Mɨlʉmlʉ 3

Mʉr a byɛl e jyɛm ɨ, nyi tiʼe

1É yʉʉ bii kʉʼ é mowala molɛl, Pyɛr bé e Yʉanes, bé a be ó, bé to ó é jahla bii mo Zyɛm, lé eto sa mɨnjwɨʼla. 2Yé ó e lʉʉ ebe lé ndɨ ejebɔ ó, Jaa ebe e. É nkpah ebe laa, yé a be ó e nuu mʉr a byɛl e mokʉ é fwam-fwam ɨ. Dobo lɨlɛh, nye a be ó lé enkɛɔ-nkɛɔ, to jyɛʼɔ-jyɛʼɔ é nkpah ebe laa ó, nye dɨʼe bono bʉr o b'a to dɨ bere é jahla bii mo Zyɛm ɨ. Nye a dɨ sa ó, pyɛh-pyɛh be mobo. 3Ngbaa le eka be, Pyɛr bé e Yʉanes mu lé edihle é l'ebe e jahla bii mo Zyɛm nɛʼɛ, mʉr waa ze bee Pyɛr bé e Yʉanes, nye ntɔʼ taare njɔʼ. 4Pyɛr bé e Yʉanes ze dwɛʼɔ nye é tʉʉʉŋ. Pyɛr, nye e nye ó: «Gʉa dwɛʼ bɨh!» 5Mʉr nɨ ntɔʼ kʉ ze dwɛʼ be é tʉʉʉŋ, lé ebono ó, bé ódwe nye yʉʉ sɔʼɔ. 6Pyɛr ze lɛɛ e nye ó: «Me abe e mɔn, nkʉ gol. No ó, sa me ndɨ e ye ó, me dweʼ go e, yé ó: Kœʼœ é nkul die mo Yesʉs-Krɨst, mʉr Nazarɛt#3.6 Myʉʉ mɨnjʉ̌m mɨtila mɨ lwib grɛk myɛɛ, myé elɛɛ ó: «Mʉŋa si, Kœʼœ...,».»

7Nye ze mɛr nye é mbo ejʉm, gbɛl nye si. Cye e cye yaa, mokʉ ndwe e bɨntine bye, byé ntɔʼ sa mbɨmbɨa. 8Mʉr waa ntɔʼ mʉa si é bʉ, cyɛb cɨcyel, ze taare lé ekœʼ. Bé e mɨlʉmlʉ ze bere é jahla bii mo Zyɛm, nyɛɛ lé ekœʼ, le elyah, le egumlo Zyɛm. 9No ó mpʉ bʉr bɨbɛh bé a bee nye lé ekœʼ le egumlo Zyɛm ɨ, 10bé ntɔʼ dweʼe nye, le egʉa ó, yé ó mʉr a di-di é Jaa ebe é l'ebere e jahla bii mo Zyɛm, a be-be lé epyɛh bʉr mobo e. Bɨbɛh ntɔʼ jehe sa yé a syɛɛlɨ é mʉr waa ɛ. 11Ntuntuma bʉr ze nkɔŋa e mɨkam lé eto é sikuo yé a dweŋɔ die mo Salomɔŋ ɨ, lé eto beɔ Pyɛr bé e Yʉanes, ndwe e mʉr nɨ, nye mu lé enara e be. Bé a be ó lé ejehe lɔb waa mɨnʉm mɨmbeʼ.

Pyɛr lé elwib é jahla bii mo Zyɛm

12Pyɛr ze bee, nye ntɔʼ dî e be ó: «Mbɛngɛɛ! Bɨn bwa b'Ɨzraɛl ɔɔ! Ebe yé bɨn lé etwɨra mpʉ mʉr nwaʼ tiʼɔ ɛ? Ebe yé bɨn lé edwɛʼ bɨh é tʉʉʉŋ mpʉnʉ, le esa mpʉ sa lɛɛ ó, nye kœʼ ó, ebe nkul wih, nkʉ ebe bɨh ó ndɨ é bul dwaabe Zyɛm ɨ? 13Nyi tiʼɔ mpʉnʉ ó, ebe Zyɛm mo Abraham, e Ɨzak ndwe e Yakɔb ndwe e bɨmpam ga bɨna. Nyɛɛ be ó si kpɛl ó, nye dwiibɨ syɛl mosa we Yesʉs. Bɨn bɛɛ, bé a si kɛha nye, ntɛŋɔ nye é mobo mo Pilat ó, nye jʉʼo nye. Bɨn bé a kɛha nye no ó, Pilat#3.13 Pilat a be ó mʉr Rom. Nye a lomɔ é lal oYʉden ó, nye diʼe ngoman wɔɔ. Nye a be ó syɛl mosa mo Kɛɛza. Nye ome ó b'a be e nkul ejʉ bʉr o b'a ntaa motie e., nye osi tiʼe é leme we ó, nye bir ó nye. 14Bɨn bé a bana ó, kɛha mʉr nyoonkan a baagʉa lɔb, waa ndɨ ti ɨ, ze dî e Pilat ó, nye birɨ bɨn mʉrʉm fih, waa a be njʉl bʉr ɨ. 15Bɨn ó b'a jʉ Etin e tiʼ; Zyɛm nyɛɛ ntɔʼ pɛ̀h nye é foo. Bɨh ó ndɨ eliʼ boʼlo lɔb waa. 16Mʉr nwa, waa bɨn lé ebee le ebɛa gʉa ɛ, nye be ó si jyɛʼ taa buʼo ye boo Yesʉs. Die mo mʉr waa, bé e buʼo Yesʉs lé entɨh bʉr ɨ, byé ô sa ó, nye diʼe kʉ be mbɨmbɨa mpʉ bɨn bɨbɛh lé ebee nye naa nɨ.

17«Obɨɔ ga bam aa! Me egʉa ó, bɨn ndwe e l'otamabʉr bɨn, bé a gʉʼla ó gʉʼla é lɔb mo Yesʉs, é jɔʼ bɨn bé a sa nye no e. 18To kœb ó, é mbi nɨ ó Zyɛm a bir ó, bʉr saʼ syɛɛla ebebe nye a bɛa lɛɛ ó, bé ósa ɛ. Yé ntɔʼ syɛɛ no ó, lé edira mɨlɔɔ nye a bɛa lɛɛ é mɨnʉm mɨ ogwiha o mɨlɔb be ó, Lœma mulo mo Zyɛm ósia e mɨtuu no, nye ntɔʼ dwè. 19No ó, gwɨma ga mobebe mɨn. Bɨn bé à dwibra nko Zyɛm ndɨ ɨ, nye nkʉʼ pɛʼ bɨbaa bɨ ebebe nye a niʼe é lɔb mɨsyem min ɨ. 20É jɔʼ yaa ó Da óka dwe bɨn zi ó, bɨn e boo nɔɔ tiʼa é motala ɛ. Nye òntɨh bɨn Lœma mulo mo Zyɛm, waa nye a bɛa pɛh é lɔb win ɨ. No, yé ó Yesʉs! 21Banana, nye ejala le edi é jobo kʉ, é di di di, to pyal é jɔʼ Zyɛm óbâʼle cyel bɨsa bibyɛh é bɨcye byɔɔ, mpʉ nye a bɛa kɛʼ, duho mya, é zi mɨsaŋ mɨ ogwiha o mɨlɔb mye e. 22Moyiz a lɛɛ ó: “Da Zyɛm win, nye ólomlo bɨn ngwiha mɨlɔb mpʉ mo me, lé epɛh é l'esama le obɨɔ bɨn tʉŋlʉ. Nye óbe ó mʉr kul ga yina. Sa yiyɛh nye ólɛɛ bɨn ɨ, bɨn bé à sa ye#3.22 Motie 18.15. 23Mʉr nyiwɛh óbe, asa ngwiha mɨlɔb waa mojoʼo e, nye ópɛʼɔ é kul ga yina, jʉŋɔ.”

24«Taare é Samuɛl, to pyal é l'ogwiha o mɨlɔb bɨbɛh, bim bé a lwib ɨ, bé a lwib-lwib ó, tiibe e bɨsa lé esyɛɛlɨ é molu maʼ ɛ. 25Bɨn bɛɛ ó ndɨ e nkɔb é monkɛʼ Zyɛm a bɛa liʼe bʉr be e ma ɛ, ntɔʼ fol, ogwiha o mɨlɔb bɛɛ ntɔʼ ka gwih ɨ. Bɨn nteme, bé e nkɔb é mpʉn Zyɛm a de e bɨmpam ga bina ɛ. Nye a lɛɛ e Abraham ó: “Bim mɨmbɛr mɨ bʉr ndɨ é si nwaʼ ɛ, me ósʉ mye mocyɛʼ mo mpom ó, ebe nta go.” 26No ó, é jɔʼ Zyɛm a ka lomo syɛl mosa we e, nye a taare lomo nye ó, bɨn ye, ó nye sʉʼo bɨn mocyɛʼ mo mpom me, le esa ó, mʉr nyiwɛh é sama yin, nye gwaʼa bɨsyɛɛla bɨ ebebe bye bibyɛh.»

Currently Selected:

Mɨlʉmlʉ 3: ozmBad

Highlight

Copy

Compare