Rôm 10
10
1Bɨ́ɔɔ́ bâm! Okɛ́l bâm! Lémé wâm, wé lɨ́ ekʉ́ gwɨ̂m; me ntémé, me lɨ́ ejɨʼla e Nzyɛ̌m lɨ́ esú ó, oYúden ntáa bǐ twǐʼ njʉ̌m dǐ. 2Mě lɛ́ɛ́ bɨ́n ɨ́ páʼ wɔ́ɔ́ ó, mpǎŋ gwɨ́má yɔ́ɔ́, yé ó, bé nkʉ̂ buú dû Nzyɛ̌m. Bé agʉ́a yɨ́ɛ mpaŋ nzɨ́ bé jálá le edû nyɨ́. 3Bé á si jéʼe nzɨ̌ Nzyɛ̌m á tíʼe ɨ́ lémé wé ó, nyě kǎr ó bé nyǎ, ó bé ócɨɨ tɨ̂, bé obi nkâm tɨ̂ʼ nyɨ́. Bé á jaa sáa njɨ ó, bé káraa nyɔ́ɔ́ nzɨ́. Nó ó bé á gbɔba e Nzyɛ̌m, lɨ́ esú ó, bé bíʼee nkam lɨ́ ecɨɨ ɨ́ nzɨ̌ bɨ́ɛ bé bʉr o tɨ̂ʼ, bé á kar nyɨ́. 4Mě lwib nó ó, ebě, Krîst á si gbâ nkǎ-ti ɨ́ nzɨ̌ metié, lɨ́ ekamle bʉ̂r lɨ́ ebáʼǎ cɨɨ tɨ̂. Nye á sâ nó ó, lɨ́ esú é bʉ̂r o ngá bi nkâm ɨ́ míh mé Nzyɛ̌m bá, bé díʼee baá bɨ́bɛ̂h dí edyɛ̂ʼwo e né bá.
Nzyɛ̌m tiʼ ó, baá bɨ́bɛ̂h dí edyɛ̂ʼwo e Yésʉs bá
5Moyɨ̂z á si cɛma, dumo e nzɨ̌ ebi nkâm ɨ́ mbaʼlá métié ó: «Waá nyɨnyɛ̂h dí ebaʼle métié nyá, óbǐ twiʼ ó, ɨ́ metié maá.» 6Tó kœb ó, yé e nzɨ̌ swîh ebi nkâm ɨ́ míh mé Nzyɛ̌m. Bʉr o dí ebúʼla nyé bá, bé ó dí ecɨɨ tɨ̂, ntɔ̂ʼ bi nkâm nyaá mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá alɛ́ɛ ɨ́ lémé gô tʉ́ŋlʉ̌ ó: Nzé óbére ɨ́ jʉ́o kʉ́? (Nó yé lɛ́ɛ́ ó: mʉ̌r sá apahle ó, yé e nyʉ́ʉ́ mʉ̂r óbére ɨ́ jʉ́o kʉ́, lɨ́ etó jébě Krîst, ó nye súlaa sí nyá.) 7Bé á cɛma ntémé ó: «Sá akǎ lɛ́ɛ ntémé ɨ́ lémé gô tʉ́ŋlʉ̌ ó: “Nzé ósulo wâʼ ɨ́ sí yɨ̂, tó pyâl ɨ́ kwár odwe ě?” (Nó yé lɛ́ɛ́ ó, mʉ̌r sá apahle ó, yé e nyʉ́ʉ́ mʉ̂r ótó kœ̌b Krîst ɨ́ gúmó ódwe dí yɨ́, ntɔ̂ʼ búla e né gʉ̂ʼ nyá.) 8Mekaná mé Nzyɛ̌m mɨ́ɛ lɛ́ɛ́ ó: Lɔ́ɔ́ mé Nzyɛ̌m, wé ó bǎʼ e go. Wé ó, ɨ́ num gô tʉ́ŋlʉ̌. Wé ó dí ɨ́ lémé gô tʉ́ŋlʉ̌ wɨ́. Lɔ́ɔ́ ngwár e ngwár waá, wé ó waá bɨ́h dí etúno ó, bʉr bûʼlaa wé wɨ̂. 9Mekaná mé Nzyɛ̌m, mé lɛ́ɛ́ ó: gó ólɛ́ɛ ɨ́ num gô go mʉr tɨ̂ʼ ó, «Yésʉs ó dí Njwɨ́ɨ!» le ebúʼla tʉ́ŋlʉ̌ lémé gô ó, Nzyɛ̌m á si pɛh nye lɨ́ odwe nó, nye ódwe gó twǐʼ njʉ̌m dǐ. 10Mʉ̂r dyɛ́ʼwó e Yésʉs ɨ́ lémé wé nó, nye óbi nkâm ɨ́ míh mé Nzyɛ̌m. Mʉ̂r lɛ́ɛ́ ɨ́ num wé ó: «Yésʉs ó dí Njwɨ́ɨ!» nó, Nzyɛ̌m ódwe nyé twǐʼ njʉ̌m dǐ. 11Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Mʉr nyɨnyɛ̂h ngá dyɛ̂ʼwo e né nyá, nye ásɔ́ma.
12Ebě, mbɔ́ʼ, wé abe páʼ oYúden, bé e bʉr o dí abe óYúden bá. Bɨ́bɛ̂h, bé e Njwɨ́ɨ ngwár. Baá dí ekɛn díé lé bá, nye lɨ́ elɛ̂ʼle bé bɨ́bɛ̂h mpam nyé. 13Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Mʉr nyɨnyɛ̂h ókɛn díé mé Dâ Nzyɛ̌m nyá, óbǐ twǐʼ njʉ̌m dǐ.
14Sâ gwár, bé ókɛn mʉ̂r bé á be adyêʼ koo e né nyá e nyáa nzɨ́? Nó ó, bé ódyɛ̂ʼwo e waá bé á be ajóʼo díé lé nyá e nyáa nzɨ́? Bé ójóʼo díe laá, abe e mʉr túnó bé lǎ, e nyáa nzɨ́? 15Bʉ̂r bé óbe, antɨhɔɔ nó, mʉr á gwa tô ɨ́ túnó waá nyá, á gwa tô le etúno wé náǎ e nyáa nkûl? Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:
Á mbɨa lɨ́ ebee bʉ̂r o dí enze
le etúnǒ Mbɨambɨa Lɔ́ɔ bá ɛ̌!
16Ɨ́ jɔʼ óYúden, bé á jóʼo Mbɨambɨa Lɔ́ɔ, le esâ Nzyɛ̌m mejóʼo yɨ́, ntʉ bɨ́bɛ̂h bé á sâ nó. Ngwíha milɔ̌b Ésayie mʉr tɨ̂ʼ á lɛ́ɛ ó: Dâ ɛ̌, nzé á bûʼla lɔ́ɔ bɨ́h á lɛ́ɛ bé wɨ́?
17Nó ó, gʉ́ŋáá gá ó, jɔʼ mʉ̂r dyɛ́ʼwá e Krîst yɨ́, yé duho ó, ɨ́ sá nyé á jóʼo yɨ́. Njóʼá wé waá, wé duho ó, lɨ́ ekǎn bé dí elɛ́ɛ nyé, dumo e Krîst lɨ́.
18Nó ó, mě dí ó nɛ́ɛ: «Nzê oYúden bɨ́ɛ, bé á bé ajóʼǒ lɔ́ɔ waá ɛ́?» Eee, bé á si gwa kʉ jóʼo wê. Yé ó mpʉ bé á cɛma ɨ́ Mekaná mé Nzyɛ̌m yɨ́. Yê cɛmá ó:
Bʉr, bé á be ɨ́ tô le etúnǒ gúmó yɨ́yɛ̂h,
mecwíí mɔ́ɔ́ jwɨ̂ʼ ɨ́ sí yɨ́yɛ̂h,
tó pyâl ɨ́ medumo mé sí mɨ́mɛ̂h.
19Nó ó, me lɨ́ ebáʼǎ dî ó: «Nzê oYúden, bé á bé agwá gʉ́a ɛ̌?» Eee, bé á be yɨ́ɛ ó, sí kʉ́ jóʼo. Moyɨ̂z á boo lɛ́ɛ ó:
Nzyɛ̌m lɛ́ɛ́ ó:
Me ósâ bɨ́n mbi dí ó,
bɨ̌n sâʼ egú e bʉr o bíkúl bíswîh.
Me ókóblo bɨ́n ebúʼ
e nzɨ̌ bʉr o dí ɨ́ sí bígʉʼlʉgʉ́, dí elúʼo pɨ̂ʼ bá.
20Píe tɨ̂, ngwíha milɔ̌b Ésayie á bana kʉ lɛ́ɛ, ajóʼo bʉ́á ó:
«Nzyɛ̌m lɛ́ɛ́ ó:
Bʉr o b'á be asáa me bá, bɨ́ɛ ó b'á bee me.
Me á si lɛ̂ʼle me mʉr tɨ̂ʼ ɨ́ ponó
kwá bʉr o b'á be agwɨ̂m yʉ́ʉ́ sɔ̂ʼ e me bá.
21Ɨ́ nkǒ páʼ bʉ̂r o b'Ɨ́zraɛ̂l bɨ́ɛ, Nzyɛ̌m lwib, dumo e bé ó:
Mɨ́ syɛ̂m mébó mâm móhó ntinɨ̂, lɨ́ ejébe bʉ̂r bâm.
Bɨ́ɛ njɨ lɨ́ esâ mé ebɨ̌h.
Sá yɨ́yɛ̂h mé lɛ́ɛ́ bé yɨ́,
bɨ́ɛ kʉ́ jaá pɨpɨ̌r pɨrɨ́ɨ.
Currently Selected:
Rôm 10: ozm
Highlight
Share
Copy
Want to have your highlights saved across all your devices? Sign up or sign in
