Rôm 9
9
OYúden
1Mě lɛ́ɛ́ ó, otyeetye, abe bíbɛr. Mě lɛ́ɛ́ ó, ɨ́ mpúhlá nyɨ́h e Yésʉs-Krîst. Mipahlá mí lémé wâm, myé lɨ́ ekʉ́ boʼlǒ lɔ́ɔ waá e nzɨ̌ Sísǐm mé Nzyɛ̌m. 2Léme, wê me ó, lɨ́ ekpaa ébúʼ. Wé ó nó ɨ́ jɔʼ yɨ́yɛ̂h. 3Wé kpaa mé nó ó, ebe bɨ́ɔɔ́ bâm, bʉr o bɨ́h le onɔ́ɔ́ bé á byɛ̂l bá, dí e meswomlʉ. Yé bé Nzyɛ̌m á bě sí kam nó, lɛ́ɛ́, mɨ́ kam ó, nye dwíhɨɨ bé meswomlʉ mé, nye syɛ́mɨɨ me, damá jóʼo ó mpʉ bɨ́h e Krîst, bé óbɔ́ʼa mpɔ́ʼá mpá yɨ́. 4Bɨ́ɔɔ́ bâm baá, bé ó nyɛ̂r bwá ó b'Ɨ́zraɛ̂l.
Bé ó Nzyɛ̌m á twâr lɨ́ esú lé édi nyé tâŋ bwân.
Bé ó b'á nyɛɛ bee kûm nyé.
Nye á nyɛɛ tyêl saá ó, páʼ bé e boo nɔ́ɔ́.
Bé ó b'á jóʼo metié nyé á tyêl má.
Bé ó b'á nyɛɛ lɛ̂ʼlɔɔ mpʉ bʉ̂r jálá le edwě Nzyɛ̌m kûm yɨ́.
Bé ó b'á nyɛɛ bi menkɛ̌ʼ mé Nzyɛ̌m.
5Bé ó dí mpóʼo mé Abraham, le Isaac ti e Yóseb.
Krîst mʉr tɨ̂ʼ á byɛ̂l mʉr ó, ɨ́ kúl bʉ̂r yɔ́ɔ́.
Kûm díʼee e Nzyɛ̌m, njwɨ́ɨ sá yɨ́yɛ̂h, njʉ̌m dǐ e njʉ̌m dǐ. Amɛn.
6Yé bé bɨ́ɔɔ́ bâm, bé mû ó e meswomlʉ nó, yé alɛ́ɛ yɨ́ɛ ó, Nzyɛ̌m á bé adira nkɛ́ʼ nyé. Ntʉ óYúden bɨ́bɛ̂h dí mpǎŋ kúl bʉ̂r o b'Ɨ́zraɛ̂l. 7Abraham, nyé le onta ɨ́ buo buo. Ntʉ bɨ́bɛ̂h dí nye onta ompâ. Yé ó mpʉ̌ Nzyɛ̌m á lɛ́ɛ Abraham yɨ́. Nye á lɛ́ɛ ó: Mpǎŋ mpóʼo mé á kɛʼ go nyɨ́, óduho ó, ɨ́ mwân gǒ, Isaac. 8Tó kœb ó, ɨ́ bím bwân Abraham á byâ bá, bɨ́bɛ̂h, bé abe bwán mé Nzyɛ̌m. Nzyɛ̌m á lɛ́ɛ ó, bwán ómpâ bé, bé ó baá bé á byɛ̂l mpʉ̌ Nzyɛ̌m á kɛʼ Abraham yɨ́. 9Sá Nzyɛ̌m á kɛʼ nye yɨ́, yê cɛmá ó: Jɔ̌ʼ mbǐ jɔʼ yɨ̂, yé óbáʼǎ nze yɨ́, me óbáʼǎ nze ɨ́ jɔʼ yaá. Sara, nyé obyâ gó mâ mʉrʉ̂m. 10Yé abě njɨ nó, yé omér. Rebéka á be ó myaá mpám gá yɨ́ná Isaac. Nye á si nʉa ebum, byâ mégbâh. 11Lʉ́ʉ́ égbâh, lé á bé apǎ byɛ̂l, nkʉ̂ sâ syɛ́ɛla gwár, nkʉ̂ yaá mpâ, nkʉ̂ yaá ébébe. Nzyɛ̌m á twâr nyʉ́ʉ́ tɨ̂ʼ ó, lɨ́ elɛ̂ʼle ó, nyě sá bísá byé ó mpʉ nyé kpɛ̂l yɨ́. Nyě twár mʉ̂r ó, ɨ́ mitíʼá mí lémé wé nye mʉr tɨ̂. 12Nyé ajébe mʉ̂r ɨ́ lɔ̌b bísyɛ́ɛla bimpâ mʉ̂r waá á nyɛɛ sâ nye bí. Yê cɛmá ɨ́ Mekaná mé Nzyɛ̌m ó: Ɨ́ megbâh ménɨ̌, waá ngá nyɛɛ́ jóʼǒ kpǎʼ e nyʉ́ʉ́ nyá, óbe ó túʼǎ me mɨ́ɔɔ́ wé. 13Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Páʼ mé Yákɔb le Esô, me á twâr ó, Yákɔb.
14Nó mpʉ yé dí nó yɨ́, mɨná bé ókǎ lɛ́ɛ gá nyá? Nzê Nzyɛ̌m, nye lɨ́ esâ bísyɛ́ɛla bi dí onzyɛ́h ónzyɛ́h bí ɛ́? Heʼé, yé abá be nó. 15Ebě, nye á lɛ́ɛ e Moyɨ̂z ó: Me ócwɨ́a ó e waá mé kpɛ́l écwɨ́a e né nyá. Me ójɨ̂ʼ nkóó ó e waá nyɨnyɛ̂h mé kpɛ́l éjɨ̂ʼ nkóó nyá. 16Nó ó, jɔ̌ʼ Nzyɛ̌m twár mʉ̂r yɨ́, nyě twár nyé ó, ebe nyé dí ejɨ̂ʼ nyé nkoó. Yé abe ɨ́ lɔ̌b sɨ́n mʉ̂r waá dí esâ lɨ́ ebaʼle métié wɨ́, nkʉ̂ ɨ́ lɔ̌b bísyɛ́ɛla byé. 17Yê cɛmá ɨ́ Mekaná mé Nzyɛ̌m, dumo e Faraɔ̂ŋ ó: Me á tyêl go ɨ́ dǐ njwɨ́ɨ, kǎ bîr ó, go sâʼ ebɨ̌h ó, me nkʉ̂ lɛ̂ʼle bʉ̂r bɨ́bɛ̂h nkul nyǎm e nzɨ̌ nyǒ, ndu e ntémé ó, bʉr tôʼ ɨ́ sí yɨ̂ʼ yɨ́yɛ̂h lɨ́ etúnǒ lɔ́ɔ dí edumo e díé lâm wɨ́. 18Nó ó, Nzyɛ̌m cwɨ́á ó e mʉr nyé twâr nyá. Mʉ̌r Nzyɛ̌m kpɛ́l élɨ̌l lémé wé nyá, nye lɨ́ elɨl nyé wǎ.
Mitíʼá mí lémé mé Nzyɛ̌m
19Bé óbɛ̌m dî e me ó: «Yé bé nó wá, Nzyɛ̌m, nye lɨ́ eláa bʉ̂r bibaa bí ébébe ɨ́ yé ɛ́? Nzé dí e nkul ekamlě Nzyɛ̌m lɨ́ elóŋlǒ gwɨ́má yé?» 20Gua mʉr dí edo e Nzyɛ̌m nyá, go nzé? Sá mʉ̂r á me e deʼé yɨ́, nzê yé óbɛ̂ʼ e mel ó: Go á me me mpʉʼ ɨ́ yé? Heʼé! 21Mel mempɨ̌, nyě e nkul esâ sá nyé kpɛ̂l yɨ́ e deʼé lé. Nye óbɛ̌m pɛ̂ʼ búʼ déʼé bipéh bíbá, nʉa wɨ̂ʼ pâʼ, sâ mpǎŋ daala e tɨ̂ʼ le ojɔɔ́; nʉa gúú pâʼ nɛ́ɛ: sâ yʉ́ʉ́ sá daala yé óbibiŋɔɔ dʉ́ó lɨ́lɛ̂h yɨ́. 22Nzyɛ̌m á sâ syɛ́ɛla yaá ó, nye lɛ̂ʼlaa bʉr nkpaa nyé le nkul nyé. Sá tɨ̂ʼ ó bɨ́n dí ebee nyé lɨ́ ebuú sâ bíhwó ɨ́ nkǒ páʼ bʉ̂r o jálá le ejaʼra e nkpaa nyé bá yɨ́. Nye lɨ́ ekʉ́ dûhwo baá nyé bónó édímle bá. Nyé sí kpɛl ó, nyě ntɨ́ʼ ó bʉr, dû mpʉ nkpáa nyé dí yɨ́ nɛ́ɛ: gua, gó e wáǎ lɔ̌b tɨ̂? 23Nzyɛ̌m á kpɛl ntémé ó, bʉr gʉ́ŋaa ó, nyě e kûm nɨ́nɨ́ɨ́. Nye ókab mɨ́ná gá kûm nyaá, mɨná gá, bʉr o nyé á kpɛl ecwɨ́a e bé bá, ebě, mɨná gá bé ó baá nyé á boo komlo ó, nye ókab bé kûm nyaá bá. 24Nzyɛ̌m á jébe ó, mɨná gâ: le oYúden, le bʉr o dí abe óYúden bá. 25Yé ó mpʉ nyé á lɛ́ɛ ɨ́ mekaná Ozéa á cɛma má yɨ́. Yê cɛmá ó:
Bʉr o b'á be anyɛɛ́ bě kúl bʉ̂r yâm bá, me ókǎ gbân bé, le ejwɨr bé ó: kúl yâm.
Sí mé á be anyɛɛ́ kpɛl yɨ́, me ókǎ jwɨr yé ó: sí kpɛ̌l yâm.»
26 Damá jóʼǒ mpʉ mé á lɛ́ɛ bé ó: Ntʉ bɨ́n dí bʉr bâm! yɨ́,
tɨ̂ʼ ɨ́ gúmo gwár e gwár yaá, mɛm Nzyɛ̌m, me ókǎ gbân bé
le ejwɨr bé ó: Bwán mé Nzyɛ̌m dí kublakúbla nyá.
27Ésayɨ á si túno, dumo e bʉr o b'Ɨ́zraɛ̂l, ó:
Bʉr o b'Ɨ́zraɛ̂l damá byéa le ejah, laǎ bím ósɨ́ǎ dí ɨ́ nkpâh mâŋ bá,
njɨ mâ dœ́h é bʉ̂r ó ngá tiʼe.
28 Dâ Nzyɛ̌m, nye ádeʼ. Nye ónze, nzě dwe bʉ̂r ó sí yɨ̂ʼ bintɨ́ʼá nyé á boo lɛ́ɛ ó, nye ódwe bé bí.
29Yé ó mpʉ̌ Ésayie á boo lɛ́ɛ yɨ́:
Yé bé Dâ Nzyɛ̌m, dí Njwɨ́ɨ bisɔ́má bí mɔ̂m nyá, á bé alíʼe bʉ́ʉ́ bwân ó kúl gá yɨ́ná mikublakúbla nó,
mpa mɨná bé á si dwe gá, mɨná gá óbɛ̂h, mpʉ bʉ̂r ó Sodôm e Gómɔr, bé á síe lɨ́ edwe mpʉ nywɨ́ɨ yɨ́.
Mbɨambɨa Lɔ́ɔ, wé lɛ́ɔɔ ntémé ó oYúden
30Mpʉ yé dí nó yɨ́, mɨná bé ókǎ lɛ́ɛ gá nyá? Nzyɛ̌m lɛ́ɛ́ yé, dumo e bʉr o dí abe óYúden bá? Bʉr o b'á be asáa nzɨ̌ ebi nkâm ɨ́ míh mé Nzyɛ̌m bá, bé ó b'á ka bi nkam ɨ́ míh mé. Sâ gwár, bé á si dweŋɔɔ mbi nkâm dí edweŋɔɔ ɨ́ lɔ̌b búʼó nyɨ́. 31Bʉr o b'Ɨ́zraɛ̂l bɨ́ɛ, bé á sɨsâ ó, bé bíʼee nkam ɨ́ míh mé Nzyɛ̌m ɨ́ mbaʼlá métié wɔ́ɔ́. Tó kœb ó, bé á bé abaʼle métié maá, kumo lɨ́ odumo. 32Bé á bé abi nkâm ɨ́ nzɨ̌ nyaá ɨ́ yé? Yé ó, ebě, bé á bé adyêʼ koo e Nzyɛ̌m. Bé á jaa dyɛ̂ʼwo ó, njɨ e bisyɛ́ɛla byɔ́ɔ́. Ɨ́ mpʉ bé á gwa bi nkam ɨ́ mbaʼlá métié wɔ́ɔ́ yɨ́, bê nzě twe téme-nzɨ̌. Bé á twe ó, lɨ́ ebɨm ébɔ̌ʼ lɨ́ ekóʼ. 33Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:
Jwɛ́ʼɛ́ɛ́ gâ! Ɨ́ Síon, mɨ́ gbâ ébɔ̌ʼ ɨ́ nzɨ̌.
Bʉr o ngá bɨm ébɔ̌ʼ laá bá, bé ócwe.
Tó kœb ó, mʉr nyɨnyɛ̂h ngá dyêʼ koo le ekóʼ laá nyá, lé ákóʼó sâ ó, nye bíʼee esɔ́m tɨ̂.
Currently Selected:
Rôm 9: ozm
Highlight
Share
Copy
Want to have your highlights saved across all your devices? Sign up or sign in
