Mɨlʉmlʉ 21

Pol lé eto Yerʉsalɛm

1Jɔʼ bɨh bé a jɛna e be e, bɨh bé a si kable é titima, tɨŋɔ cyen, ze nʉa cɨcyel zi lé eto dine Kos ɨ. É mɛn tɨ, bɨh ntɔʼ pyal dine Rode. Emʉa bɨh bé a ka mʉa tɨʼ ɨ, bɨh ze to pyal Patara. 2Bɨh bé a si kœb titima yé a be lé eto yʉʉ nkana ndɨ é nkɔra Fenis ɨ. Bɨh ze kable tɨ, ntɔʼ tɨ cyen, to é to to, 3to pyal kunokuno e dine Siprʉs. Bɨh ntɔʼ cwɨɨ é nko paʼ mbo emyɛl é dine laa, ntɔʼ liʼe le pihe, to nko lé eto Siria ɨ. Bɨh ze to kumo Tir, ebe, yé a jala ó, titima filɨ mɨkɔɔlʉ mye tɨ.

4Bɨh bé a si kœb ompʉn tɨ, bɨh e boo nɔɔ ze ja tɨʼ sono ntinɨ. Bʉr, bé a be ó si lɛɛ e Pol é nkul mo Mbɨambɨa Sisim ó, nye l'ayi ka to Yerʉsalɛm. 5Dam be no, é jɔʼ sono ntinɨ bɨh e boo nɔɔ, bé a di ɨ, a be, nye mu si laa ɛ, bɨh ze mʉa, to e cyen yih dolo. Bɨbɛh ze liʼle bɨh, taare é l'ompʉn o bʉrʉm, to pyal é baa o bʉba, bé e bwan bɔɔ, to bɔma e bɨh é l'odumo o nkana. Bɨh ze kur moboo si é l'ebʉm e maŋ, lé ejwɨʼla e Zyɛm. 6Bɨh ze sil lé esa myɛna, baʼ jɛna e bʉʉ, bʉʉ jɛna e ba. Bɨh ze kable é titima, bɛɛ ze fiʼ, toŋɔ é mɨmbɛr myɔɔ.

7Bɨh ntɔʼ duho Tir lé eto le ekœʼ cyen é titima, bɨh ntɔʼ to pyal é l'ebʉm e Tolemayɨda, é gumo bɨh bé a bara e l'obɨɔ bɨna ɛ. Bɨh e boo nɔɔ, bé a si di tɨʼ moho ntinɨ. 8Ngbaa le eka be, é mɛn tɨʼ nɛʼɛ, bɨh ze mʉa, to ɨ Sezare. Tɨʼ ó bɨh bé a fil é mbɛr mo Filip, ndɨ lɛa Mbɨambɨa Lɔɔ ɛ. Nye a be ó mʉr ngwar é l'esama e bʉr tambɛl#21.8 Odiakɔn tambɛl baa, bé a be ó si pɛhɔ ɨ Yerʉsalɛm é l'efu ó, bé nkʉʼ kab mɨkuho mɨ bʉba myé a be tɨʼ ɨ, mode. Dwɛʼa Mɨlʉmlʉ 6.5.. Bɨh bé a ja ó mbɛr we. 9Nye a be ó e mɨndu mosehe mɨnâ. Mimyɛh, myé a be-be ó lé egwih bʉr mɨlɔb mo Zyɛm. 10Bɨh bé a si di tɨʼ molu é buobuo.

Nuu ngwiha mɨlɔb a be ó tɨ, die le Agabus. Nye a be ó si duho Yʉda, 11ze pyal gumo bɨh bé a be e, nʉa kana mo Pol, ze kaʼ nye mʉr tɨʼ mobo e mokʉ. Nye e nye ó: «Mbe ga: é mpʉʼ ó Mbɨambɨa Sisim lé elɛɛ ɛ: “Mʉr ndɨ e kana nwaʼ ɛ, oYʉden o Yerʉsalɛm, bé ókaʼ nye ó mpʉʼ. Bé ókaʼ nye, ntɔʼ kɛhɔ nye boo bʉr o ndɨ abe oYʉden ɨ.”»

12Jɔʼ bɨh bé a sil joʼlo mokan maa ɛ, bɨh bʉr o tɨʼ ndwe e baa o nkana Sezare ntɔʼ jwɨʼla e Pol, le esaa elehle nye ó, nye l'aka du zi lé eto Yerʉsalɛm ɨ. 13Nye a bɨha ó: «Ebe yé bɨn lé ejɨ, le esaa ó, me tʉlɨ e l'edwe ɛ? Ebe, é nko paʼ wam, mɨ mɛʼle sa yaa yiyɛh, abe njɨ ekaʼɔ monkara. Me ó é car ó, me dwèʼ ɨ Yerʉsalɛm é l'efu e die mo Da Yesʉs.» 14Mpʉ nye a baabe twe twii e bɨh ɨ, bɨh ntɔʼ cyɛʼ. Bɨh bé a kʉ ka bɨha ó njɨ: «Da saʼ sa nye lé egwɨm ɨ!»

15Bwa molu, bé osi laa nɛʼɛ, bɨh ntɔʼ kwɨmla cyen lé eto Yerʉsalɛm, ntɔʼ toŋɔ. 16Ompʉn bé a duho Sezare e, bé a si liʼle bɨh, to pyal é mbɛr mo nuu mʉr a jala le eniŋle bɨh ɨ modwii me e. Yé a be ó mʉr Siprʉs, die le Manasɔn, a be é l'esama le obuʼla bé a taare jyɛʼ taa buʼo yɔɔ boo Yesʉs ɨ.

Pol lé eto bee Jacques

17É jɔʼ bɨh bé a pyal ɨ Yerʉsalɛm ɨ, obɨɔ bɨna, bé a si nʉa bɨh e bɨsʉhʉ. 18É mɛn tɨ, bɨh e boo Pol, bé ze to mbɛr mo Jacques. Ocyɛb be efoʼ o mbɛr Zyɛm waa, bé ntɔʼ ze gwɨhla nteme tɨ. 19Pol ze bara e be, ntɔʼ ze taŋle bɨsyɛɛla Zyɛm a sa é zi syɛɛ nye a sa teme bʉr o ndɨ abe oYʉden ɨ, lé etaŋle bye gugwar. 20Jɔʼ bé a sil joʼlo sa nye a dɨ lɛɛ be e, bé ntɔʼ gumlo Zyɛm. Bɛɛ ze lɛɛ e Pol ó: «Mɨɔ wih, gɨ bee mpʉ oYʉden otɔɔyin otɔɔyin mu si jyɛʼ taa buʼo yɔɔ boo Yesʉs-Krɨst ɨ. Mɨleme, myé ó be é ntɨɨɨŋ ó, bé duʼo motie mo Moyiz. 21Sa gwar, bé ejoʼo é lʉ go ó, go eyeʼle oYʉden bɨbɛh ndɨ myɛma é bɨkul bɨfih ó, bé kaŋa e yeʼla mo Moyiz. Bé ejoʼo nteme ó, go elɛɛ be ó, bé ajala le eka sa bwan bɔɔ mpʉn; ó bé l'ayi ka kœʼ mpʉ oYʉden. 22Yé be no nɛʼɛ, bɨna kaʼ sa ga nyá ɛ? Ebe, bɨbɛh#21.22 Myʉʉ mɨnjʉ̌m mɨtila mɨ lwib grɛk myɛɛ, myé elɛɛ ó: «Bɨbɛh, bé ósyɛŋa, ebe,», bé ókʉ joʼo lɔɔ ó, go mu ó si bula. 23Saʼ mpʉ bɨh lé elɛɛ ó, go saʼ ɛ. Bɨh bé wâʼ ó e bʉrʉm onâ bé a bɛa de mɨnkɛla ɛ. 24Bɨn e boo nɔɔ ntaʼ, ze puba ga. Gwɔɔ ó ngo jɛna motɔɔ mɨn boo nɔɔ é l'efu ó, bé nkʉʼ cwɨa mɨlʉ myɔɔ. É zi waa ó bʉr bɨbɛh, bé ógʉa ó, sa yiyɛh bé lé ejoʼo é lʉ go e, yé abe cyecye. Bé ógʉa ó, go nteme, go ekʉ du motie ga mɨna boo nɔɔ. 25Bʉr o ndɨ abe oYʉden, baa mu si jyɛʼ taa buʼo yɔɔ boo Yesʉs ɨ, bɨh bé a si tile be kalara, le elɛɛ be mɨtiʼa bɨh bé a nʉa é nko paʼ wɔɔ ɛ. Yé a be ó, bé diʼe é l'ecyooŋʉ lé esyɛhle mɨlɔb mɨnâ mi: lɔb tir a bàŋɔ é mpah bé ndɨ edwiibɨ ozyɛm bé a dɨ kpaʼ ɛ, lɔb ede motié, lɔb ede tir a baasyɛhɔ twii, motié pʉʼa ɛ, ndwe e lɔb esa bɨmala e mɨfyɛba.»

Pol, nyi mɛrɔ é jahla bii mo Zyɛm tʉŋlʉ

26É mɛn tɨ, Pol ze nʉa bʉrʉm onâ baa, bé e boo nɔɔ ntɔʼ to é jahla bii mo Zyɛm, to bee opara, bé e boo nɔɔ nkʉʼ taʼ mɨlɔb, le egʉa jɔʼ bé ódwe Zyɛm mɨndwɛa é l'efu e mʉr nyiwɛh é sama yɔɔ ɛ. (Yé a be ó, bé e boo nɔɔ, bé osi taare epuba.)

27No ó, é jɔʼ moho tambɛl, wé a be, wé mu si laa ɛ, Pol ze bâʼle ni é jahla bii mo Zyɛm. Mbea oYʉden o lal Azia, bé a bee nye e, bé ntɔʼ soʼlo mpampaʼ bʉrʉm, ó bé swɨŋɨ nye é nyʉl, 28lé ebʉŋɔ bɨtim. Bé ó: «Mbɛngɛɛ! Bɨn bwa b'Ɨzraɛl ɔɔ! Paʼ ze bee ga mʉr lé edwe bʉr sikʉlʉ é gumo yiyɛh, yaa ndɨ elwimla e kul bʉr ga yina, bé e motie ga mɨna ndwe e Mpah Zyɛm nwa ɔɔ! Banana, nyi bana niŋle nteme bʉr o bɨkul bɨfih é jahla bii mo Zyɛm tʉŋlʉ ɔɔ! Nyi lœʼ gumo yé a be e l'ekɛn ɨ, é mih mo Zyɛm ɔɔ!» 29(Bé a lɛɛ-lɛɛ no ó, ebe, é jɔʼ bé a bee Pol lé ekœʼ nkana e nkana ɛ, yé a be ó, njɨ bé e jana nduo ye Trofimos, mʉr Efɛɛz. Bé a jwɨʼ ó, Pol a si niŋle nye nteme é jahla bii mo Zyɛm tʉŋlʉ.)

30Nkana yiyɛh, yé a be ó, yé mu é leŋe-leŋe. Bʉr ze tɨbla é bɨgumo bibyɛh. Bé a ze ó kam e bile e zɨzam, mɛrɔ Pol, to le edulɔ nye si e si, pɛʼɔ nye é jahla bii mo Zyɛm tʉŋlʉ, diblɔ ntɔʼ mobe mo tɨ. 31Bé a be ó lé esaa ejʉ nye! Lɔɔ tɨ, wé ntɔʼ to pyal é mogwal mo njwɨɨ bɨzima nɨnɨ, waa a jwɨ̀ʼ ntoo bɨzima ntinɨ ɨ. É jɔʼ nye a gʉa ó, Yerʉsalɛm yiyɛh, yé mu ó é leŋe-leŋe e, 32cye e cye yaa, nye ntɔʼ kpahbe nʉa ojwɨɨ o nter bɨzima ndwe e bɨzima byɔɔ, toŋɔ mɨkam nko ntuntuma bʉr, yé a be e. É jɔʼ ntuntuma bʉr yaa, yé a bee njwɨɨ bɨzima nɨnɨ ndwe e bɨzima bye lé epyal ɨ, yé ze gwaʼ lé ebî Pol. 33No ó njwɨɨ bɨzima nɨnɨ a ze naʼ nye mobo é nyʉl, ntɔʼ dwe nkul ó, bé kaʼa nye e mɨkʉkob mɨmba. No ó nye a dî mbi mʉr nye a be e, ndwe e sa ebebe nye a pa kʉ sa ɛ. 34Baʼ bʉr o ntuntuma bʉr yaa, lɛɛ wɔɔ mbi; bʉʉ bʉr, lɛɛ wɔɔ mbi. Mpʉ njwɨɨ bɨzima waa a baabe e nkul egʉa sa yé a pa kʉ sa ó, bʉr diʼe é leŋe-leŋe no e, no ó nye a lɛɛ ó, bé toʼ e Pol é nkal bɨzima tʉŋlʉ#21.34 Nkal bɨzima waa a be ó, waa bʉr o Rom bé a fumo kunokuno e Mpah Zyɛm ɨ. Nye a jebɔ ó, Nkal bɨzima mo Antonia. É l'efu ó, mʉr niʼe tɨ, yé a jɨ ó, mʉr bera ebɨr.. 35É jɔʼ bé e Pol, bé a pyal é l'ebɨr e nkal bɨzima kʉ ɨ, empime, lé ntɔʼ bere bʉr é mɨleme. É jɔʼ bɨzima, byé a bee mpʉ bʉr baa, bé a kpɛl ó, bé sa ó jeele e, byé ntɔʼ nkɛɛ Pol é mobɛʼ mɔɔ, niŋlɔ nye é nkal, 36ebe, mpampaʼ bʉr o b'a du-du nye pihe e, bé a lɛɛ kʉ kʉ ó: «Jʉʼo ga nye!»

Pol lé ekar lɔb we

37Mpʉ njwɨɨ bɨzima nɨnɨ a niŋle Pol é nkal bɨzima ɛ, no ó Pol a lɛɛ e nye ó: «Zê me e nkul elɛɛ go yʉʉ sɔʼɔ ɛ?» Njwɨɨ bɨzima waa ze dî ó: «E! Zê go lé egʉa lwib grɛk ɛ? 38Ntʉʼ go ndɨ mʉr Egipten a soʼlo bʉr ó, bé saʼ bɨntʉ, waa a to e bɨzilngan otɔɔyin onâ é feha si ɨ?» 39Pol ze bɨha ó: «Hɨʼɨ, me ó Yʉden. Me a byɛl ó, Tarsʉs é lal Silisia. Nkana yam me a duho e, yé e buobuo kum. Me ejwɨʼla e go ó, go mɛʼla ó, me lwibɨ e bʉr.» 40Njwɨɨ bɨzima nɨnɨ ze mɛʼle. Pol ze cyɛb é l'ebɨr kʉ, ze peble bʉr mbo. É jɔʼ bʉr bɨbɛh, bé a be, bé mu é myeeŋ ɨ, Pol ze lwib e be é lwib arameyɛŋ.

Currently Selected:

Mɨlʉmlʉ 21: ozmBad

Highlight

Copy

Compare