Ohubala EMANYISA
EMANYISA
Esitabo sino esilaangwa mbwe Ohubala sikana olukano ludiira hu Baisiraeli koti lu bali nibafwaana mu myaaka kiri aambi neende amahumi kane ohutula mu siha sibatuliraho hu Lugulu Sinai, ohwoolera elalira lu boola hu lwaaho lw'ebukwe olw'esyaalo si Nasaae yali n'asuubiise ohubaberesa. Eliita ly'esitabo sino litulana hu hufwaana hw'esitabo sino ohuhiramo obuhoongo, esyeekesa mbwe, Ohubala abaandu hu Musa yahola naabala Abaisiraeli nibali aambi neende Olugulu Sinai, nibataachaaka olukeendo lutula ao ohwemeeda mu moni, haandi neende nibali mu syaalo silaangwa mbwe Moabbu, esiri ebukwe wa Yorodaani, olwiibulo lulala nilumalire ohufwa. Mu siha siri akatikaati w'amahabi kabiri kano ak'ohubala, Abaisiraeli beecha bachia mu Kadesi Bbarinea esiri hu lwaaho lw'emwaalo wa Kanani, nae byali nibyabahaya ohwiingira mu syaalo syasuubiswa nibatulira ebweene eyo. Mani luunyuma lw'ohumala emyaaka emiingi muno nibali abuundu ao, baheengao ohuchia abuundu yiri ebukwe w'Omwaalo kwa Yorodaani, yi baandu baandi baamenya, haandi yi baandi nabo beetekehera ohuchia baambuhe omwaalo okwo mani banyale ohwiingira mu Kanani.
Mani esitabo sino Ohubala lukano lw'abaandu bali nibasinyiha, haandi nibatya mu moni w'ebidinyu, haandi abaandu bali nibajeemera Nasaae, neende Musa, omuundu yi Nasaae yali niyadoola ohubeemirira. Luno lukano lw'obweesikwa bwa Nasaae, neende obuliindi bwae bw'abaandu bae kata neende mu bukata bwaabwe, neende mu butawulira bwaabwe, haandi neende obwomiifu bwa Musa, kata neende esiha siindi obonehana koti otaali omwesimiirifu, neende obuheeri bwae eyiri Nasaae, neende abaandu bae.
Ebiri mu sitabo sino mu bwiimbikiti
1. Abaisiraeli beetekeha ohutula hu Lugulu Sinai 1:1—9:23
a. Ohubala abaandu ohwataangira 1:1—4:49
b. Amalako neende ebilagiro bikabuhaane 5:1—8:26
c. Paasaka ypohubiri 9:1-23
2. Ohutula hu Lugulu Sinai ohwoola mu Moabbu 10:1—21:35
3. Ebyeeholehana mu Moabbu 22:1—32:42
4. Ebyomu lukeendo ohutula Misiri ohwoola Moabbu mu bwiimbikiti 33:1-49
5. Ebilagiro nibataambuha Yorodaani 33:50—36:13
Currently Selected:
Ohubala EMANYISA: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019