e kalara ndɨ elɛʼle mobyaʼ mo mʉr waa ɛ.»

Currently Selected:

Mɨlʉmlʉ 25: ozmBad

Highlight

Copy

Compare