Popular Bible Verses from Rôm 5

Share

Yésʉs-Krîst nyɨɛ á búra e mɨná gá ó, ɨ́ jɔʼ mɨ́ná bé á be gá osyɛ̂l o mísyóm yɨ́. Nó ó Nzyɛ̌m dí elɛ̂ʼle mɨ́ná gá kpɛ̌l yé yɨ́.

Lémé mʉ̂r, wé óbe, wé mû sí lóno ɨ́ mpûʼla nó, mʉr waá, nye ájóʼo bá sôn ɨ́ lɔ̌b mpûʼla nyé, ebě, Nzyɛ̌m á si lɛ̂ʼle mɨná gá mpʉ nyé dí ekpɛl mɨ́ná gá kpɛ̌l ápurapúra yɨ́. Nye á lɛ̂ʼle mɨná gá nó ó e nzɨ̌ Sísǐm wé, nyé á ntɨh mɨná gá wɨ́.

Damá jóʼo mítúú mɨ́ná dí esia gá e myé mí, mɨná bé lɨ́ ekʉ́ bánǎ nkʉ́na gâ, ebě, mɨná bé lɨ́ egʉ́a gá ó, baá o dí esia e mitúú bá, bé ójɨ̂ʼ bíhwó tɨ̂. Jɔʼ mɨ́ná ódi gá e bíhwó nyaá ɨ́ di di di yɨ́, mɨná bé otyɛ̂b gá ɨ́ píʼi ɨ́ mebʉ́blá. Mɨ́ná óbóblɔɔ gá, aduma nó, miléme gá míná, myé ólóno ɨ́ mpûʼla.

Nzyɛ̌m á be ɨ́ dwe mɨ́ná gá nkam ɨ́ lɔ̌b búʼó gá yɨ́ná. Sá tɨ̂ʼ ó mɨ́ná gá e Nzyɛ̌m mû mbɨ̂mbɨá ɨ́ nzɨ̌ Tî gá wɨ́ná, Yésʉs-Krîst yɨ́. Yésʉs-Krîst ó b'á kar nzɨ̌ lɨ́ esú ó, mɨná kúmaa gá ɨ́ mpam mé Nzyɛ̌m, le etyɛ̂b mékʉ̌ sí ɨ́ sɨ́ŋ ɨ́ lɔ̌b mpûʼla mɨ́ná dí gá e né nyɨ́. Nyɨ́ lɛ̂ʼle mɨ́ná gá mpam mɨ́ná ngá titiʼe gá e tɨ̂ʼ nyɨ́. Mɨná mû ó lɨ́ enkʉ́na gá ɨ́ lɔ̌b mpûʼla dí mɨná gá ɨ́ miléme, nyaá dí elɛ́ɛ ó, mɨná bé óbee gá Nzyɛ̌m ɨ́ diá kûm yé nyɨ́.

Sá mé dí elɛ́ɛ yɨ̂ʼ, yé ó: mélú mé épíhe, mɨná bé á be gá ó, onzwoó. Jɔʼ yaá ó Krîst á nze ka búra e mɨná gâ, minjéʼe-Nzyɛ̌m yɨ́. Nye á dwe ó, ɨ́ mpǎŋ jɔ̌ʼ Nzyɛ̌m á boo pɛ̂h yɨ́.

Yésʉs pǎ nyɛɛ́ pyêl métié mé, ntɔ̂ʼ dwe lɨ́ esú ó, nye dwêʼ mɨná gá, osyɛ̂l o mísyóm, nkam, á dwɛʼra ɨ́ jɔʼ mɨ́ná gá mû otîtyěl o bʉ̂r ɨ́ míh mé Nzyɛ̌m yɨ́! Nye ókʉ́ tiʼ mɨ́ná gá ɨ́ jɔ̌ʼ Nzyɛ̌m ngá lɛ̂ʼle nkpáa nyé ɨ́ lɔ̌b bʉ́ʉ́ bʉ̂r yɨ́.

Jwɨʼ gwár mpʉ mʉ̂r ngwár á sâ ebɨ̌h, Nzyɛ̌m ntɔ̂ʼ láa ó, bʉr ɨ́ buo buo, bé mû ó osyɛ̂l o mísyóm yɨ́, jwɨʼ gwár e gwár yaá ntémé ó, mʉ̂r ngwár á sâ Nzyɛ̌m mejóʼo, Nzyɛ̌m ntɔ̂ʼ láa ó, bʉr ɨ́ buo buo, bé ó otîtyěl o bʉ̂r yɨ́.

Yé abě njɨ nó, yé omér: mɨná mû nkʉ́na gá ntémé ɨ́ míh mé Nzyɛ̌m ó, ɨ́ lɔ̌b mé Tî gá wɨ́ná, Yésʉs-Krîst. Nye ó b'á sâ saá ɨ́ jɔʼ yɨ̂, páʼ gá nyɨ́ná e Nzyɛ̌m.