Ebyemeeda hu Esita 2
2
Modekai neende Esita
Esita yeehaswa ohuba omuhasi w'omutuki
1 Luunyuma lwabino, etima ly'omutuki nilyayenjeera, Ahasuero yechulisa Fasiti, engeri yi yebisiramo, neende engeri yi yaheengerwamo omusaango. 2 Abahalaabani b'omutuki bamuberesa esibaaso bati: “Omutuki bamukoonyereyo abahaana bayere abataamanyire eby'abasaacha, ab'esiiso silai muno. 3 Omutuki atume mu buli situundu sy'obwaami bwae, babuuse alala abahaana baraaga bataamanyire eby'abasaacha ab'esiiso silai boosi, babaleete mu nyuumba ya bahasi eyomu siko sihoongo sino esya Susa, babadiise mu bunyala bwa Hegai, omulooye w'omutuki oliinda abahasi, bababeresa eby'ohweebaha. 4 Mani omuhaana yi mutuki anahiremo ohusiima niye ochia ohukobola mu makulu ka Fasiti koti omuhasi w'omutuki.”
Esibaaso sino omutuki yasisiima, mani n'ahola atyo.
5 Mu siko sya Susa, mwalimo Omuyudaaya olaanga Modekai, omwaana wa Yairo, omwichuhulu wa Kisi neende Simei, ow'enono ya Bbenjamini. 6 Modekai yali mulala hu bawaambe, Nebukadineesa omutuki wa Bbabbilooni yatusa Yerusalemu alala neende Yekonia, omutuki wa Buyudaaya. 7 Modekai niye owali n'ahusa Hadasa, olaangwa Esita, omwaana wa Aminadabbu, laatang'ene muyere. Esita yali niyafwiisa abebusi bae boombi. Esita yali omuhaana wahula bulai haandi ow'esiiso silai muno, abeebusi bae nibafwiire, Modekai yamuyira mani yamuhusa koti omwaana wae omweene.
8 Elako ly'omutuki nilyamala ohulaangirirwa mu bwaami bwae boosi, abahaana baangi babuuswa mani nibaleetwa mu siko sya Susa, yi badiiswa mu bunyala bwa Hegai. Esita yewa mu dooho ly'omutuki mani n'adiiswa Hegai, omuliindi wa bahasi. 9 Esita yasangaasa muno Hegai, mani n'amudaha muno. Haba siyahiinda daawe ohumuberesa ebyo byoosi ebidahibwa ohwefwaalwa neende ebyohulya; nae yameedaho ohumuberesa abahaana bataanu-na-babiri abahiramo obulai mu dooho ly'omutuki ohumuhalaabanira, mani n'abata abuundu ahiramo obulai mu nyuumba ya bahasi.
10 Esita yali asisiiri ohutumbula enono yae neende abeebusi bae, olwohuba Modekai yali yamuhuutira ohutabilomalomaho daawe. 11 Modekai neende olwaanyi lw'enyuumba ya bahasi n'adaha ohumanya ebidiira hu Esita koti lu ali neende buli simukwiireho syoosi.
12 Buli muhaana yachichaanga mu moni w'omutuki Ahasuero buli mbaka y'emyoosi ehumi neende chibiri nichibitireo koti lu amalako k'ohuhola hu bahasi kali, olwohuba omuhaana yamalaanga emyoosi chisaasaba n'abahwa amafuta ka Mira haandi emyoosi kisaasaba kiindi niyehoonyera kawunya bulai neende eby'esing'aari biindi ebing'iyisa omuhaana. 13 Buli muhaana niyachichaanga eyiri omutuki, bamubechaanga buli siindu si yadahaanga ohuchia nasyo, olwohuba yatuswaanga mu nyuumba ya bahasi ohuyirwa mu dooho ly'omutuki. 14 Yachichaangayo engoloobe, mani n'atulayo echuli; nibamuyira mu nyuumba yiindi, eyali mu bunyala bwa Saasigasi omuchweenufu w'omutuki, owaliindaanga abahasi b'omutuki b'erwaanyi. Omuhaana oyo siyakobolaanga eyiri omutuki haandi, ohutusaho omutuki mweene n'amusiimire haandi n'amulaanga n'atuumbula eliita lyae.
15 Nae esiha sya Esita, omuhaana w'Abbihaili, Modekai yi yali yahusa nisyoola ohuchia eyiri omutuki, Esita haba siyasabaho esiindu syoosi, ohutusaho ebyo bi Hegai, omuchweenufu w'omutuki yali amubereese. Buli muundu owabona Esita yamusiima. 16 Esita yaleetwa mu dooho ly'omutuki Ahasuero mu mwoosi kw'ehumi, okulaangwa Tebbeti, mu mwaaka kw'ehumi neende chitaanu-na-chibiri okw'obutuki bwae. 17 Omutuki yadaha Esita ohuhira abahasi baandi boosi, haandi abulao omuhaana wuundi yi mutuki yasiima ohuhira Esita. Yafwaasa ekofia y'obutuki hu mutwe kwa Esita mani n'amulaangirira ati niye omuhasi w'omutuki ohukobola mu makulu ka Fasiti. 18 Omutuki mani n'aholera abachweenufu bomu bwaami bwae neende abaminisita esidyaalo sihoongo muno, esidyaalo sya Esita, n'aberesa ebituundu byoosi ebyomu bwaami oludaalo lw'ohuwuluuha, mani n'akaba ebiyaanwa koti lu adaha.
Modekai neende Hamani
19 Esita koti abahaana baandi lu bali, niyayirwa mu nyuumba ya bahasi yohubiri, 20 Esita yali asisiiri ohutuumbula abeebusi bae oba enono yae daawe, olwohuba Modekai yali amulabuule atabooleraho omuundu yeesi, mani Esita yamuwulira mu sino koti lu yamuwuliraanga n'asimuliindire mubuyere bwae. 21 Mu siha sino, Modekai yali ahusirwe n'ali hu daara ly'aakulu mu dooho ly'omutuki. Abachweenufu babiri, Bbigitaani neende Teresi, abahalaabaniraanga omutuki koti abaliindi bohu mulyaanga, embaliha yabadiira mani nibateesa ohwiita omutuki Ahasuero. 22 Modekai niyamanya ebidiira hu lukwe luno, yabooleraho muha omutuki Esita, mani Esita yesi n'aboolera omutuki Ahasuero ebidiira hu lukwe olwo. 23 Bateeberesa mani nibanyoola bati sino syali esyadyeeri. Abahobi bano boombi bayirwa hu simikiro, mani esiholwa nisyaandiikwa mu sitabo sy'ebiindu byakwaao mu biha by'abatuki. Sino syaholwa mu moni w'omutuki.
©Bible Society of Kenya, 2019
©Bible Society of Uganda, 2019