Milʉ́mlʉ́ 28

Pɔ̂l ɨ́ tíhé Málta

1Jɔʼ bɨ́h á pam le eswie laá, bére tín yɨ́, bɨ̌h nzě jóʼo ó, tíhé waá, wé á jɨjébɔɔ ó, “Málta”. 2Bʉr ó tíhé waá, bé á lwilwib ó, lwǐb bɨ́h bɨɛ á be ajóʼo yɨ́. Bé á si bu cwɨ́a e bɨ̌h. Jɔʼ mpíé á be lɨ́ enwɨ́ɨ, ejwóo mɛ̂r bɨ́h yɨ́, bé á si sâ ebéʼé é siʼe ɨ́ gúmó bɨ́h á be yɨ́, le ebaʼle bɨ́h bɨ́bɛ̂h. 3Pɔ̂l nzě tœ̂ʼ ébɨ́ʼ é bínkpânkpǎ, gbâ lé lɨ́ ebéʼé é siʼe laá. Nyʉ́a mpʉ éjwɨ̂l á be tɨ̂ʼ nyá, nzě pyâl ɨ́ medíʼa mé siʼe, ntɔ̂ʼ lʉ̂ nyé ɨ́ mbô, nara. 4Jɔʼ bʉ̂r ó kwár nyaá, bé á bee ejwɨ̂l ɨ́ tyěl ɨ́ mbó wé yɨ́, bé ó: «Mʉr nyâʼ kʉ́ bě tyeetye ó njʉ̂l bʉr. Damá jóʼǒ mpʉ nyé bé sí pʉʼa ɨ́ mâŋ abe e búhó yɨ́, Otîtyěl-mé-Nzyɛ̌m, wé akam ó, nye tíʼaa.»

5Pɔ̂l jaá syɛʼrě syɛʼráa mbô, nyʉ́a ntɔ̂ʼ kur ɨ́ siʼe. Nye ntémé, kâr ébá jóʼo mékpaa. 6Bʉr bé á bûʼla ó, mbô lwɨ́l nyʉ́a wɨ́, wé ónkaŋle. Nkʉ̂ ntɔ̂ʼ ó, nye ódwe ó, mesaʼ metwɨrâ, wé dína apǎ nkaŋle. Nó ɨ́ jɔʼ bé á be, bé mû sí bóno, ɨ́ bóno bóno, abee nyʉ́ʉ́ ndêm dí elɛ̂ʼle ó, nye mû lɨ́ edwe yɨ́, bé ntɔ̂ʼ céne bíjwɨʼ byɔ́ɔ́. Bé á ka jwɨjwɨʼ ó, nye á be ó gúú mbǐ nzyɛ̌m swîh.

7Kúnókúno e gúmo yaá, yé á be ó e ntwǎŋ mbɛ̌r, yé á gúmo e njwɨ́ɨ tíhé waá yɨ́. Díé é njwɨ́ɨ waá, lé á be ó Publɨ́ɔs. Nye á be ɨ́ nʉa bɨ́h e bisʉhʉʉ, tira bɨ́h mentɔ́ɔ ɨ́ mbɛ̌r wé. Bɨ̌h nzě jâ tɨ̂ʼ melú mélɛ̂l. 8Tó kœb ó, sɔ́ŋ mé Publɨ́ɔs á be ó njáʼ sí ɨ́ joó lɨ́ ejóʼo éjwóo, le ebíle nkúmlo metié. Pɔ̂l nzě tó dwɛ̂ʼ nyê, nzě jɨʼla e Nzyɛ̌m, ntɔ̂ʼ kɛl nyé mebô, nye ntɔ̂ʼ tiʼ nyê. 9Jɔʼ bé á bee syɛ́ɛla yaá yɨ́, bʉr o b'á jóʼo mekpaa ɨ́ tíhé waá bá, bê nzě swálɔɔ, Pɔ̂l nzě tiʼ bê. 10Bé á si dwe bɨ̌h dúu ɨ́ buo buo. Ɨ́ jɔʼ bɨ́h á be lɨ́ etó kalwo ɨ́ sitíma yɨ́, bê nzě dwe bɨ́h sá bɨ́h á be lɨ́ ejɨ lɨ́ esú é tyen yɨ́h yɨ́.

Pɔ̂l lɨ́ ekumǒ Rôm

11Píe le ongɔn olɛ̂l, bɨ̌h nzě tô ɨ́ sitíma yé á duhǒ Alɛksandrî yɨ́. Díé é tɨ̂, lé á be ó, “Onzyɛ̌m o mégbâh”. Sitíma yaá nzě lɛ̌ŋ jɔ̌ʼ kóló ntinɨ̂ tyeelá lɨ́ ebʉ́m é tíhé waá. 12Bɨ̌h nzě pyâl Sʉrakûs. Bɨ̌h nzě lɛŋ mélú mélɛ̂l tɨ̂. 13Lɨ́ enkɛ́ɛ tɨ̂, bɨ̌h nzě kpâh pɨ̌n e pɨ̌n, tó pyâl ɨ́ Regío. Ɨ́ mɛ́n tɨ̂, pubó dí eduhǒ díbé tie yɨ́, yê nzě táare ékwoolo. Lɨ́ elú é mbá nɛ́ɛ: bɨ̌h nzě pyâl ɨ́ Potwólɔs. 14Ɨ́ nkana yaá, bɨ̌h bé á si kœb bɨ́ɔɔ́ bɨ́ná tɨ̂. Bê nzě lɛ́ɛ e bɨ̌h ó, bɨ̌h le onɔ́ɔ́ díʼee tɨ̂ tâŋ sóno ntinɨ̂. Nó yaá ó bɨ́h á ka pyâl Rôm yɨ́. 15Bɨ́ɔɔ́ bɨ́ná le okɛ́l bɨ́ná ó Rôm, bé á si jóʼo milɔ́ɔ ɨ́ lɔ̌b wɨ́h. Nó ó bé á nze ɨ́ mpɔmá nyɨ́h, bê nzě tyɛ̂b ɨ́ mpʉ̂n, jaá tó táarě tyé pátele dí Apíus yɨ́. Bʉ́ʉ́ jaá tó bónɔɔ ó, kwár á be e díe ó, “Bipátele bilɛ̂l” nyɨ́. Ɨ́ jɔ̌ʼ Pɔ̂l á bee bʉr ónɨ̌ yɨ́, nye ntɔ̂ʼ dwě Nzyɛ̌m nzyǒo, le ebi nkûl ɨ́ léme. 16Jɔʼ bɨ́h á pyâl Rôm yɨ́, bʉr ó jwɨ́ɨ ntɔ̂ʼ kam ó, Pɔ̂l díʼee yé gúmo nye omér, bé e sója yé á be lɨ́ edwéele nyé yɨ́.

Pɔ̂l lɨ́ etúnǒ Mbɨambɨa Lɔ́ɔ̌ Rôm

17Yé á be ó, melú mélɛ̂l, mé osí laa, Pɔ̂l ntɔ̂ʼ jébe ójwɨ́ɨ́ ó Yúden ó Rôm ó, bé gwɨ̂hlaa ɨ́ mbɛ̌r wé. Jɔʼ bé á swâl yɨ́, nye e bé ó: «Bɨ́ɔɔ́ bâm, mé apǎ sâ syɛ́ɛla gwár ó, me lwímlaa e sí gá yɨ́ná, nkʉ̂ e metum bímpám gá bíná. Damá jóʼo nó, bé á si mɛ̂r me Yerʉ́zalɛm, gbáŋɔɔ mé ɨ́ mbʉʼ, nzě ntɨhɔɔ mé wâʼ Rôm. 18Jɔʼ bé á dî me nkar, timlě lɔ̌b wâm yɨ́, bé á si gwa bîr me, ebě, bé á bé akœb mé e mebě ó, me ɨ́ jala le edwe. 19OYúden bɨ́ɛ, bé á be ó lɨ́ esóŋlo. Me á be ó lɨ́ bi ó, me ntɨ́hɨɨ lɔ̌b wâm wâʼ kwá mé Kɛ́ɛza. Mé abe e sá mé púr kúl yâm e yé yɨ́. 20Lɔ̌b waá ó mé á be lɨ́ ekpɛl ébee bɨ́n, le elwib e bɨ̌n wɨ́. Mě káʼɔ́ɔ́ ménkara mâʼ ó, njɨ ɨ́ lɔ̌b mpûʼla dí bʉr o b'Ɨ́zraɛ̂l ɨ́ miléme nyɨ́.»

21Bê nzě yala e né ó: «Bɨ̌h bé á bé abǐ damá jóʼo mékaná mempwár bé á cɛma, duhǒ sí Yʉ́da ɨ́ lɔ̌b gô má. Nó ntémé, bɨ̌h bé á bé abee mɨ́ɔɔ́ wɨ́h ngwár á duho gʉ̂, lɨ́ enzě lɛ́ɛ bɨ́h sɔ̂ʼ ɨ́ lɔ̌b syɛ́ɛla ébébe yô. 22Nó ó, bɨ̌h bé lɨ́ ekpɛl égʉ́ǎ mpʉ gó dí epahle mílɔ̌b myaá yɨ́, ebě, ɨ́ páʼ wɨ́h, sá bɨ́h bɨɛ dí egʉ́a yɨ́, yé ó, bé lɨ́ eswêʼ yébé waá ɨ́ bigúmó bíbyɛ̂h.»

23Bê nzě tyêl móhó, bé e boo nɔ́ɔ́, bé á be ó, bé óbɔma wɨ́. Jɔ̌ʼ móhó waá, wé á pyâl yɨ́, bé ntɔ̂ʼ nze e bʉr ɨ́ buo buo, nzě kœb nyé ɨ́ gúmó nyé á didi yɨ́. Táare ɨ́ mɛ́n, tó pyâl ɨ́ bíí kʉ̌ʼ, Pɔ̂l nzě túnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, le esáa ó, nye dúlaa bê, ó bé bûʼlaa lɛ́ʼlá dí edumo e Yésʉs wɨ́. Nye á nʉnʉa milɛ́ʼlá myaá ó, ɨ́ metié mé Moyɨ̂z le mekaná mé ógwíha o mílɔ̌b. 24Bâʼ bʉ̂r, bé á si bûʼla sá nyé á lɨlɛ́ɛ bé yɨ́; bʉ́ʉ́ bʉ̂r bɨ́ɛ bene ébûʼla yɔ́ɔ́. 25Bê nzě bɔ́ʼa métwíí, ntɔ̂ʼ pyálɔɔ̌ kʉ̌l, ebě, Pɔ̂l á be ɨ́ lɛ́ɛ e bé ó: «Sísǐm mé Nzyɛ̌m, wé á kʉ be ó e nkam ɨ́ jɔʼ nyé á lwib e bimpám bín, cɨɨ e nzɨ̌ ngwíha milɔ̌b Ésayie yɨ́. 26Nye á lɛ́ɛ e byé ó:

“Tóʼ ɨ́ nko bʉ̂r bâʼ dí yɨ́,

go e lɛ́ɛ́ e bé ó:

Bɨ̌n bé ókʉ́ gwá jôʼlo. Sâ gwár, bɨ̌n ájóʼo.

Bɨ̌n bé ódwɛ̂ʼ ɨ́ tooobó. Sâ gwár, bɨ̌n ábee.

27Ebě, bʉr bâ, bé ɨ́ lele míléme.

Bɨ́ dibe mégwǎl mɔ́ɔ́.

Bɨ́ dible míh mɔ́ɔ́,

ó mé ayɨ́ kǎ bee

nkʉ̂ jóʼo e megwǎl mɔ́ɔ́.

Bɨ́ dible míh mɔ́ɔ́ ó,

ocwóó wɔ́ɔ́, wé ayɨ́ kǎ gʉ́a.

Bé lɨ́ ebene ó, bé óbee nó,

bé ámû dwirǎ nko mé dí yɨ́,

me ntɔ̂ʼ jomo bê.

Nó ó Nzyɛ̌m mʉr tɨ̂ʼ dí elɛ́ɛ yɨ́.”»

28-29Pɔ̂l, nye e bé ó: «Gʉ́ŋáá gá ó nɛ́ɛ: lɔ́ɔ́ dí esâ ó, Nzyɛ̌m tíʼɨɨ bʉr wɨ́, wé mû ó lɨ́ elɛ́ɔɔ kwá baá o dí abe óYúden bá. Bɨ́ɛ, bé ókʉ́ jóʼo wê.»

30Nó ó, Pɔ̂l á nze di mimbú mímbá tɨ̂, ɨ́ mbɛ̌r nyé mʉr tɨ̂ʼ á jɨjána wɨ́. Nye á si nʉa baá bɨ́bɛ̂h bé á nze bɨbee nye bá. 31Nye ntémé á be lɨ́ etúnǒ lɔ́ɔ Mpóʼo mé Nzyɛ̌m, le elɛ̂ʼlě sá dí edumo e Tî Yésʉs-Krîst yɨ́, ɨ́ hwɨ́m, abáawǒ sɔ̂ʼ, abe e mʉr kámlé nyê.

Currently Selected:

Milʉ́mlʉ́ 28: ozm

Highlight

Copy