Ebyemeeda hu Esita 3
3
1 Esiha sidiidi nisyabitao, omutuki Ahasuero yadoolamo Hamani omwaana wa Hamedaata, ow'enono ya Agagi. Yamuhusa yaamuta hu daara ly'abaasye boosi, abachweenufu bomu bwaami baandi boosi. 2 Omutuki yalagira abahalaabani bae boosi ohwiisaanga oluyaali mu Hamani nibamwiinamira. Nae Modekai n'ahaya ohwiinamira oba ohusigamira Hamani. 3 Abahunuufu baandi mu huhalaabanira omutuki bateeba Modekai bati: “Lwasiina ojeemera esilagiro sy'omutuki?” 4 Buli ludaalo bamuteebaanga esiindu sino, nae natabadeebaho daawe. Baboolera Hamani ebidiira hu Modekai nibadaha ohubona oba Modekai achia ohwomiirira hu mboosi yae, olwohuba yali amalire ohubaboolera ati Muyudaaya niye. 5 Hamani achia ohweboneraho omweene ati Modekai haba samwiinamira oba yamusigamira daawe; Hamani etima lyamudiira mani n'anyoolera muno. 6 Mani nibamuboolera bati Modekai yali Omuyudaaya, yabona ati ohwiita Modekai yeeng'ene haba sisichia ohumala, mani n'aheengao ohusihirisa ab'enono ya Modekai, Abayudaaya boosi abali mu bwaami bwa Ahasuero bwoosi.
Abayudaaya bali mu budinyu
Esilagiiriro sy'ohusihirisa Abayudaaya
7 Mu mwoosi kutaangira okulaangwa Nisani, okw'omwaaka kw'ehumi-na-kibiri okw'obutuki bwa Ahasuero, eha yahubbwa mu moni wa Hamani, babone oludaalo neende omwoosi. Eha niyikwa hu mwoosi kw'ehumu-na-kibiri okulaangwa Adaari.
8 Hamani yaboolera omutuki Ahasuero ati: “Yiluwo enono y'abaandu eyisalaniire mu chiindi choosi mu bwaami bwao. Amalako kao kakabuhana neende ak'ebyaalo biindi byoosi, haandi haba sibadiira esilagiro sy'omutuki; mani omutuki haba s'ahoyeere ohubesiimirisa daawe. 9 Nihuba ohusiima hwao, yandiika olagire basihiriswe, syesi njia ohuta mu sibihiro sy'obwaami ekiloguraamu elifu emia chidatu neende amahumi kane (340,000) ech'efweesa olw'abo abanaahole omulimo okwo.”
10 Omutuki yefwaalula hu muhono kwae engila yi yehonyerwaanga ohuta omuhuuri hu bitusirwe by'elalira mani n'ayiberesa Hamani omwaana wa Hamedaata, omusuku w'Abayudaaya. 11 Omutuki yaboolera Hamani ati: “Doong'a neende eseende, nae abaandu abo, hufukiirira obahole koti lu odaha.”
12 Hu ludaalo lw'ehumi-na-chidatu olw'omwoosi kutaangira, abaandiiki b'omutuki balaangwa, mani nibata mu bwandiike esilagiriro sya Hamani eyiri abachweenufu bomu bwaami, abaami boosi neende bagafana ba buli situundu mu bwaami. Buli situundu nisyaandiikirwa mu syandiiko syasyo haandi buli syaalo mu lulimi lwasyo. Esilangiiriro sino syandiikwa mu liita ly'omutuki Ahasuero, haandi syataahwo ahalolero h'engila yae. 13 Bawamwaanda bayira ebbarwa chino mu bituundu byomu bwaami bwae byoosi, nibalagira ohusihirisa, ohusiinja neende ohumalirao elalira Abayudaaya boosi, abayere neende abahuluundu, abahasi neende abaana, hu ludaalo lw'ehumi-na-chidatu olw'omwoosi kw'ehumi-na-chiri, omwoosi kulaangwa Adaari, haandi ebiindu byaabwe byoosi binyakwe. 13gMani abaandu bano ohutula hale-na-haandi, ata buti abasisiiri abajeemu bamalweo hu ludaalo lulala, mubuchuuni basukunwe emakoombe, hu syaalo syeefwe sinyale ohudoong'a mu muleembe ataali ohunyaaswa haandi.
14 Ebbarwa yali yisoma yiti: “Ohutula eyiri omutuki Ahasuero ow'oluyaali, ohuchiira bagafana b'ebituundu emia ndala neende amahumi kabiri-na-bibiri (127) ohutulira elalira hu Buyiindi ohwoola Etiopia; neende eyiri eyiri ab'amasasa babahoonyeraho. 15 Nindanyoola obunyala ohutuka ebyaalo biingi haandi ohuba omwaami w'esyaalo syoosi, haba sindadaha ohweniinia olw'obunyala bwaange, ohutusaho ndadaha ohuba omudiira kaala haandi ohuba ow'esisa, hu nyale ohuliinda obulamu bw'abaandu mu mireembe nisibulao esidinyu syoosi daawe haandi obwaami bwaange bube obulai muno, abaandu bachicheenge buli abuundu woosi ohwoola yi bwaakama, abaandu boosi emireembe ki bekoombaanga chikoboleo buyaaha. 16 Nihweteebereho hu bakeraki beefwe engeri yi njia ohwoosereseramo sino, Hamani hu bahunuufu bweefwe otuhiramo amakesi neende ohumanyirisa, omanyihaane hulw'omwooyo kwae mulai, haandi omweesikwa otekanakanahwo daawe, haandi niye owohubiri mu luyaali mu bwaami bweefwe, atuboolere ati; 17 yiluwo enono yasalaanira mu nono choosi echohu syaalo, abaandu b'enono eyo bali neende amalako katafwaanana neende ak'enono chiindi, haandi boosi endaalo choosi bayiingania bi mutuki alagira, mani nibituhaya ohwola hu sichiririrwa syeefwe silai esyohuholera alala hw'obwaami. 18 Humanyire huti abaandu bano, haandi bano boong'ene, nibo buli siha abayiingania abaandi boosi haandi beyawula hu baandi boosi nibaloondehana neende amalako kaabwe neende emisiro chaabwe, mani nibahaya ohudiira ebilagiro byomubutuki, haandi bahola ebiindu byobusuku ebitaleeta omuleembe mu bwaami. 19 Bulaanu hulagiire Hamani, eyadiiswa obunyala bw'ohuhola ebidiira hu bwaami, omuhuluundu wohubiri mu bwaami, abo boosi abalomwalomwaho mu bbarwa yino basihiriswe elalira emisi neende esisina, abahasi neende abaana, beetwe neende olugaanga lw'abasuku baabwe, ataali ohwelalihira oba ohukwiira esisa daawe, hu ludaalo lw'ehumi-na-chine olw'omwoosi kw'ehumi-na-chibiri okulaangwa Adaari, okw'omwaaka kuno. 20 Mani abaandu bano ohutula hale-na-haandi, ata buti abasisiiri abajeemu bamalweo hu ludaalo lulala, mubuchuuni basukunwe emakoombe, hu syaalo syeefwe sinyale ohudoong'a mu muleembe ataali ohunyaaswa haandi.”
21 Ebbarwa ekopolole y'esilagiriro sino, yali oyohuyirwa mu bituundu boosi koti esilagiro, yeekeswe buli bwaami, abaandu bamanye mani betekehere oludaalo olwo. 22 Hulw'eslagiro sy'omutuki sino, bawamwaanda bachaakaniramo bwaangu muno ohuyira ebbarwa, Esilagiiriro esyo syataangira ohumanyihana mu siko sya Susa.
Mani omutuki neende Hamani nibeehala nibachaaka ohulya neende ohung'wa, mani esiko sya Susa nisikwaamo esiisi.
©Bible Society of Kenya, 2019
©Bible Society of Uganda, 2019