Esabbuli 31
31
Eyiri omweemberesi. Esabbuli ya Daudi.
Esaala yohweesika Nasaae
1Ewe Omwaami, niiwe yi njiruhiraho ningoonya obweyikamo;
otaleha esoni chaandiiraho kata nabudiidi;
mu buluungifu bwao, monie!
2Tekeeresa,
mani wumonie maangu!
Niiwe ohoyere ohubechaanga obwiiruhiro bwaange bwomiifu,
olukaka lw'amaani oluumonia!
3Eee, niiwe olwaanda lwaange haandi olukaka lwaange;
hulw'oluyaali lw'eliita lyao, nyimiriremo haandi wuunjekese engira,
4monie omuteego ku batekere,
olwohuba niiwe obweyikamo bwaange.
5 #
Luk 23:46. Mu muhono kwao nimwo mu nda obulamu bwaange;
Ewe Omwaami Nasaae owadyeeri, omalire ohumonia.
6Ewe haba soodaha abo abeenamira ebiloongaloongwe;
nae ese ndeesika Omwaami.
7Njia ohwehoyaanga haandi sangaalire mu buheeri bwao butaakama,
olwohuba obweene ohusaanda hwaange,
omanyire ebidinyu byaange,
8haandi haba siwafukiirira omusuku waange ohumaamba;
wamberesa ehabi ohukeenda wosi-woosi yi ndaha.
9Ewe Omwaami ngwiire esisa, olwohuba ndi mu bidinyu;
emoni chaange chihoohere olw'amasika,
kata omubiri kwaange neende omwooyo kwaange kwosi.
10Obulamu bwaange bumaliire mu budinyu,
kata emyaaka kyaange kyosi kiwereere mu hwayuuya;
amaani kambweeremo hulw'engisa,
haandi amakuumba kaange kosi kadeembuuhe.
11Ndeholere esyohucheha eyiri abasuku baange,
esitiisa eyiri abasyaange,
esiindu si tiisa eyiri abeecha baange beene;
abo abaambona ni ndi hu ngira baanjiruha-bwiiruha.
12Ndamala ohwiibirirwa koti omuundu wamala ohufwa hale; ndamala ohweehola
ndi koti endamu yaadiha.
13Eee, mbulira abaandu baangi nimemoonya bati
ebidinyu bimwebodoohaanie
bateesera alala ebidiiraho,
nibakiiya ohudyamo olukwe.
14Nae ndeesika ewe Omwaami,
mboola endi, “Niiwe Nasaae waange.”
15Obulamu bwaange buli mu mahono kao;
monie ohutula mu mahono k'abasuku baange neende abo abangiiya ohunjiita!
16Tingaala omuhalaabani wao neende esisa;
mani wumonie ohweema hu obuheeri bwao butaakama!
17Ewe Omwaami otaandeha esoni chadiira,
olwohuba ese husaba;
leha abahola-mbi esoni chibadiire,
leha bachie emakoombe nibabuleerere.
18Leha eminwa mibacha kiwumumale,
ekyo ekilomaloma obubi hu baluungifu bao
nibehuduumbasa neende esuunga.
19Ewe Omwaami, obulai bwao buungi muno,
buwabiihira abo abahwiisamo oluyaali,
neende ebiindu by'oholera abahweesika,
buli muundu abibona!
20Obakisa yooli
mani wabawonia ehobo ch'abaandu;
obaliindira abuundu wao alai
bahaye ohunyekwa.
21Omwaami ofumisibwe,
olwohuba wanjekesa obuheeri bwae buwukisa
abasuku nibali bandebodoohaanie.
22Ndaboola neende obuti endi,
“Mbano njiruuswe ohutula mu moni wao.”
Nae ewe wawulira amaliro kaange,
nindahusaba ohuhoonya.
23Eng'we aboolerefu, mudahe Omwaami!
Omwaami niye oliinda abamweesika,
nae asaandya abehuduumbasa.
24Eng'we abeesika Omwaami,
mugume, emyooyo kyeeng'we kitawaamo amaani!
Currently Selected:
Esabbuli 31: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
