Mɨlʉmlʉ 22

1Pol, nye ó: «Mbɛngɛɛ, obɨɔ bam e l'osɔŋ bam aa! Joʼla ga é mpʉ me mu lé ekomo nkar si é mih mɨn yi ɔɔ!»

2Njoʼa bé a joʼo nye lé elwib e be é lwib arameyɛŋ ɨ, bé ntɔʼ ze di é myeeŋ. No ó, Pol a ze lɛɛ e be ó: 3«Me ó Yʉden. Me a byɛl ó, Tarsʉs é lal Silisia. Me a ka ze lele mʉrʉm ó wâ. Me a be ó mwa sikʉlʉ mo Gamalyɛl. Nye ó b'a dwe me sikʉlʉ é mpʉ bɨna lé ejala le edu motie bɨmpam ga bina, byé a liʼe e. Leme wam, wé ó me é ntɨɨɨŋ ó, me dwiibɨ Zyɛm, jwɨʼ gwar e gwar mpʉ bɨn ndɨ nɨ, ze pyal é muh é dobo lɨ. 4É paʼ bʉr o b'a du-du Zi Tiʼ ɨ, me a si tíile be, to pyal é l'efie. Me a si naʼ bʉba e bʉrʉm mobo é nyʉl, cen be é mbʉʼ. 5Njwɨɨ opara, ndwe e sama otamabʉr, bé e nkul eboʼlo ó, sa me lé elɛɛ yi, yé ó cyecye. Bé ó b'a tile me kalara, ntɔʼ dwe me nya, ó me toʼ, to dwe obɨɔ ga bɨna, oYʉden ndɨ ɨ Damas ɨ. Me a be ó e jwɨʼ ó, me to ó mɛr obuʼla bé a be gʉʼ ɨ, bula e be mɨkɛʼa, ze e be Yerʉsalɛm é l'efu ó, bé kabɔ bɨntɨʼa wâ.»

Pol lé elɛɛ mpʉ nye a gwɨma mobebe me, le edwir leme e

6«Yé a be ó, me dina zi e zi, é jɔʼ me a be, me mu kunokuno e Damas ɨ, yé mu teme moho nɛʼɛ, mɨmbah, mpʉ mɨmbah mɨ dobo, myé a si kʉ pan jɔʼ gwar é tuuu. Myɛn wé a duho é jobo kʉ ɨ, wé a si ze kʉn gumo me a be e. 7No ó me a ze duma si, ze joʼo twii lé elɛɛ e me ó: “Sol, Sol! Ebe yé go lé epa kʉ tíile me mpʉnʉ nɨ ɨ?” 8Me ntɔʼ dî e nye ó: “Da, gwɔɔ, go zé?” Twii waa ntɔʼ bɨha ó: “Mɛm, me ó Yesʉs, mʉr Nazarɛt, waa go lé etíile e.” 9Bʉr o bɨh e boo nɔɔ, bé a be e, bé a si bee mɨmbah myaa. Sa gwar, bé a baajoʼo yɛɛ twii a lwib e me e. 10No ó me a ka dî ó: “Da, me lé ejala le esa nyá ɛ?” No ó, Da Yesʉs a lɛɛ e me ó: “Mʉŋa si. Toʼ Damas. Gʉʼ ó bé ólɛɛ go bim bɨsyɛɛla bibyɛh go lé ejala le esa ɛ.” 11É mpʉ me a be, me mu ntim ebe myɛn, wé a bul ŋmɛha me é mih ɨ, bʉr o nduo yam ntɔʼ mɛr me é mbo, toŋɔ e me Damas.

12«Nuu mʉr a be ó gʉ, die le Ananias. Nye a be ó lé edwaabe Zyɛm le ekʉ du motie ga mɨna. Nye a be é bul jwɨ̂ʼlɨ e bɨsa bɨ embɨa é l'oYʉden bé a be Damas ɨ. 13Nye a si ze gumo me a be e, ze cyɛb é mpɛɛna e me. Nye e me ó: “Mɨɔ wam Sol, beŋɨ!” É jɔʼ gwar yaa, mih mam ze bɔa. Me ntɔʼ bee nye. 14No ó nye a lɛɛ e me ó: “Da Zyɛm, Sɔŋ bɨmpam ga bina a bɛa pɛh go ó, go gʉŋa gwɨma ye, ó go beŋɨ waa ndɨ Cɨcyel Mʉr ɨ, ó go joʼa nteme nye lé elwib e nʉm we nye mʉr tɨ. 15Ebe, go óboʼlo-boʼlo lɔb we, le elɛɛ é mih mo bʉr bɨbɛh sa go a bee le ejoʼo e. 16No ó, banana, yé go lé eka bâʼle bono e? Mʉŋa si. Nʉŋa ndubo. Go à puba é nko paʼ mɨsyem myo, lé ejebe die le.”»

Pol lé elɛɛ mpʉ nye a lomɔ boo bʉr o ndɨ abe oYʉden ɨ

17«É jɔʼ me a bula Yerʉsalɛm ɨ, no ó, é mpʉ me a jwɨʼla-jwɨʼla é jahla bii mo Zyɛm tʉŋlʉ ɨ, me ze bee yʉʉ sa jehe é lima. 18Me a bee ó Da Yesʉs! Nye ze lɛɛ e me ó: “Saʼ kam e kam, go kpahba mʉa ɨ Yerʉsalɛm, ebe, bʉr o tɨ, bé aŋa mɛʼle mboʼla go óboʼlo, tiibe e me e.” 19No ó me a lɛɛ e nye ó: “Da, bé egʉa ó, me a si to é mompah mɨnjwɨʼla lé eto mɛr baa b'a jyɛʼ taa buʼo yɔɔ boo go e. Me a si gba bʉʉ é mbʉʼ, bîa bʉʉ. 20É jɔʼ bé a jʉ Etyɛn, mboʼla go e, me a be nteme ó tɨ. Bʉr o b'a jʉ nye e, bé a sa no ó, mɛm lé ekʉ mɛʼle syɛɛla yɔɔ yaa, ebe, me ó b'a baʼle mɨkan myɔɔ.” 21No ó Da Yesʉs a ka lɛɛ e me ó: “Toʼ, ebe, me muno ze cen go é l'ejaa, gumo bʉr o ndɨ abe oYʉden ndɨ ɨ.”»

Pol bé e njwɨɨ bɨzima nɨnɨ

22Ntuntuma bʉr yé a be tɨʼ ɨ, kʉ ze joʼlo Pol é puuu, to pyal é vula lwib. No ó bé a taare ebɨn motwii kʉ. Bé ó: «Jʉʼo mʉr nwa. Nye ajala le eka tiʼe é si nwa!» 23Bé ze bɨn motwii mɔɔ kʉ, le eguhɔ mɨlen mɨ okʉr myɔɔ si e si, lé enʉŋɔ pim, loʼlɔ nye kʉ e kʉ. 24No ó njwɨɨ bɨzima nɨnɨ a lɛɛ ó, bé niŋla Pol é nkal bɨzima tʉŋlʉ, ó bé fuura nye mɨmbihe. Bé a jwɨʼ ó, ǃbé si fuura nye mɨmbihe nɛʼɛ, nye òlɛɛ be sa pa kʉ sa ó ntuntuma bʉr, yé lwibɨ okʉkʉ bim nɨ ɨ. 25Jɔʼ bé a sil kaʼ nye e mɨkol ó, bé fuura nye mɨmbihe e, Pol ze lɛɛ e njwɨɨ nter bɨzima a cyɛb é l'empàh ó: «Zê etie ga lɨna bʉr o Rom, lé akamle ó, go fuura me mɨmbihe é jɔʼ me l'apa kar é mih me olɔ̀b, olɔ̀b l'apa nʉa etiʼ ɨ?» 26É jɔʼ njwɨɨ nter bɨzima waa a joʼo no e, nye ntɔʼ lɛɛ e njwɨɨ bɨzima nɨnɨ ó: «Go sa nyá ɛ? Mʉr nwa, nye ó mʉr Rom!» 27No ó, njwɨɨ bɨzima nɨnɨ a ze kunokuno e Pol, ntɔʼ dî e nye ó: «Lɛŋɨ me: go ó mʉr Rom ɨ?» No ó, Pol a bɨha e nye ó: «Eee!» 28No ó, njwɨɨ bɨzima nɨnɨ waa a ka lɛɛ ó: «Me a jɛna bwaʼbwaʼ tɔɔ é l'efu ó, me diʼe mʉr Rom.» No ó, Pol a bɨha e nye ó: «Mɛm, me ó kʉ be mʉr Rom.»

29Cye e cye yaa, bʉr, bé o b'a ngbaa bî nye é l'efu ó, nye lwibɨ ɨ, bé ntɔʼ kpahbe duho é gumo nye a be e. Njwɨɨ bɨzima nɨnɨ nye mʉr tɨ, nye ze joʼo bʉa é jɔʼ nye a gʉa ó, Pol a byɛl ó mʉr Rom, gʉa nteme ó, nyi bana kaʼɔ nye e mɨkʉkob ɨ.

Pol lé ekar é mih mo Bʉm Nɨnɨ oYʉden

30É mɛn tɨ, njwɨɨ bɨzima nɨnɨ waa ze tiʼe é leme we ó, nye gʉŋa sa yé a pa kʉ sa ó, oYʉden, bé purɨ Pol bim yaa ɛ. Ebe no ó nye a tii nye mɨkʉkob é mɛn tɨʼ ɨ. Nye ze lɛɛ e l'ojwɨɨ be opara ndwe e bʉr o Bʉm Nɨnɨ bɨbɛh ó, bé gwɨhla. Nye ze to e Pol é gumo bé a be e, ze cyel nye tɨ, ó nye kara lɔb we.

Currently Selected:

Mɨlʉmlʉ 22: ozmBad

Highlight

Copy

Compare