Esy'Abaleefi 21
21
Obwoolerefu bw'abalaamisi
1Omwaami yalagira Musa ohuboolera abalaamisi b'Arooni ati, “Abulao omulaamisi yeesi ohoyere ohweeholaanga omweene ow'omusiro eyiri abaandu daawe, niyeyiingisa mu miholo ky'amasika, omwiiho wae naaba n'afwiire, 2ohutusaho naaba naali ng'ina, laatang'ene, omwaana musyaani, omwaana muhaana, oba mwaanang'ina, 3oba mboochoong'ene osisiiri ohudeeha owamenya mu nyuumba yae. 4Haba s'ahoyere ohweehola ow'omusiro hu hufwa hw'abeeho bae b'ebuhwe.
5 #
Lef 19:27,28; Amal 14:1. “Abulao omulaamisi yeesi ohoyere ohubekaanga esituundu syoosi esy'ohumutwe kwae, oba ohuhehetaanga ebirefu byae oba ohwesalakaanga hu mubiri kwae ohweekesa ati ali mu masika daawe. 6Ahoyere ohuba omwoolerefu, haandi ahoyere ohuhaya ohuchalaasaanga eliita lyaange. Oyo niye oyaana ebiyaanwa by'ebyohulya yiindi, mani ahoyere ohuba omwoolerefu. 7Omulaamisi haba s'ahoyere ohudeehya omuhasi oba niyaliho malaaya, oba omuhasi wawaamo omubiri, oba omuhasi oba ni yadeeheraho omusaacha wuundi; wuno mwoolerefu niye. 8Abaandu bahoyere ohubukulaanga omulaamisi koti oli omwoolerefu, olwohuba oyo niye owuundeeteraanga ebiyaanwa by'ebyohulya yi ndi. Ese niise Omwaami; Ndi omwoolerefu, haandi hola abaandu baange bosi baaba aboolerefu. 9Omwaana muhaana w'omulaamisi oweehola ohuba malaaya, aba achalaasa laatang'ene; aba ahoyere ohusaambwa yaafwa.
10“Omulaamisi Muhuluundu aba yamala ohuchuhwaho amafuta hu mutwe kwae, mani aba yamala ohwooswa anyale ohwefwalaanga ebifwaalo by'obulaamisi, mani haba s'ahoyere ohulehaanga efwiiri lyae nilitaali ekwiise daawe, oba ohutaandulaanga engubo chae ohweekesaanga naaba naali mu masika daawe. 11Aba yamala ohuyaanwa yiindi, mani haba saaba n'ahoyere ohweebaha omusiro daawe, oba haba saaba n'ahoyere ohubaha omusiro Eyeema lyaange elafu, 12neende ohulitulaangamo haandi n'achia niyengiraanga mu nyuumba chiba nichirimo emilaambo, kata neende omulaambo okwo nikuba nikuli okwa laatang'ene mweene oba okwa ng'ina mweene. 13Ahoyere ohudeehya omuhasi osisiirimo omubiri, 14otaali omufwiirwe, oba owalobaho, haandi otaliho malaaya. Ahoyere ohudeehya olimo omubiri yeeng'ene, haandi otula mu baandu bae beene. 15Ataali ao, abaana bae, ababa nibahoyere ohuba aboolerefu, baba bachia ohuba ab'omusiro. Ese niise Omwaami, mani mba nindamala ohumukabula endulo ohuba Omulaamisi Muhuluundu.”
16Omwaami yalagira Musa 17ohuboolera Arooni ati, “Abulao kata mulala hu beechuhulu bao obaaho obufwoolwa bwoosi ochia ohufukiirirwa ohuyaanaanga yiindi esiyaanwa sy'ebyohulya daawe. Sino sichia ohuhola endaalo choosi echiicha. 18Abulao omusaacha yeesi oli neende obufwoolwa bwoosi ochia ohufukiirirwa ohuyanaanga esiyaanwa esyo, ‘abulao oyo yeesi oba omuwofu, omulema, owanyaasiha esiiso, oba owanyaasiha omubiri kwoosi; 19abulao oyo yeesi oba niyalema omuhono oba ohukulu; 20abulao oyo yeesi ow'esigufu, oba owahuunya ohuhula; abulao oyo yeesi oliho obulwaae bw'emoni, oba obulwaae bw'esihoba; haandi abulao omulade.’ 21Abulao omwiichuhulu yeesi ow'Arooni omulaamisi, oliho obufwoolwa bw'omubiri bwoosi ochia ohufukiirirwa ohuyaanaanga yiindi esiyaanwa sy'esyohulya. 22Omuundu koti oyo anyala yaalia ebyohulya biba nibiyaanirwe yiindi, esiyaanwa sy'ebyohulya byoolerefu, haandi neende kata esiyaanwa sihiramo obwoolerefu sy'esyohulya, 23nae olwohuba ali neende obufwoolwa bwohu mubiri, haba s'ahoyere kata ohuusudaho aambi neende epasya, kata ohusudaho aambi neende alutaari eyo. Haba s'ahoyere ohubaha omusiro ebiindu byoolerefu bino, olwohuba ese niise Omwaami, haandi obihola hu byaaba ebyoolerefu.”
24Sino mani nisyo si Musa yaboolera Arooni, neende abaana b'Arooni, haandi neende abaandu boosi aba Yisiraeli.
Currently Selected:
Esy'Abaleefi 21: SAMDC
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
