KUHALAWA 36

1Abaho Musa kagendelela kulonga “Avo Bezaleli, Oholiabu, na magalu wose Mulungu iyawagwelele udaho na ujuzi wa kutanga kila kinhu kilondigwa msang'hano ya kudizenga idihema da kuiting'hanila wolondigwa watende kila kinhu kamba MNDEWA viyalagize.”

Wanhu Wogala Nhunza Bwando

2Abaho Musa kawakema Bezaleli na Oholiabu na magalu wose MNDEWA iyawagwelele udaho, awo wanogelwe kwiza kusang'hanika. 3Musa kawagwelela vinhu vose vilavigwe nhosa na Waislaeli sama ya kudizenga idihema da kuiting'hanila. Na kulawa mmioyo yao, wanhu wagendelela kugala nhosa kila imitondo. 4Abaho magalu wose wakalile wosang'hana sang'hano zose za kudizenga idihema da kuiting'hanila waleka sang'hano zao weza ha Musa 5na kumulongela, “Wanhu walava vinhu kubanza vinhu vilondigwa muisang'hano yaatulagize MNDEWA tuitende.”

6Abaho Musa kalagiza na kuzeneza mbuli zino mng'hambi, yolonga, “Haduhu mbigalo ama mtwanzi yolondigwa kugendelela kulava sama ya idihema da kuiting'hanila.” Avo wanhu waleka kulava vinhu sama ya uzenzi wa idihema da kuiting'hanila. 7Kwavija vija visangigwe vikala vibanzilize kumambukiza sang'hano yose.

Kuzenga Hema da Kuiting'hanila

(Kuh. 26:1-37)

8Magalu wose, wakalile mmwanza wa wanhu wakalile wosang'hanika, waditenda idihema da kuiting'hanila na miguo longo dimwe ya kitani inogile isokotigwe, na nyuzi za buluu, zambalau, na ndung'hu, na dihambigwa na muhambaji na ulembo wa vinhu vilingile na Makelubi.#36:8 Makelubi wao wene ugima wali kuulanga walumbigwe na Mulungu wali na mabawa. 9Utali wa kila guo ukala meta 12, na ugazi wa kila guo ukala meta 2. Miguo yose ikala na utali umwe na ugazi umwe. 10Miguo mitano kailumba hamoja, na miguo mitano iyagwe kailumba hamoja. 11Katenda matanzi ga buluu mulugigo lwa guo da kunze mmwanza wa ija imiguo ya ichanduso iyailumbile hamoja, na vivija katenda matanzi mulugigo lwa guo da kunze mmwanza wa ija imiguo iyagwe iyailumbile hamoja. 12Katenda matanzi malongo matano mulugigo lwa idiguo da ichanduso, na katenda matanzi malongo matano mulugigo lwa idiguo dikalile mmiguo mitano iyagwe. Gamatanzi gakala gakihindukile kila tanzi dimwe na miage. 13Katenda ving'hwangwazi malongo matano va zahabu, abaho kailumba imiguo hamoja na iving'hwangwazi giladi idihema da kuiting'hanila diwe kinhu kimwe.

14Vivija katenda miguo longo dimwe na imwe itendigwe na mijusu ya menhe sama ya kugubikila idihema da kuiting'hanila. 15Utali wa kila guo dimwe ukala meta 13, na ugazi wa kila guo dimwe ukala meta 2. Miguo yose longo dimwe na imwe ikala na utali umwe na ugazi umwe. 16Kailumba miguo mitano hamoja, na kailumba miguo sita iyagwe hamoja 17Katenda matanzi malongo matano mulugigo lwa idiguo da ikimambukizo da imiguo mitano ya ichanduso na matanzi malongo matano mulugigo lwa idiguo da ichanduso da imiguo sita iyagwe. 18Vivija katenda ving'hwangwazi malongo matano va shaba va kuvigela muna gamatanzi giladi yailumbe hamoja imiguo ya idihema da kuiting'hanila giladi iwe ngubiko imwe. 19Katenda ngubiko sama ya kugubikila idihema da kuiting'hanila, ngubiko ya ng'hwembe za songolomi wa ng'hondolo isindikigwe na langi ndung'hu, na ngubiko ya kunze ya ng'hwembe zinogile.

20Abaho katenda felemu za wima za m'biki wa mjoholo sama ya idihema da kuiting'hanila. 21Kila felemu ikala na wimo wa meta 4 na ugazi wa sentimeta 66. 22Kila felemu ikala na vizingiti uchana na hasi na kuitenda imihimili mibili kuwa kinhu kimwe, na kila felemu ikala na migulu mibili ingizigwe mvikalilo vikalile hasi ya izifelemu, katenda vino mzifelemu zose za idihema da kuiting'hanila. 23Katenda felemu za idihema da kuiting'hanila, felemu malongo mabili ng'ambu ya kusi ya idihema da kuiting'hanila 24na katenda vikalilo malongo mane va madini ga feza hasi ya izifelemu malongo mabili, vikalilo vibili hasi ya ifelemu ya ichanduso mmigulu yake mibili, na vikalilo vibili hasi ya felemu iyagwe mmigulu yake mibili. 25Ng'ambu ya kaskazi ya idihema da kuiting'hanila, katenda felemu malongo mabili, 26na vikalilo malongo mane va madini ga feza, vikalilo vibili hasi ya kila felemu 27Kuchugu cha idihema da kuiting'hanila, ng'ambu ya uswelo wa zua, katenda felemu sita. 28Katenda felemu mbili mzimhembe za idihema da kuiting'hanila zili ng'ambu ya kuchugu. 29Felemu zino za mzimhembe zolondigwa ziibande songela hasi mbaka uchana, na uchana zifungigwe na kitindi kimwe, zose mbili zolondigwa ziilinge. 30Avo kiwambaza cha kuchugu kikala na felemu nane hamoja na vikalilo va madini ga feza, vikalilo longo dimwe na sita, vikalilo vibili hasi ya kila felemu.

31Katenda boliti za m'biki wa mjoholo, boliti tano sama ya izifelemu za ng'ambu imwe ya idihema da kuiting'hanila, 32na boliti tano sama ya izifelemu za ng'ambu iyagwe ya idihema da kuiting'hanila, na boliti tano sama ya izifelemu za ng'ambu ya kuchugu ya idihema da kuiting'hanila, ng'ambu ya uswelo wa zua. 33Katenda boliti ya hagatigati, kaibitiza hagatigati ya izifelemu kulawa ng'ambu imwe mbaka ng'ambu iyagwe. 34Kazigubikiza izifelemu na zahabu, na kazitendela vitindi va zahabu vigoge iziboliti, na kazigubikiza iziboliti na zahabu. 35Katenda guo na nyuzi za buluu, zambalau, na ndung'hu, na kitani inogile isokotigwe, na dihambigwa na ulembo wa vinhu vilingile na Makelubi. 36Katenda nguzo nne za m'biki wa mjoholo sama ya idiguo na kuzigubikiza na zahabu, ving'hwangwalingo vake vikala va zahabu, na kazisimika m'vikalilo vine va madini ga feza. 37Katenda guo da kutungika hanhu ha kwingilila mdihema da kuiting'hanila na nyuzi za buluu, zambalau, na ndung'hu, na kitani inogile isokotigwe, na dihambigwa na muhambaji, 38na katenda nguzo tano hamoja na ving'hwangwalingo vake, kazigubikiza sota zake na kabali zake na zahabu, ila vikalilo vake vitano vikala va shaba.

Currently Selected:

KUHALAWA 36: Kizalamo

Highlight

Copy