Rôm 1
1
Meswɨhlɨ
1Yé ó mɛm Pɔ̂l, syɛ̂l mesâ mé Yésʉs-Krîst ó dí ecɛma bɨ́n mekaná mâ. Nzyɛ̌m á twâr me ó, me díʼee mʉr milʉ́mlʉ́ wé. Nye á tyêl me lɨ́ empah ó, me tôʼ le etúnǒ Mbɨambɨa Lɔ́ɔ́ wé. 2Mbɨambɨa Lɔ́ɔ waá, Nzyɛ̌m á si boo kɛʼ ɨ́ nzɨ̌ ogwíha o mílɔ̌b ó, nye óntɨh mɨ́ná gá wǎ. Nkɛ̌ʼ nyaá, nye ó cɛmá ɨ́ Mekaná mé dí ti má. 3Mbɨambɨa Lɔ́ɔ waá dumo ó e Mwân wé. Ɨ́ nkǒ páʼ ébyɛ̂l e bípúno, nye á be ó mʉr mbɛ̌r bʉ̂r mé David. 4Ɨ́ nkǒ páʼ sísǐm wé dí ti wɨ́, nye njwɨrá ó, «Mwân mé Nzyɛ̌m», Yésʉs-Krîst, Tî gá wɨ́ná. Nzyɛ̌m á lɛ̂ʼle mɨná gá ó, nyě e njwɨrá waá ó e nkul ɨ́ buo buo ɨ́ lɔ̌b pahá sóo wé. 5Nzyɛ̌m á si cwɨ́a e bɨ̌h ɨ́ nzɨ̌ mé Yésʉs-Krîst, le etyêl bɨ́h bʉr o mílʉ́mlʉ́ bé, lɨ́ esú é bíkúl bíbyɛ̂h, ó byé dyéʼee koo e né, le esâ nyé mejóʼo. Nye á sâ bɨ̌h syɛ́ɛla yaá ó, lɨ́ esú lé édwe díé é Mwân wé kûm. 6Bɨ̌n ntémé, bé ɨ́ tólɔ́ɔ bʉr baá, ebě, Yésʉs-Krîst á jébe bɨ̌n ó, bɨ̌n dyɛ̂ʼwaa e né. 7Mě cɛmá ó, bʉr bɨ́bɛ̂h o dí Rôm, baá Nzyɛ̌m á kpɛl, le etwâr ó, bé díʼee mitwárá mí bʉ̂r myé bá. Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.
Pɔ̂l lɨ́ egwɨ̂m étó bee bʉ̂r ó Rôm
8Sá ésôʼ, me lɨ́ edwě Nzyɛ̌m nzyǒo ɨ́ díé mé Yésʉs-Krîst ɨ́ lɔ̌b wɨ́n, ebě, ɨ́ sí yɨ́yɛ̂h, bʉr bé lɨ́ ejóʼo mílɔ́ɔ́ mín mpʉ bɨ́n dí ebúʼlǎ Yésʉs-Krîst yɨ́. 9Ɨ́ jɔʼ yɨ́yɛ̂h, me lɨ́ ejɨʼla e né ɨ́ lɔ̌b wɨ́n. Nzyɛ̌m mʉr tɨ̂ʼ boʼlo ó, mě lɛ́ɛ́ ó otyeetye. Nye ó mé dí eboó séǎ syɛ́ɛ́ yé e tiŋé ɨ́ lémé wâm nyá. Mě séá yé ó e nzɨ̌ etúnǒ Mbɨambɨa Lɔ́ɔ dí edumo e Mwân wé wɨ́. 10Mě jɨʼlá e né ɨ́ jɔʼ yɨ́yɛ̂h ó, nye sʉ́ʼoo me metyɛʼ me mpóm mé, ó me kœ́bɨɨ jɔʼ énzě bee bɨ́n, ɨ́ mitíʼá mí lémé wé tʉ́ŋlʉ̌. 11Ebě, me lɨ́ ejóʼǒ dwéh ébee bɨ́n lɨ́ esú lé édwe bɨ́n nyʉ́ʉ́ nkûl Sísǐm mé Nzyɛ̌m, ó bɨ̌n nʉ́aa pîm ɨ́ búʼó. 12Sá mé dí elɛ́ɛ yɨ́, yé ó, mɨná sâʼ gá menkɔ̌m páʼ gá nyɨ́ná. Búʼó bɨ́n dí ebúʼlǎ Krîst yɨ́, le yaá yâm, byé ó ngá gbâ mɨ́ná gá nkul ɨ́ miléme.
13Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa ó, ɨ́ bijɔʼ ɨ́ buo buo, me á be ó le jwɨʼ ó, me ónzě bee bɨ́n. Me á jaa bʉbɔma sɔ̂ʼ ó, njɨ e mingamla. Sâ gwár, me ónze yɨ́ɛ lɨ́ esú lé énzě séǎ Nzyɛ̌m syɛ́ɛ́ ɨ́ sɔ́má yɨ́n. Me á gwɨ̂m ó, syɛ́ɛ́ yâm, yé gúmaa ntémé mpumó kwá nyɨ́n ɨ́ mpʉ yé á gúmo mpumó ɨ́ mʉ́ʉ́ mésí méswîh yɨ́. 14Me ó lɨ́ bi ó, me túnaa Mbɨambɨa Lɔ́ɔ kwá bʉr ó lwǐb grɛ̂k, le kwá bʉr o bílwǐb biswîh. Me túnaa wé kwá ogwɨ́a o mékaná, le kwá bigʉʼlʉgʉ́. 15Sá tɨ̂ʼ ó mé dí e tiŋé ɨ́ léme ó, me túnaa Mbɨambɨa Lɔ́ɔ kwá nyɨ́n ntémé, bɨ̌n bʉr ó Rôm yɨ́.
Nkul Mbɨambɨa Lɔ́ɔ
16Mé ajóʼo bá sôn ɨ́ Mbɨambɨa Lɔ́ɔ mé dí etúno wɨ́, ebě, wé ó nkul mé Nzyɛ̌m lɨ́ esú lé étiʼ mʉ̂r nyɨnyɛ̂h ngá bûʼla wé nyá, táare le oYúden, kala e baá o dí abe óYúden bá. 17Mbɨambɨa Lɔ́ɔ waá, wé lɛ́ʼlé ó, mpʉ̌ Nzyɛ̌m dí edwe bʉ̂r nkam ɨ́ míh mé yɨ́. Yé tááré ó, ɨ́ búʼó, tó swîʼ ɨ́ búʼó. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Tîtyěl mʉr ótiʼe ó, ɨ́ búʼó.»
Mʉr nyɨnyɛ̂h, nye ó syɛ̂l misyóm
18Nzyɛ̌m, nyɨ́ lɛ̂ʼle mɨ́ná gá ɨ́ sʉ́lʉ́lʉ́, duho ɨ́ jʉ́o kʉ́ mpʉ nyé dí elɛ̂ʼle nkpáa, duho ɨ́ bibɨ́bla bísyɛ́ɛla bíbyɛ̂h yɨ́. Nye lɨ́ elɛ̂ʼle nkpáa ɨ́ lɔ̌b bʉ̂r o dí elwímla le otyeetye, jaá dudû njɨ bisyɛ́ɛla bi dí onzyɛ́h ónzyɛ́h bí bá. 19Sá dí esâ ó, mʉr gʉ́ŋaa Nzyɛ̌m yɨ́, yé lɨ́ enyɨ̂n bʉ̂r bɨ́bɛ̂h ɨ́ ponó. Bʉr bɨ́bɛ̂h, bé lɨ́ ebeě sâ yaá, ebě, Nzyɛ̌m mʉr tɨ̂ʼ á si lɛ̂ʼle bé yǎ. 20Táarě Nzyɛ̌m á kuho sí, njwɨr wé dí abeɔɔ wɨ́, (nó, yé ó nkul nyé dí njʉ̌m dǐ e njʉ̌m dǐ nyɨ́, ndu e tyé Nzyɛ̌m yé,) wé lɨ́ enyɨ̂n bʉ̂r ɨ́ mîh ɨ́ ponó, ɨ́ jɔʼ mɨ́ná dí egwá dwɛ̂ʼ gá le epahle bísyɛ́ɛla byé yɨ́. Nó ó, bʉr o dí elwímla e Nzyɛ̌m bá, bé akǎ be e nkar ɨ́ míh mé. 21Damá jóʼǒ mpʉ bé á kʉ gʉ́a ó, Nzyɛ̌m, nye ó tɨ̂ʼ yɨ́, bé á bé adwe nyé kûm jálá e né nyɨ́, nkʉ̂ pʉgʉ́ bá dwe nyé nzyǒo. Bé á jaa pɨpahle sɔ̂ʼ ó, njɨ bisâ bi dí abá be e nyɔm bí. Bé ó bigʉʼlʉgʉ́, lúʼo pɨ̂ʼ. Milémé myɔ́ɔ́, myé jaá di ó, njɨ lɨ́ edúrʉ́ʉ́. 22Bé damá nkʉ́na ó, bé ó ocwóó, nkúná bé kǎ tó sûʼla ó bigʉʼlʉgʉ́. 23Líʼe ó, bé dwêʼ Nzyɛ̌m, waá dí adwe nyá kûm, bé á ka dwe kûm ó bikpɛʼkpɛ̂ʼ. Bé á kpaʼ bikpɛʼkpɛ̂ʼ byaá ó, mveʼle bʉ̂r, binʉ̌n, otír, nkʉ̂ onyʉ́a, bisâ bi dí elaǎ mpʉ̌ ngúl mpáá bí.
24Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bi mpîr bé á gwɨgwɨ̂m bí yɨ́. Nó ó bé dí esɛ́ɛla bísá bí ésɔ́m páʼ nyɔ́ɔ́, nyâʼ lɨ́ esâ nyʉ́ʉ́ yɨ́. 25Bé á si syɛ́ɛla otyeetye mé Nzyɛ̌m e bibɛr. Gúmó bé á jala le egúmlo le eséǎ Kwihbʉr syɛ́ɛ́ yɨ́, bé á jaa ka dwe kûm ó, njɨ bisá nyɨ́ɛ á komlo bí. Kûm díʼee e Nzyɛ̌m waá, njʉ̌m dǐ e njʉ̌m dǐ. Amɛn.
26Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bí ésɔ́m bé á kʉ bu gwɨ̂m bí yɨ́. Bʉbá bɨ́ɛ beně mbi bé á komlɔɔ ó, bé sɨ̂saʼ wɨ́. Líʼɔɔ̌ mpǎŋ syɛ́ɛla yaá, nzě lœʼ ményʉ́l mɔ́ɔ́ ó e bisyɛ́ɛla bi dí ajala e mbǐ kwɨmlá wɔ́ɔ́ bí. 27Bʉrʉ̂m sâ ntémé njɨ jwɨʼ gwár yaá. Bé lɨ́ ebene ékǎ dû bʉ́bá mpʉ bé á komlɔɔ ó, bé dûduŋɔɔ yɨ́. Líʼɔɔ̌ syɛ́ɛla yaá, bé kǎ jóʼo yɨ́ɛ ó, dwéh ékœb bʉ́ʉ́ bʉ́rʉ̂m ɨ́ bijoó mpʉ bʉ́bá. Bʉrʉ̂m e bʉrʉ̂m, bé lɨ́ esɛ́ɛla bísá bí ésɔ́m páʼ nyɔ́ɔ́. Bé lɨ́ edâʼre bíntɨ́ʼá ɨ́ menyʉ́l mɔ́ɔ́. Bintɨ́ʼá byaá, byé ó dí myɛ́na bé dí ebi má, lɨ́ esú é syóm bé dí esâ wɨ́.
28Bʉr baá, bé á bé abee ó, yé jala ɨ́ páʼ wɔ́ɔ́ ó, bé kámaa Nzyɛ̌m. Nó ó Nzyɛ̌m á nzoo ka bîr bé ó, bé díʼee e pɨʼ ontúl óntúl yɨ́. Nyě bír bé ó, bé sâʼ bisyɛ́ɛla bí ésɔ́m bi dí ajala e bé bí. 29Bé lɨ́ eswâhle bísyɛ́ɛla bíbyɛ̂h bi dí egbah métié bí. Byé ó dí:
jélé,
gwɨ́má bísá byé onkán,
ebébe é léme,
nzwíí, ntaa sʉ́ŋa,
ejwɨ́ɨ́ é bʉ̂r,
gwɨ́má égœ́a e bʉr,
mikóo,
sɛ́á mépɨʼ mé ébébe,
mesyɛ́ɛla.
30Bé lɨ́ eswêʼ míé mé bʉ́ʉ́ bʉ̂r. Bé ó ontɨ̂m le obɨn mé Nzyɛ̌m. Bé lɨ́ edîʼ mpêl. Bé lɨ́ esâ énkɛ́ɛ e nyʉ̂l le jáálé. Bé jaá sɨsáa ó, njɨ mepɨʼ mé ékûhlo mʉ́ʉ́ mébébe meswîh. Bé ajóʼo ósɔ́ŋ le onyɔ̌ŋ bɔ́ɔ́. 31Bé ó bigʉʼlʉgʉ́. Bé adira ménkɛ̌ʼ mɔ́ɔ́. Bé e cére ɨ́ miléme. Bé abe e njɨ́ʼá nkóó. 32Damá jóʼǒ mpʉ bʉ̂r baá, bé lɨ́ egʉ́a ó, Nzyɛ̌m á lɛ́ɛ ó, baá bɨ́bɛ̂h dí esâ mímbi mí ébébe myaá bá, bé dáʼré ó, eswie ɨ́ menyʉ́l mɔ́ɔ́ yɨ́, bɨ́ɛ, bé ó njɨ lɨ́ etô dóló le esɨsâ bísyɛ́ɛla byaá. Yé abě njɨ nó yé omér. Jɔʼ bé dí ebee bʉ́ʉ́ bʉ̂r lɨ́ esâ syóm yɨ́, bé e bisʉhʉʉ ɨ́ miléme. Bé e bé ó: «Sɨ́sáʼ gá njɨ mpʉ́nʉ̌.»
Currently Selected:
Rôm 1: ozm
Highlight
Share
Copy
Want to have your highlights saved across all your devices? Sign up or sign in
