Rôm 5

Mɨná gá e Nzyɛ̌m mû ó twíí

1Nzyɛ̌m á be ɨ́ dwe mɨ́ná gá nkam ɨ́ lɔ̌b búʼó gá yɨ́ná. Sá tɨ̂ʼ ó mɨ́ná gá e Nzyɛ̌m mû mbɨ̂mbɨá ɨ́ nzɨ̌ Tî gá wɨ́ná, Yésʉs-Krîst yɨ́. 2Yésʉs-Krîst ó b'á kar nzɨ̌ lɨ́ esú ó, mɨná kúmaa gá ɨ́ mpam mé Nzyɛ̌m, le etyɛ̂b mékʉ̌ sí ɨ́ sɨ́ŋ ɨ́ lɔ̌b mpûʼla mɨ́ná dí gá e né nyɨ́. Nyɨ́ lɛ̂ʼle mɨ́ná gá mpam mɨ́ná ngá titiʼe gá e tɨ̂ʼ nyɨ́. Mɨná mû ó lɨ́ enkʉ́na gá ɨ́ lɔ̌b mpûʼla dí mɨná gá ɨ́ miléme, nyaá dí elɛ́ɛ ó, mɨná bé óbee gá Nzyɛ̌m ɨ́ diá kûm yé nyɨ́. 3Damá jóʼo mítúú mɨ́ná dí esia gá e myé mí, mɨná bé lɨ́ ekʉ́ bánǎ nkʉ́na gâ, ebě, mɨná bé lɨ́ egʉ́a gá ó, baá o dí esia e mitúú bá, bé ójɨ̂ʼ bíhwó tɨ̂. 4Jɔʼ mɨ́ná ódi gá e bíhwó nyaá ɨ́ di di di yɨ́, mɨná bé otyɛ̂b gá ɨ́ píʼi ɨ́ mebʉ́blá. Mɨ́ná óbóblɔɔ gá, aduma nó, miléme gá míná, myé ólóno ɨ́ mpûʼla. 5Lémé mʉ̂r, wé óbe, wé mû sí lóno ɨ́ mpûʼla nó, mʉr waá, nye ájóʼo bá sôn ɨ́ lɔ̌b mpûʼla nyé, ebě, Nzyɛ̌m á si lɛ̂ʼle mɨná gá mpʉ nyé dí ekpɛl mɨ́ná gá kpɛ̌l ápurapúra yɨ́. Nye á lɛ̂ʼle mɨná gá nó ó e nzɨ̌ Sísǐm wé, nyé á ntɨh mɨná gá wɨ́.

6Sá mé dí elɛ́ɛ yɨ̂ʼ, yé ó: mélú mé épíhe, mɨná bé á be gá ó, onzwoó. Jɔʼ yaá ó Krîst á nze ka búra e mɨná gâ, minjéʼe-Nzyɛ̌m yɨ́. Nye á dwe ó, ɨ́ mpǎŋ jɔ̌ʼ Nzyɛ̌m á boo pɛ̂h yɨ́. 7Mɨná bé lɨ́ egʉ́a gá ó, yé ɨ́ buú kɔbla ó, nyʉ́ʉ́ mʉ̂r kámaa ó, nye búraa e mʉr swîh, mʉr waá damá bě tîtyěl mʉr. Damá jóʼo nó, nyʉ́ʉ́ mʉ̂r óbɛ̌m tíʼe ɨ́ lémé wé ó, nyě búrá ó e mʉr á bu lɛ̂ʼle bʉr mpam nyá. 8Yésʉs-Krîst nyɨɛ á búra e mɨná gá ó, ɨ́ jɔʼ mɨ́ná bé á be gá osyɛ̂l o mísyóm yɨ́. Nó ó Nzyɛ̌m dí elɛ̂ʼle mɨ́ná gá kpɛ̌l yé yɨ́. 9Yésʉs pǎ nyɛɛ́ pyêl métié mé, ntɔ̂ʼ dwe lɨ́ esú ó, nye dwêʼ mɨná gá, osyɛ̂l o mísyóm, nkam, á dwɛʼra ɨ́ jɔʼ mɨ́ná gá mû otîtyěl o bʉ̂r ɨ́ míh mé Nzyɛ̌m yɨ́! Nye ókʉ́ tiʼ mɨ́ná gá ɨ́ jɔ̌ʼ Nzyɛ̌m ngá lɛ̂ʼle nkpáa nyé ɨ́ lɔ̌b bʉ́ʉ́ bʉ̂r yɨ́. 10Jɔʼ mɨ́ná bé á be gá ontɨ̂m le obɨn mé Nzyɛ̌m yɨ́, Mwân mé Nzyɛ̌m á si dwe lɨ́ esú gá lɨ́ná, lɨ́ esâ sáá páʼ gá nyɨ́ná e Nzyɛ̌m Sɔ́ŋ. Krîst pǎ nyɛɛ́ cwɨ́a le ontɨ̂m le obɨn bé, á dwɛʼra e mɨná gâ, bʉr o sáá nyaá! Nzyɛ̌m ókʉ́ tiʼ mɨ́ná gá e nzɨ̌ twiʼ mé Yésʉs-Krîst, Mwân wé. 11Yé abě njɨ nó, yé omér: mɨná mû nkʉ́na gá ntémé ɨ́ míh mé Nzyɛ̌m ó, ɨ́ lɔ̌b mé Tî gá wɨ́ná, Yésʉs-Krîst. Nye ó b'á sâ saá ɨ́ jɔʼ yɨ̂, páʼ gá nyɨ́ná e Nzyɛ̌m.

12Nó ó, syóm, wé á nze ɨ́ sí yɨ̂ʼ ó, tɨ̂ ɨ́ mʉr ngwár. Syóm waá nzě dulo éswie ɨ́ bʉr. Eswie laá ntɔ̂ʼ mɛ̂r bʉ̂r bɨ́bɛ̂h, ebě, bʉr bɨ́bɛ̂h, bé á si sâ misyóm. 13Bʉr, bé á si boo nyɛl esâ syóm ɨ́ sí yɨ̂, Nzyɛ̌m dína apǎ tyêl bé metié nkʉ̂ mempéné. Sâ gwár, Nzyɛ̌m á nyɛɛ be ó, abuú gbâ mísyóm myaá ɨ́ nkɔb ɨ́ jɔʼ yaá, ebě, yé á bé abe e mempéné mé á gwa kamle misyóm. 14Damá jóʼo nó, táare ɨ́ jɔʼ mé Ádam, nzě pyâl ɨ́ jɔʼ mé Moyɨ̂z, eswie, lé á be lɨ́ ejwɨ́ɨ mʉ̂r nyɨnyɛ̂h. Yê tyeetye ó, ntʉ bʉ̂r bɨ́bɛ̂h bé á sâ syóm mpʉ̌ Ádam. Damá jóʼo nó, eswie, lé á be lɨ́ ejwɨ́ɨ bé ntémé. Ádam, nyě mveʼlé ó mʉ̌r Nzyɛ̌m á tíʼe ɨ́ lémé wé ó, nyě ntɨ̌h ó nye nyá. 15Sâ gwár, syɛ́ɛla ébébe mé Ádam yaá, yé abě mpʉ̌ ndwéá Nzyɛ̌m dí edwe bʉ̂r edwɛ́na wɨ́. Bébebébe syɛ́ɛla mʉ̂r ngwár á sâ yɨ́, yé á si sâ ó, bʉr dwêʼ ɨ́ buo buo. Syɛ́ɛla mé Ádam pǎ nyɛɛ́ céne bʉ̂r ɨ́ buo buo, á dwɛʼra e yaá nyʉ́ʉ́ mʉ̂r ngwár, Yésʉs-Krîst, á sâ yɨ́! Nye á si cwɨ́a e bʉr ɨ́ buo buo. Nye mû ó waá dí elɛ̂ʼle mɨ́ná gá mpam mé Nzyɛ̌m, waá dí entɨh mɨ́ná gá ndwéá wé nyá. 16Ndwéá mé Nzyɛ̌m, wé anwɨɨla e syóm Ádam á sâ wɨ́. Ɨ́ jɔ̌ʼ Nzyɛ̌m á niʼe Ádam baa ébébe tɨ̂ʼ yɨ́, nye ntɔ̂ʼ dwe bé e dyɛɛ́ yé yɨ́yɛ̂h mebě me jálá le eswie má. Tó kœb ó, ndwéá mé Nzyɛ̌m, wé á ntɨhɔɔ mɨná gá ó, píe bisyɛ́ɛla bí ébébe ɨ́ buo buo. Nzyɛ̌m nzě dwe bʉ̂r ɨ́ buo buo nkam ɨ́ míh mé ɨ́ lɔ̌b ndwéá ngwár e ngwár waá. 17Mʉr ngwár pǎ nyɛɛ́ sâ syóm, eswie ntɔ̂ʼ jwɨ́ɨ bʉ̂r bɨ́bɛ̂h, tɨ̂ ɨ́ mʉr ngwár waá, á dwɛʼra e syɛ́ɛla nyʉ́ʉ́ mʉ̂r ngwár, Yésʉs-Krîst, á sâ yɨ́! Syɛ́ɛla yé yaá ó dí esâ ó, Nzyɛ̌m lɛ̂ʼlaa bʉr mpam, le edwe bé nkam edwɛ́na yɨ́. Bʉr o dí edweŋɔɔ nkâm ɨ́ nzɨ̌ nyé bá, bé lɨ́ ebi ntémé ó, twǐʼ njʉ̌m dǐ, ndu e l'edilɔɔ ɨ́ mecwɨ́ɨ́ mé jwɨ́ɨ́ yɔ́ɔ́.

18Mpʉ bʉ̂r bɨ́bɛ̂h, bé á dweŋɔɔ mebě, tɨ̂ e misyóm mí mʉ̂r ngwár yɨ́, jwɨʼ gwár e gwár yaá ntémé ó, syɛ́ɛla mpâ mʉ̂r ngwár á sâ yɨ́, ngá sâ ó, bʉr bíʼee nkam yɨ́. Bé ónî ɨ́ twiʼ. 19Jwɨʼ gwár mpʉ mʉ̂r ngwár á sâ ebɨ̌h, Nzyɛ̌m ntɔ̂ʼ láa ó, bʉr ɨ́ buo buo, bé mû ó osyɛ̂l o mísyóm yɨ́, jwɨʼ gwár e gwár yaá ntémé ó, mʉ̂r ngwár á sâ Nzyɛ̌m mejóʼo, Nzyɛ̌m ntɔ̂ʼ láa ó, bʉr ɨ́ buo buo, bé ó otîtyěl o bʉ̂r yɨ́. 20Nzyɛ̌m á tyêl bʉr metié ó, lɨ́ esú ó, syóm, wé myɛ́maa. Syóm dí e bʉr wɨ́, wê nzě tô le emyaŋla. Damá be ó yé á si syɛ́ɛlɨ nó, ɨ́ jɔʼ gwár e gwár yaá ntémé ó Nzyɛ̌m á bu lɛ̂ʼle bʉr mpam nyé yɨ́. 21Jwɨʼ gwár mpʉ̌ syóm, wé á njwɨ́ɨbʉr, ntɔ̂ʼ jʉ̂ bé yɨ́, jwɨʼ gwár yaá ntémé ó mpam mé Nzyɛ̌m dí ejwɨ́ɨ mɨ́ná gá yɨ́. Nye lɨ́ edwe mɨ́ná gá nkam ɨ́ míh mé Nzyɛ̌m, le ekɛl mɨ́ná gá twǐʼ njʉ̌m dǐ ɨ́ lɔ̌b Yésʉs-Krîst, Tî gá wɨ́ná.

Currently Selected:

Rôm 5: ozm

Highlight

Copy