Esy'Abaleefi 22
22
Obwoolerefu bw'ebiyaanwa
1Omwaami yalagira Musa 2ohuboolera Arooni neende abaana bae ati, “Eng'we haba simuhoyere ohuchalaasaanga eliita lyaange daawe, mani yiseenge oluyaali mu biyaanwa bilafu bi baandu ba Yisiraeli bayaana yiindi. Ese niise Omwaami.” 3Nae oyo yeesi hu beechuhulu bao, naaba niyebahire omusiro, mani yaasuda aambi neende ebiyaanwa bilafu bi baandu bayaana yiindi, saaba n'ahoyere ohuhalaabana hu alutaari eyo. Sino sidiira hu ndaalo choosi echiicha. Ese niise Omwaami.
4“Yibulao kata mulala hu beechuhulu b'Arooni, oba neende obulwaae bw'ebigeenge, oba odaacha esiindu syoosi, onyala ohulya hu siindu syoosi hu biyaanwa bilafu, ohwoola lu yetusaho omusiro okwo kwoosi. Omulaamisi yeesi aba yebahire omusiro n'adiira hu siindu syoosi esy'omusiro koti ohubitira muhwegeeng'a hu mulaambo, oba naaba naatulamo amaachi k'obusaacha 5oba naaba niyegeeng'ere hu sisolo oba omuundu oliho omusiro. 6Omulaamisi yeesi owebaha omusiro, adoong'a sa naali neende omusiro okwo ohwoola engoloobe y'oludaalo olwo, haandi kata katyo, haba saaba n'ahoyere ohulyaaho hu biyaanwa bilafu ohwoola lwaaba n'amalire ohweyokaho. 7Elyuuba nilimala lyaakwa, aba ali owumaho omusiro, mani bulaanu aba anyala yaalya hu biyaanwa bilafu, ebihoyere ohuba ebyohulya byae. 8Haba saaba achia ohulya enyama y'esisolo syoosi esiba nisifwiire oluumbe lwabuli buhya, oba esiba nisiitirwe neende ebisolo biteende; yiba yichia ohumuhola abe ow'omusiro. Ese niise Omwaami.
9“Abalaamisi boosi bahoyere ohuloondakanaanga neende amalako ka ndusire. Ataali ao, baba bachia ohuba abanieere omusaango, mani bafwe, olwohuba baba nibahayire ohuwulira amalako malafu. Ese niise Omwaami, haandi niise okahola nikaba amoolerefu. 10Omuundu wohu mabaanga k'obulaamisi, niye yeeng'ene onyala ohulya hu biyaanwa bilafu; abulao omuundu yeesi onyala ohubilya kata sa neende oyo oba niyamenya sa neende omulaamisi oba niyapakaswa sa nae. 11Nae abawaambe b'omulaamisi, abawaambe abakulwa neende eseende chae omweene, oba abeebulirwa mu daala lyae, nibo abanyala ohulya hu byohulya bi mulaamisi anyoola. 12Omwaana muhaana w'omulaamisi odeehera omuundu otaali omulaamisi haba saanyala ohulyaaho hu biyaanwa bilafu. 13Nae omuhaana wafwiirwa wamwe, oba owaloba otaali neende omwaana, haandi owakobola ohumenya mu daala lya laatang'ene koti owoolwa, aba anyala ohulya hu byohulya bi laatang'ene anyoolaanga koti omulaamisi. Ohutusaho mulala hu baandu bali mu daala ly'omulaamisi niye onyala ohusilyaaho.
14“Omuundu yeesi otaali mulala hu baandu bomu daala ly'omulaamisi naalya hu biyaanwa bilafu nataachiririire ohuhola atyo, aba ahoyere ohutuunga omulaamisi oyo ebyaaka neende byaaba n'aliire, haandi yameedaho ebyaaka neende amahumi kabiri hu buli emia eyebyeene ebyo. 15Abalaamisi haba sibahoyere ohubaha omusiro ebiyaanwa bilafu 16nibaleha omuundu yeesi otafukiirirwa ohubilya; sino siba sichia ohuleeta omusaango haandi neende esinyaaso hu muundu ofwaana atyo. Ese niise Omwaami haandi niise oholaanga ebiyaanwa ebyo nibiba ebyoolerefu.”
17Omwaami yalagira Musa 18Ohuberesa Arooni neende abaana bae, neende abaandu boosi aba Yisiraeli amalako kano kati. Omuisiraeli yeesi, oba omuteende yeesi owamenya mu Yisiraeli, naayira esiyaanwa sisaambwa syaawa, oba mu hwooseresa esyeyamo syoosi, oba sa koti esiyaanwa syebihaya, esisolo esyo haba sisihoyere ohubaaho obufwoolwa bwoosi. 19Hu sinyale ohufukiirirwa, siba sihoyere ohuba nisiri esisaacha esitaaliho obufwoolwa bwoosi. 20#Amal 17:1.Nooba n'oyaana esisolo syoosi esiriho obufwoolwa, Omwaami haba saaba naachia ohusisiima daawe. 21Omuundu yeesi n'aleeta esiyaanwa sy'ohukobola alala eyiri Omwaami, oba niyooseresa esyeyamo syoosi, oba koti esiyaanwa syebihaya sa, esisolo sihoyere ohuba nisitaaliho obufwoolwa bwoosi hu sinyale ohufukiirirwa. 22Otayanaanga eyiri Omwaami esisolo syoosi esiwofu, oba esilema, oba esyaheengwaho esiindu syoosi, oba esiriho esifwiimba sidaacha, oba esiri neende eseero lyadomoha-domoha, oba amabute. Otayaanaanga esisolo syoosi esifwaana sityo hu alutaari koti esiyaanwa sy'ebyohulya daawe. 23Koti esiyaanwa syebihaya, onyala wayaana esisolo syadoondobana ohuhula, oba esyahula bubi, nae haba sisifukiirirwa mu hwooseresa esyeyamo daawe. 24Otayanaanga eyiri Omwaami, esisolo syoosi esyasaasakwa, oba esyaheengwa, oba esyanyubululwa, oba sa esyakusulwaho obusaacha. Sino haba sisifukiirirwa mu loba lyeeng'we lino.
25Otayanaanga esiyaanwa sy'ebyohulya esy'esisolo syoosi esyatula hu muundu muteendee. 26Haandi Omwaami yemeeda ohuboolera Musa ati, 27Eng'oombe esurusi, oba ekoondi, oba embusi niyiibulwa, yihoyere ohulehebwaanga hu ng'ina ohumalaanga endaalo chitaanu-na-chibiri; mani ohutula hu ludaalo lwa hataanu-na-hadatu, ohwemeeda mu moni, yiba bulaanu yihoyere ohufukiirirwaanga koti esiyaanwa esisaambwa syaawa eyiri Omwaami. 28Otayanaanga eng'oombe edwaasi, alala neende emoosi yayo, oba ekoondi edwaasi neende omwaana kwalyo, oba embusi edwaasi alala neende emeeme yayo, hu ludaalo lulala. 29Nooba n'oyaana esiyaanwa sy'ohweebasa eyiri Omwaami, loondakanaanga neende amalako koti lu kaboola hwoonyale ohufukiirirwaanga; 30siricheenge osimalirao oludaalo lweene olwo, n'otalehaho esituundu syasyo syoosi ohukona syoola hu ludaalo luloondaho. 31Omwaami haandi yaboola ati, “Funihireenge amalako kaange; ese niise Omwaami. 32Mutaletaanga ohuchalaasa hu liita lyaange daawe; abaandu boosi ba Yisiraeli bahoyere ohweekesaanga bati, ese ndi omwoolerefu. Ese niise Omwaami haandi obaholaanga mwesi nimuba aboolerefu; 33haandi niise owabatusa mu Misiri endi ndeehole Nasaae weeng'we. Ese niise Omwaami.”
Currently Selected:
Esy'Abaleefi 22: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
