Mɨlʉmlʉ 26

1No ó, Agripa a lɛɛ e Pol ó: «Go mu ó e nkul elwib é l'efu le ekamle e go mʉr tɨ.» No ó Pol a ze bɨn mbo kʉ#26.1 É jɔʼ mʉr a be, nye mu é bul jwɨ̂ʼlɨ e bɨlɛba ɛ, nye a dɨ lwib e bʉr ó, nye osi cyɛb cɨcyel, le ebɨn mbo ejʉm we kʉ., ze taare lé ekar lɔb we é mbi wi: 2«Tamamʉr Agripa! Me ebee ó, me e mocyɛʼ mo mpom, ebe, me ókomo nkar si é mih mo, é muh é dobo lɨ. No ó me óbɨha sa yiyɛh oYʉden lé epur me e tɨʼ ɨ. 3Me ekʉ bul soho ó, ebe, go egʉa mɨnjwɨr mimyɛh bɨh oYʉden a liʼ e mye e. Go nteme, go ekʉ gʉa mpʉ bɨh lé epɨra-pɨra mokan é myʉʉ mɨlɔb mih ɨ. No ó, me ejwɨʼla e go ó, go dihba me. Go à joʼlo me.

4«OYʉden bɨbɛh, bé egʉa mpʉ tiʼ yam, yé a be-be, taare é l'osoho wam, ze pyal é muh é dobo lɨʼ ɨ. Bé egʉa nteme ó, mpʉ me a gbabla é gumo kul bʉr yam, yé a be e, ntɔʼ ka lele mʉrʉm ɨ Yerʉsalɛm ɨ. 5Bé ebɛa gʉa me mbɨmbɨa. ǃBé si kpɛl nɛʼɛ, bé ó e nkul eboʼlo ó, me a si kœʼ ebò e cyen mpʉ oFarizyɛŋ. Gʉŋa ga ó, esama lɨh laa ó ndɨ edu buʼo ga yina é dwiii. 6Banana, me ecyɛb é nkar, ebe mbɛla ndɨ me lwɨŋla é leme e. Me ekʉ ka buʼla ó njɨ Zyɛm ódira nkɛʼ nye a liʼe bɨmpam bih e wa ɛ. 7Tamamʉr, moveh ewʉm e moba mo kul ga yina, mé ejoʼo dweh ebee mpʉ Zyɛm ódira nkɛʼ waa ɛ. Bé edwiibɨ Zyɛm ó, moho e pum. OYʉden, bé ekʉ ka pur me ó njɨ ebe mbɛla ndɨ me lwɨŋla é leme e. 8Ebe yé bɨn oYʉden ndɨ abuʼla ó, Zyɛm, nye epɛ̀h bʉr é mofoo ɛ?

9«No ó, mɛm nteme, me a buʼla ó, yé a jala ó, me saʼ sa yiyɛh é l'efu ó, me lwimla e die mo Yesʉs, mʉr Nazarɛt. 10Yé ó sa me a sa-sa ɨ Yerʉsalɛm ɨ. Ojwɨɨ be opara, bé a be ó si dwe me nkul ó, me gbaʼ buobuo mɨsaŋ mɨ bʉr mo Zyɛm é mbʉʼ. É jɔʼ bɛɛ, bé a jʉ be e, me a be ó si mɛʼle. 11É jɔʼ yiyɛh, me a be lé eto é mompah mɨnjwɨʼla ó, me nkʉʼ kab be bɨntɨʼa. Me a tine be ó, bé lwɨŋɨ Yesʉs. Empime lam, lé a bul bwaʼ ó bwaʼa, to pyal é jɔʼ me a to pyal é bɨnkana mɨlal mɨfih, to tíile be.

12«É mbi wiʼ ó me a to Damas ɨ: me a be ó e buobuo nkul, duho boo ojwɨɨ be opara ɛ. 13No ó, Tamamʉr, é mpʉ me a to le ekœʼ zi e zi ɨ, é teme moho, me ze bee mɨmbah myé a duho é myɛn wé a be é jobo kʉ ɨ. Myé a be ó é bul pan, laa dobo. Myé a kʉn ó, taare é gumo me a be e, to kumo é gumo bɨjana nduo byam, byé a be e. 14Bʉr onɨ bɨbɛh ze duma si, mɛm e mɛm lé eze joʼo twii lé elwib é lwib arameyɛŋ ó: “Sol, Sol, ebe yé go lé epa kʉ tíile me mpʉnʉ nɨ ɨ? Go esa go mʉr tɨʼ ebebe lé edi e l'eyɔʼ. Go ó mpʉ ntɛɛ lé ekaŋa e mʉr ɨ, yɛɛ lé egʉa ó, mʉr waa, nye epala ye e ntɔŋ é mbo é twɛm-twɛm.” 15Me ntɔʼ dî ó: “Da, gwɔɔ, go zé ɛ?” No ó Da Yesʉs a bɨha e me ó: “Mɛm, me ó Yesʉs, mʉr go lé etíile e. 16No ó, mʉŋa si. Cyɛba cɨcyel. Me si lɛʼle go me mʉr tɨʼ ó, go diʼe syɛl mosa wam. Go óbe nteme ó mboʼla wam, lé elɛɛ bʉʉ bʉr é mpʉ go bee me muh ɨ, ndwe le elɛɛ be sa me óbâʼle lɛʼle go e. 17Me ókamle e go é teme oYʉden, le teme bɨkul bɨfih nko me ócen go e. 18Me elomo go ó, go bɛŋɨ bʉr mih. Go dwihɨ be é l'edurʉ, cen be é myɛn; dwih be é mpel mo Satan, cen be nko bé e Zyɛm, bé ódɨ di ɨ. Me ópɛʼ bɨbaa me a niʼe é lɔb mɨsyem myɔɔ ɛ, lé edwe be dia é l'esama e bʉr o b'a jyɛʼ taa buʼo yɔɔ boo me, mɛm ntɔʼ pubo e.”

19«No ó, Tamamʉr Agripa, me a baasa pyeh pie jɔʼ me a bee sa jehe é lima, yaa yé a duho é jobo kʉ ɨ. 20Me a kʉ ka taare ó njɨ e tuno Mbɨambɨa Lɔɔ, taare é bʉr o Damas bé e baa o Yerʉsalɛm, ndwe e baa bɨbɛh ndɨ é lal Yʉda ɛ, to pyal é mɨlal mɨ bʉr o ndɨ abe oYʉden ɨ. Me a lɛɛ e bɨbɛh ó, bé gwɨma mobebe mɔɔ, dwir mɨleme, le ejyɛʼ taa buʼo yɔɔ boo Zyɛm. Bɨsyɛɛla byɔɔ, byé óbe ó bɨdweʼle, sa lé elɛʼle ó, bé mu ó ocɨcyel o bʉr, le mɨleme mɨndwira ɛ.

21«To kœb ó, é lɔb waa ó oYʉden bé a mɛr me, mɛm é jahla bii mo Zyɛm tʉŋlʉ ɨ. Bé a ze saa ó, bé jʉ ó me. 22Sa gwar, Zyɛm a si kʉ kamle e me, ze pyal é muh é dobo lɨ. Me dina ó wâ, lé elɛɛ bʉr bɨbɛh lɔb mo Yesʉs, taare é baanteʼenteʼe, to pyal é l'osabene. Me alɛɛ yʉʉ sa fih, njɨ mɨlɔɔ lé etiibe e bɨsyɛɛla ogwiha o mɨlɔb ndwe e Moyiz bé a bɛa lɛɛ ó, byé ósyɛɛlɨ ɨ. 23No ó, yé a be ó, Lœma mulo mo Zyɛm ótaare sia e mɨtuu. Nye ó ngo be ndwè efoʼ ótaare pàh é foo e. Pie tɨ, nye óka cen kul ga yina, bé e bɨkul bɨfih mompaŋla é lɔb myɛn tiʼ.»

24É mpʉ Pol a be, nye dina lé ekomo nkar we si ɨ, Fɛstwis ze tiʼe nye lwib, lé eyɨm twii ó: «Pol, go mu ó lé ekaa ogʉ! É mpʉ go ndɨ é bul jwɨʼ bɨsikʉlʉ ɨ, bi sa ó, go lihba gʉ.» 25No ó, Pol a bɨha e nye ó: «Tamamʉr Fɛstwis! Me abe gʉ. Mokan me lé elɛɛ ɛ, mé ó cyecye; mé ó e pɨʼ. 26Njwɨɨbʉr Agripa a si lɛɔ bɨsa bi. No ó me e nkul elwib é kpɛŋlɛm, abe e bʉa é mih me. Mɨ kʉ gʉa ó, nye ajeʼe sa gwar tɨ, ebe, bɨsyɛɛla bɨ tɨ, byé a baasyɛɛ é l'efo. 27No ó, Tamamʉr Agripa, zê go lé ebuʼla sa ogwiha o mɨlɔb lé elɛɛ ɛ? Mɨ gʉa ó, go ebuʼla no!» 28Agripa ntɔʼ lɛɛ e Pol ó: «Go ejɨ sa kam e kam ó, me tweʼ twii e bɨn, ntɔʼ syɛŋa sama e l'okristen.» 29Pol, nye ó: «Dam be é banana, nkʉ é molu lé eze e, me ejwɨʼla e Zyɛm ó, abe é l'efu lo, go ome. Me ejwɨʼla nteme ó, é l'efu e bʉr bɨbɛh lé ejoʼlo me muh ɨ, ó bɨn diʼe mpʉ me ndɨ yi... abe yɛɛ é nkara mpʉ me mu ɨ.» 30Njwɨɨbʉr bé e ngoman, ndwe e Benik, ka kɛl baa bɨbɛh, bé e boo nɔɔ, bé a be tɨʼ ɨ, bé ze mʉa si, 31toŋɔ é l'empàh, to diŋɔ bʉm. Bé ze lɛɛla ó: «Mʉr nwaʼ a baasa syɛɛla ebebe gwar ndɨ ejala ó, nye dwèʼ tɨʼ ɨ, nkʉ yaa ndɨ ó, nye toʼ é mbʉʼ tɨʼ ɨ.» 32Agripa ze lɛɛ e Fɛstwis ó: «Nkʉ mʉr nwaʼ a be ó be, l'ato e lɔb we boo Kɛɛza nɛʼɛ, mpa gɨ bɛa bir nye!»

Currently Selected:

Mɨlʉmlʉ 26: ozmBad

Highlight

Copy

Compare