Ohutula 8

Eneenga

1Omwaami yeemao yaboolera Musa ati, “Chia eyiri omutuki oyo mani omuboolere oti Omwaami aboola ati, ‘Leha abaandu baange bechiire, banyale ohunyinamira. 2Noohaya, njia ohuhusaandya alala neende esyaalo syao niisiichusaho eneenga. 3Omwaalo kwa Naili kuchia ohwiichula eneenga, chisaabe mani choole ohutulamo nichiingira mu dooho lyao, mu siseenge syao sy'okonamo, hu sitaanda syao sy'okonaho, neende mu nyuumba ch'abakali bao, alala neende abaandu bao, haandi kata neende mu maika kao neende mu bifulya bi ofukiraangamo. 4Chichia ohuhuduumiraho, hu baandu bao, haandi neende hu bakali bao boosi.’ ”

5Omwaami haandi yaboolera Musa ati, “Boolera Arooni asiingisire endabuhi yae hu myaalo kyoosi, hu mitaro kyoosi, neende hu madiba koosi, mani okere eneenga chituleyo mani chiichule buli abuundu mu Misiri.” 6Arooni yayisiingisira hu maachi koosi, mani eneenga chaasiikuhayo chaafuuniha esyaalo syoosi. 7Nae haandi ab'amayia abo bosi banyala ohuhola eneenga chaasiikuha chaaba hu syaalo.

8Omutuki oyo yalaanga Musa neende Arooni mani yaboola ati, “Musabe eyiri Omwaami weeng'we oyo amaleo eneenga chino, mba njia ohuleha abaandu beeng'we bano bechiire, banyale ohuyaanayo ebiyaanwa byaabwe eyiri Omwaami waabwe.” 9Musa nae yakobolamo ati, “Ese njia ohuba omusaangaafu ohuhusabira. Mani ewe, tekeha sa esiha syooba odaha ohusabiramo, abakali bao, alala neende abaandu bao. Mani ao oba ochia ohwemalaho eneenga chino, chihae ohubonehanaho ohutusaho ohuba mu mwaalo kwa Naili mwoong'ene.”

10Nae omutuki yamukobolamo ati, “Mani ewe sabire muchuli.”

Musa yaboola ati, “Njia ohuhola sa koti lu osabire, mani ao niwo yoocha ohumanyira oti abulao nasaae wuundi oli koti Omwaami, Nasaae weefwe. 11Ewe mweene, abakali bao, alala neende abaandu bao boosi, bachia ohumalwaho eneenga, haandi abulao kata eneenga yoosi eyichia ohudoong'a ohumalaho eyiri mu mwaalo kwa Naili.” 12Bulaanu, ao, Musa neende Arooni balehana neende omutuki oyo, mani Musa yaachia yaasaba Omwaami atuseo eneenga chi yali niyaleeta hu mutuki oyo. 13Mani Omwaami yesi yahola koti lu Musa yali naasabire, mani eneenga choosi echali mu nyuumba, mu nyanyi, alala neende mu mikuunda chaafwa chaawa. 14Abamisiri bachibuusira mu bituuli bihoongo muno, mani esyaalo syoosi syeechula esifuundu. 15Nae omutuki oyo niyabona ati eneenga echo choosi chimalire ohufwa, esyeejo syae haandi syakaluha mani koti lu Omwaami yali naaboolere, omutuki oyo yahaya ohutekeeresa Musa neende Arooni.

Enyung'unyi

16Omwaami haandi yaboolera Musa ati, “Boolera Arooni ahuye endabuhi yae hu loba, mani hu syaalo sy'e Misiri syoosi olufu luchia ohukaluuhanamo enyung'unyi.” 17Arooni yahuya endabuhi yae hu loba, mani olufu lwoosi oluli mu Misiri lwaakaluuhana lwaaba enyung'unyi mani cheechula hu abaandu boosi neende ebisolo byoosi. 18Ab'amayia abo bosi bateemaho ohwehoonyera amalesi kaabwe ohuhola enyung'unyi chiweeo, nae byaabahaya. Enyung'unyi chasaaba chaaba buli abuundu, 19#Luk 11:20.mani ab'amayia baboolera omutuki waabwe oyo bati, “Nasaae niye oholere sino!” Nae omutuki oyo yemeeda ohuhola esyeejo, mani koti lu Omwaami yali niyaboola, omutuki oyo haba siyawuliraho Musa neende Arooni.

Esiiye

20Omwaami nae yaboolera Musa ati, “Wuuna muchuli echuli muno ochie obukaanane neende omutuki oyo, naanaba hwaachia hu mwaalo, mani omuboolere oti, Omwaami aboola ati, ‘Leha abaandu baange bechiire, baanyinamire. 21Ndi ohuhulabula endi n'ohaya, njia ohuhusaandya neende ohuhutumaho esiiye, abakali bao, alala neende abaandu bao boosi. Enyuumba ch'Abamisiri chichia ohwiichulamo esiiye, kata neende eloba lyoosi lichia ohufuunihwa neende esiiye. 22Nae njia ohubisira esyaalo sya Goseni, yi baandu baange bamenya, kata yihaye ohubahooyo esiiye yoosi-yoosi. Njia ohuhola endyo hu omanye oti ese, Omwaami, ndi ohuhola omulimo mu syaalo sino. 23Njia ohutaao engabuhana akatikaati w'abaandu baange neende abaandu bao. Esiholwa sy'amayia sino sichia ohubaao muchuli.’ ” 24Omwaami yatuma ebidiiyiha by'esiiye bihoongo muno mu dooho ly'omutuki oyo neende mu nyuumba ch'abakali bae boosi. Mani esyaalo syoosi esya Misiri syaanyaasibwa neende esiiye echio.

25Bulaanu omutuki oyo yalaanga Musa alala neende Arooni mani yaababoolera ati, “Muchie mani muyaanireyo ebiyaanwa eyiri Nasaae weeng'we ano mu syaalo muno.”

26Musa nae yamukobolamo ati, “Esyo haba sisihoyera ohuholwa daawe, olwohuba Abamisiri nabo baba bachia ohunyoolesebwa neende esiholwa sy'efwe ohuyaanayo ebisolo bi huyaanira Omwaami, Nasaae weefwe. Mani nihwehoonyera ebisolo bino hwaanyoolesa Abamisiri nihubiitira yi banyala ohutubona, baba bachia ohutuhuya amakina batwiite. 27Mani sakira efwe huhoyere ohusamula hulw'endaalo chidatu enaamba mu siparara, huhwoole yi hunyala ohuyaanira ebiyaanwa byeefwe eyiri Omwaami Nasaae weefwe, koti sa omweene yatulagira.”

28Omutuki oyo yakobolamo ati, “Njia ohubaleha muchie muyaanire Omwaami Nasaae weeng'we esiyaanwa mu siparara, nikali mbwe haba simuchia ohwooloberera eyale muno. Syesi muunaamiraho.”

29Musa yamukobolamo ati, “Niindula sa ano, njia ohusaba Omwaami endi muchuli esiiye chino chihutuleho, chitule hu bakali bao, haandi neende hu baandu bao boosi. Nae ewe otatubachirisaho ehabi liindi weemao haandi okayira abaandu ohuchia ohuyaanira Omwaami ebiyaanwa.”

30Musa yalehana neende omutuki oyo, yaachia yaasaba eyiri Omwaami, 31mani Omwaami naahola koti lu Musa yali naasabire. Esiiye chatula hu mutuki, chaatula hu bakali bae, haandi chaatula hu baandu bae boosi; yabulao esiiye kata ndala eyadoong'ayo. 32Nae haandi kata ehabi lino lyosi, omutuki oyo yemeeda sa ohuhola esyeejo, mani haandi yaakayira abaandu abo ohuchia.

Currently Selected:

Ohutula 8: SAMDC

Highlight

Copy

Compare