Ohutula 9

Ohufwa Hw'ebisolo

1Omwaami yaboolera Musa ati, “Chia eyiri omutuki omuboolere oti, Omwaami, Nasaae w'Abaibburania, aboola ati, ‘Leha abaandu baange bechiire, baanyinamire. 2Nae nikali mbwe haandi ochia ohubahaya ohuchia, 3mba njia ohuhusaandya neende ohuhuleetera oluumbe lubi eyiri ebisolo byao byoosi: efaraasi, esuhiri, engamia, eng'oombe, amakoondi, neende embusi. 4Njia ohutaao engabuhano akatikaati w'ebisolo by'Abaisiraeli neende ebyo eby'Abamisiri, mani sibulao esisolo sy'Omuisiraeli syoosi esichia ohufwa. 5Ese, Omwaami, malire ohutaao muchuli ohuba oludaalo lweene lu njia ohuholeraho sino.’ ”

6Hu ludaalo lwaloondaho Omwaami yahola koti sa lu yali n'aboolere, ebisolo byoosi eby'Abamisiri byaafwa, nae sibulao kata esisolo silala esy'Abaisiraeli esyafwa. 7Omutuki oyo yateeba esyali nisikwiireo, bamuboolera mbwe, sibulao kata esisolo silala esy'Abaisiraeli esyafwa. Nae omweene yemeeda sa ohuhola esyeejo mani yaahaya ohuleha abaandu abo baachia.

Ebifwiimba

8Omwaami haandi yaboolera Musa neende Arooni ati, “Bukulaho ekohe ediidi mu bifuusi ohutula mu syoosyo; Musa abidumuulire mu miyaka mu moni w'omutuki. 9Lichia ohuduumuuha koti olufu lunyuhe muno lisaalaanire mu syaalo syoosi esya Misiri, buli yi lyoola lichia ohuhola ebifwiimba byeehola amakoonjo kang'eng'eerere hu baandu neende hu bisolo.” 10#Hubwi 16:2.Mani babukula ekohe ediidi hooho, beema mu moni w'omutuki; mani Musa yaaliduumulira mu miyaka, lyaahola ebifwiimba ebyatulamo amakoonjo kang'eng'eerere hu baandu neende hu bisolo. 11Esiha sino, ab'amayia haba sibanyala ohwiicha baaba aambi neende Musa, olwohuba kata abeene abo bali nibeechuuleho ebifwiimba koti sa Abamisiri baandi bali. 12Nae Omwaami haandi yahola omutuki oyo yaaba ow'esyeejo, koti sa lu yali niyaboola hale, mani omutuki oyo haandi naahaya ohuwulira Musa alala neende Arooni.

Amakina k'Efula

13Omwaami yaboolera Musa ati, “Muchuli echuli muno, ewe chia haandi obukaanane neende omutuki mani omuboolere oti: Omwaami, Nasaae w'Abaibburania, aboola ati, ‘Leha abaandu baange bechiire, banyale ohunyinamira. 14Leero hu luno, siinja ohusaandya abakali bao neende abaandu bao boong'ene, nae njia ohusaandya neende ewe mweene, hu weemeo omanye oti abulao oyo yeesi owaakana naange mu syaalo muno. 15Niimba mbwe ndasiingisa omuhono kwaange ohuhuhuya alala neende abaandu bao neende oluumbe, oba wesi wamala ohusihirisirwa elalira. 16#Rom 9:17.Nae ni ohudaha sa ohuhweekesa obunyala bwaange, sakira ndahuleha sa endi obeeo omulamu hu efuma yaange yinyale ohutabaala esyaalo syoosi. 17Nae kata katyo naawe osisiiri sa neende esireka syao esyo, osiihayaanga ohuleha abaandu baange bechiire. 18Mani esiha siti muchuli, njia ohuleeta efula y'amakina embi muno, yi Misiri yitaabonaho mu bulamu bwaayo bwoosi. 19Mani bulaanu, lagira ebisolo byao bilamu byoosi alala neende buli siindu syoosi syooli nasyo erwaanyi bihiingakirirwe abuundu alai. Amakina kachia ohukwa hu baandu neende ebisolo ebinaalehwe erwaanyi nibitahiingakiriirwe, mani byoosi biba bicha ohufwa.’ ” 20Abakali baandi ab'omutuki oyo batya ohweema hubi Omwaami yali n'aboolere, mani beengisa mu nyuumba abawaambe baabwe, alala neende ebisolo byaabwe byoosi ohweyikama. 21Nae abaandi kata katyo, haba sibadeebaho hu hulabula hw'Omwaami, mani baaleha abawaambe baabwe, alala neende ebisolo byaabwe erwaanyi.

22Omwaami yaboolera Musa ati, “Siingisa omuhono kwao okutiingaase muukulu, mani amakina k'efula kachia ohukwa mu syaalo sy'e Misiri sino syoosi hu baandu, ebisolo, haandi neende hu bimera byoosi ebiri mu mikuunda kyoosi.” 23Musa yasiingisa endabuhi yae yaayisyoomesa aakulu, Omwaami mani n'asiindiha ehubba alala neende amakina k'efula, alala neende eemesu nichihubba hu loba. Omwaami yatuma 24#Hubwi 8:7; 16:21.omuyaka kw'amakina k'efula omusito, alala neende eemesu nichimesuhana ohutula muukulu nichihubba hu syaalo. Kuno nikwo okwali okuyaaka kubi kuhiramo ku Misiri yali yitaabonaho mu bulamu bwayo bwoosi. 25Mu Misiri mwoosi, amakina kahubba buli siindu syali nisisiiri erwaanyi, ohutulira elalira hu baandu boosi, ohwoola hu bisolo byoosi. Kahubba kaanyaasa ebimera byali mu mikuunda byoosi, haandi byaahalaka emisaala kyoosi. 26Nae mu situundu sya Goseni, yi Baisiraeli bali nibamenya, niyo yoong'ene mu Misiri yi makina katoola.

27Omutuki oyo yatuma bamulaangire Musa neende Arooni, yababoolera ati, “Ehabi lino, holere esyonoono; Omwaami ali hu bwadyeeri, haandi abaandu baange alala neende ese mweene niifwe abakosere. 28Musabe Omwaami oyo! Ehubba yino neende amakina kano, bitumalire! Mani ndi ohusuubisa endi njia ohubaleha muchie; haba simusihoyere ohuba nimuli ano ohwoola buti daawe.”

29Musa nae haandi yaboola ati, “Ese naange, nindaba sa hu ndula mu siko muno endi, njia ohusiingisa amahono kaange aakulu nindekweeda Omwaami waange. Ehubba yicha ohwaakama, kata neende amakina kosi kalehere ao ohukwa, hu bulaanu eng'we mweemeo mumanye muti hane esyaalo sino syoosi sy'Omwaami. 30Nae ese manyire endi ewe neende abahoongo bao mutoola ohutya Omwaami Nasaae.”

31Ekitaani neende amabere masuungu byatoochwa, olwohuba amabere masuungu kali kaangaale, haandi Ekitaani yosi yali niyitaaho. 32Nae yibulao engaano yahubbakwa, olwohuba yaangalaanga oluunyuma.

33Musa yatula eyiri omutuki, yaatula mu siko esyo, yakiinguula aakulu amahono kae ohulaama eyiri Omwaami. Ohwaaduluhana, amakina k'efula, neende efula byoosi byaamala byaakama. 34Omutuki oyo niyabona ebyali nibyeholeehe haandi yahola sa ebyonoono. Ye neende abahoongo bae badoong'a nibali ab'esyeejo koti lu balichiingi. 35Omwaami yali naabuliriire ohubitira mu Musa, omutuki oyo haba siyakanyaho ohulehuula Abaisiraeli owaao.

Currently Selected:

Ohutula 9: SAMDC

Highlight

Copy

Compare