KUHALAWA 35

Ndagizi za Zua da Mhumulo

1Musa kawakema Waislaeli wose hamoja na kuwalongela, “Zino zizo ndagizi MNDEWA ziyawalagize mzitende. 2Sang'hanikeni mmazua sita, ila zua da saba diwe zua ding'alile kumwenu, Zua da Mhumulo dikigwe na MNDEWA. Munhu yoyose yosang'hanika sang'hano yoyose mdizua dino kolondigwa yakomigwe. 3Hata moto sambiubwinhigwe mkae zenu Mdizua da Mhumulo.”

Nhosa Sama ya Hema da Kuiting'hanila

(Kuh. 25:1-9)

4Musa kawalongela wanhu wose wa Islaeli, kalonga, “Kino kicho MNDEWA kiyalagize. 5Soleni nhosa mkamulavile MNDEWA kulawa m'vinhu vumulinavo. Kila munhu yali na moyo wa kulava, yamulavile MNDEWA nhosa ya zahabu, madini ga feza, na shaba, 6nyuzi za buluu, zambalau, na ndung'hu, kitani inogile, na mijusu ya menhe, 7ng'hwembe za songolomi wa ng'hondolo zisindikigwe na langi ndung'hu, ng'hwembe zinogile, mbamha za m'biki wa mjoholo, 8mavuta ga mzaituni ga kwika m'viwenge, vilungilo sama ya kulungila mavuta ga mzaituni ga kubakala na sama ya ubane unung'hila goya, 9mabwe gakemigwe shohamu, na mabwe gayagwe ga hela bwando ga kuhambila mkizibao cha Mkulu wa Wakulu Wose wa Nhambiko na mkifuko cha mmhambaga.

Vinhu Vilondigwa Kukala Mdihema da Kuiting'hanila

(Kuh. 39:32-43)

10“Magalu wose wali mmwanza wenu wolondigwa weze kutenda kila kinhu kiyalagize MNDEWA. 11Watende hema da kuiting'hanila hamoja na ngubiko yake na ngubiko yake ya kunze, ving'hwangwazi vake, felemu zake, boliti zake, nguzo zake, vikalilo vake, 12Sanduku da Lagano hamoja na fimbo zake za kudipapila, ngubiko yake, guo da kudikikiwizila, 13meza hamoja na fimbo zake za kuipapila na via vake vose, na imikate ilavigwe nhosa ha Mulungu, 14kiguzo cha kwikila viwenge sama ya mulangaza hamoja na via vake, viwenge vake, na mavuta sama ya mulangaza, 15kilingo cha kufushila ubane hamoja na fimbo zake, mavuta ga kubakala, ubane unung'hila goya, na guo da kutungika hanhu ha kwingilila mdihema, 16kilingo cha kulukuzila nhosa hamoja na lwavu lwake lwa shaba, fimbo zake na via vake vose, teleko da shaba hamoja na kikalilo chake, 17miguo ya kutungika mviwambaza va idikonhi da idihema da kuiting'hanila, nguzo zake, na vikalilo vake, guo sama ya kutungika hanhu ha kwingilila mdikonhi, 18vigingi va idihema, na vigingi va idikonhi hamoja na nzabi zake, 19vivalo vilukigwe goya sama ya kusang'hanikila mdihema da kuiting'hanila, vivalo ving'alile sama ya Haloni, mkulu wa nhambiko, na vivalo sama ya wanage, vondawavale kipigiti wahasang'hana sang'hano ya ukulu wa nhambiko.”

Nhosa Sama ya Hema da Kuiting'hanila

20Avo Waislaeli wose wasegela haulongozi wa Musa, 21na wanhu wose wanogelwe mmoyo na wanhu wose wanogelwe mziloho weza na kugala nhosa zao ha MNDEWA sama ya kudizenga idihema da kuiting'hanila, sama ya sang'hano yake yose, na sama ya vivalo ving'alile. 22Wanhu wanogelwe kulava, watwanzi na wambigalo wose, weza na kugala nhosa zao za zahabu ha MNDEWA, vipini, heleni, vitindi, na mikufu na kuvinula haulongozi wa MNDEWA. 23Kila munhu yakalile na nyuzi za buluu, zambalau, ama ndung'hu, ama kitani inogile, ama mijusu ya menhe, ama ng'hwembe za songolomi wa ng'hondolo zisindikigwe na langi ndung'hu, ama ng'hwembe zinogile, kavigala. 24Na wose wakalile na madini ga feza ama shaba wavilava nhosa ha MNDEWA, na awo wose wakalile na mbamha za m'biki wa mjoholo wazigala giladi wazitendele muisang'hano ija. 25Watwanzi wose wakalile magalu wa kushona na kogosa na makono gao wagala vija viwakalile wokogosa. Wagala nyuzi za buluu, zambalau, na ndung'hu hamoja na kitani inogile. 26Watwanzi wose wanogelwe na wakalile magalu kogosa, wogosa mijusu ya menhe. 27Wakulu wa wanhu wagala mabwe gakemigwe shohamu na mabwe ga hela bwando ga kugela mkizibao cha Mkulu wa Wakulu Wose wa Nhambiko na mkifuko cha mmhambaga. 28Vivija wagala vilungilo na mavuta ga mzaituni sama ya kwika m'viwenge, na vilungilo sama ya kulungila mmavuta ga kubakala na sama ya ubane unung'hila goya. 29Avo Waislaeli wose watwanzi kwa wambigalo wakalile wosulukila kusang'hana sang'hano iyawagwelele MNDEWA kubitila Musa wagala nhosa zao ha MNDEWA kulawa mmioyo yao.

Wazenzi wa Hema da Kuiting'hanila da MNDEWA

(Kuh. 31:1-11)

30Abaho Musa kawalongela Waislaeli, “Loleni, MNDEWA kamsagula Bezaleli, mwana wa Uli, mzukulu wa Huli, kulawa mumtala wa Yuda. 31Kammemeza Loho wa Mulungu na kumgwelela udaho, nzewele, na ilimu ya ufundi wa namna zose, 32wa kusongola ulembo muna zizahabu, madini ga feza, na shaba na ufundi mkulu ng'hani, 33mkugakanha mabwe ga hela bwando na kugeka mvifelemu na mkusongola mibiki hamoja na namna zose za ufundi. 34MNDEWA kawagwelela Bezaleli na Oholiabu, mwana wa Ahisamaki, kulawa mumtala wa Dani, udaho wa kuwafundiza wayagwe. 35Kawatenda kuwa magalu wa kutenda sang'hano zose za kila namna ya ufundi, wavumbula vinhu, wahambaji wa nyuzi za buluu, zambalau, na ndung'hu, na kitani inogile, na walukaji wakalile magalu wa kuluka namna zose za vinhu.”

Currently Selected:

KUHALAWA 35: Kizalamo

Highlight

Copy