KUHALAWA 37
37
Sanduku da Lagano
(Kuh. 25:10-22)
1Bezaleli katenda Sanduku da Lagano na mbamha za mjoholo dili na utali wa sentimeta 110, ugazi wa sentimeta 66, na wimo wa sentimeta 66. 2Kadigubikiza na zahabu ing'alile mgati na kunze, na katenda lugigo lwa zahabu uchana kuzunguluka idisanduku. 3Kaditendela vitindi vine va zahabu, na kuvigwasika mmigulu yake mine, vitindi vibili ng'ambu imwe na vitindi vibili ng'ambu iyagwe. 4Abaho katenda fimbo za m'biki wa mjoholo, na kuzigubikiza na zahabu. 5Kazigela izifimbo m'vitindi vili mzimbavu za idisanduku, sama ya kudipapila idisanduku. 6Abaho katenda ngubiko ya idisanduku na zahabu ing'alile. Ikala na utali wa sentimeta 110 na ugazi wa sentimeta 66. 7Abaho kavitenda vinyago vilingile na Makelubi#37:7 Makelubi wao wene ugima wali kuulanga walumbigwe na Mulungu wali na mabawa. wabili wa zahabu mkusana na nyundo, kaweka kuzingwazo mbili za ingubiko ya idisanduku. 8Kamtenda Kelubi imwe kuingwazo imwe na Kelubi iyagwe kuingwazo iyagwe, wawa mkidanga kimwe na ingubiko ya idisanduku, kawatenda iwamakelubi muna izingwazo zake mbili. 9Makelubi wazigolosa mbawa zao uchana, na kuikikiwiza ingubiko ya idisanduku na izimbawa zao. Makelubi wailola, na vihanga vao viinamilila ingubiko ya idisanduku.
Meza ya Kwikila Mikate Ilavigwe Nhosa ha Mulungu
(Kuh. 25:23-30)
10Katenda meza ya mbamha za mjoholo. Ikala na utali wa sentimeta 88, ugazi wa sentimeta 44, na wimo wa sentimeta 66. 11Kaigubikiza na zahabu ing'alile na kaitendela lugigo lwa zahabu ing'alile uchana kuizunguluka imeza. 12Kaizungulusila mkungo uli na ugazi wa milimeta 75, abaho keka lugigo lwa zahabu kuzunguluka umkungo. 13Katenda vitindi vine va zahabu kavigwasika muna zimhembe nne za imeza, mmigulu yake mine. 14Vija ivitindi vigogile zifimbo za kupapila imeza vikala behi na umkungo. 15Katenda fimbo za m'biki wa mjoholo za kupapila imeza, na kazigubikiza na zahabu. 16Katenda via va zahabu ing'alile va kwika muna imeza, vyano na vikasi sama ya kufushila ubane na majagi na mikungu sama ya nhosa ya divai.
Kiguzo cha Kwikila Viwenge
(Kuh. 25:31-40)
17Katenda kiguzo cha zahabu ing'alile cha kwikila viwenge. Kikalilo chake na kiguzo chake wavitenda na zahabu isanigwe na nyundo. Vikasi vake, vifundo vake, na malua gake vikala kinhu kimwe na ikiguzo. 18Matambi sita gakala kuzing'ambu mbili za ikiguzo, matambi madatu ng'ambu imwe na matambi madatu ng'ambu iyagwe. 19Vikasi vilingile kamba malua ga mulozi, kila kikasi kimwe na kifundo chake na malua gake, vidatu vikala mditambi dimwe, na vidatu vikala mditambi diyagwe. Na matambi gose sita gakala mkiguzo cha kwikila viwenge. 20Uchana ya ikiguzo cha kwikila viwenge kukala na vikasi vine vilingile kamba malua ga mulozi, kila kikasi na vifundo vake na malua gake. 21Kifundo cha ichanduso kikala hasi ya igamatambi mabili ga ichanduso gali mkiguzo cha kwikila viwenge, kifundo cha ikabili kikala hasi ya igamatambi mabili ga ikabili, na kifundo cha ikadatu kikala hasi ya igamatambi mabili ga ikadatu. Mheta ya matambi gose gakala sita. 22Ivifundo, igamatambi na ikiguzo cha kwikila viwenge visanigwa kulawa mkidanga kimwe cha zahabu ing'alile. 23Katenda viwenge saba, mibato yake, na visahani vake, vose vikala va zahabu ing'alile. 24Ikiguzo cha kwikila iviwenge na via vandakane navo vikala vitendigwe na zahabu ing'alile ikalile na kilo 35.
Kilingo cha Kufushila Ubane
(Kuh. 30:1-5)
25Kasola m'biki wa mjoholo katenda kilingo cha kufushila ubane, ng'ambu zose zikala zikiilinga, kikala na utali wa sentimeta 45, ugazi wa sentimeta 45, na wimo wa sentimeta 90. Mhembe zake zikalile mzimhembe zake nne zisongoligwa kulawa mdibiki dimwe ditendile ikilingo cha kufushila ubane. 26Uchana ya ikilingo cha kufushila ubane, ng'ambu zake zose, na izimhembe zake zose kazigubikiza na zahabu ing'alile, na katenda lugigo lwa zahabu mkukizunguluka. 27Kakitendela vitindi vibili va zahabu va kugogela izifimbo za kukipapila, hasi ya ulugigo lwake, mzing'ambu zake mbili. 28Katenda fimbo za m'biki wa mjoholo, na kuzigubikiza na zahabu.
Mavuta ga Kubakala na Ubane
(Kuh. 30:22-38)
29Vivija katenda mavuta gang'alile ga kubakala na ubane ung'alile unung'hila goya, kamba galu wa kutenda mavuta ga kunung'hila viyatendaga.
Currently Selected:
KUHALAWA 37: Kizalamo
Highlight
Share
Copy
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
