Esabbuli 22
22
Ohulira hw'ohwekanyiirisa neende olweembo lw'ohufumia.
1 #
Mat 27:46; Mrk 15:34. Nasaae waange! Nasaae waange! Lwasiina wunjwaang'ire?
Lwasiina oli eyaale muno n'otadaha ohuuhoonya, haandi n'otawulira amaliro kaange?
2Ewe Nasaae waange, hulirira esideete, nae haba siwungobolamo;
nae esiro syoosi, haba singona ndaawuluuha.
3Nae Nasaae, niiwe Omwoolerefu weeng'ene,
niiwe weeng'ene yi Yisiraeli yifumia.
4Niiwe yi bakuuka yeefwe beesika;
bahweesika, mani weechia waabawonia.
5Bahulirira, mani bawonisibwa;
bahweesika, mani waahaya ohubajwaang'a.
6Nae ese haba si ndi koti omuundu, ndi esibuuha;
si baandu banyeka, haandi si baandu balekeeresa.
7 #
Mat 27:39; Mrk 15:29; Luk 23:35. Abo boosi abaambona baanduulira,
banjoomya eminwa, mani baayuuya emitwe kyaabwe nibaboola bati;
8 #
Mat 27:43. “Yeesika Omwaami; mani leha Omwaami amuwonie!
Leha amwaabine, olwohuba amusangaaliramo!”
9Nae niiwe owandusa mu nda ya maama,
niiwe owaniinda bulai nisiinuuna amabeere ka maama.
10Niiwe yi ndeesika ohutulira elalira hu ludaalo lundeebulirwaho,
haandi ohutula hu ludaalo lu njibulirwaho, niiwe Nasaae waange weeng'ene.
11Mani otaba eyale naange,
olwohuba ebidinyu biri aambi
haandi abulao owuundi onyala ohuhoonya.
12Abasuku baange bali koti esurusi nyiingi chindebodoohaanie,
esurusi ch'amaani cha Bbasani chindebodoohaanie;
13baasaamie eminwa kyaabwe nikiiningaalire,
bali koti edalang'i yihayuuhe eyihuumulana.
14Mbweeremo amaani, ndi koti amaachi kabachuhire aasi,
haandi amakuumba kaange koosi kasoboheyo mu nyiingo;
omwooyo kwaange kuli koti obubbaani
kusaanguluuhire mu sirifu syaange;
15amaani kaange komeraane koti olucho,
haandi olulimi lwaange lunyaandire mu sidahula;
wuundehere fwiire aasi mu lufu.
16Eee, embwa chiri aambi naange;
esidiiyiha sy'abahola-mbi sindebodoohaanie;
bafumiite amahono neende amakulu
17Amakuumba kaange koosi katulireyo mani nyala ohukabala koosi,
abasuku baange baandi banyekera emoni;
18 #
Mat 27:35; Mrk 15:24; Luk 23:34; Yow 19:24. bali ohukabanamo engubo chaange,
boobba eha hu ngubo chaange.
19Nae ewe Omwaami, otaandetusaho!
Niiwe obuhoonyi bwaange, yanguyaho wuhoonye.
20Monie olugaanga,
monie sikolola-muhira eyiri embwa.
21Monie takwa mu muuhanwa kw'edalang'i,
omwooyo kwaange kubweeremo amaani, kuwonie enjika ch'emboko!
22 #
Abaib 2:12. Njia ohufumia eliita lyao eyiri abeebulanwa baange;
mu lwichuule lw'abaandu njia ohuhukinia:
23Eng'we abatya Omwaami, mumufumie!
Eng'we abaana ba Yakobbo mweesi, mumwiisemo oluyaali,
eng'we abaana ba Yisiraeli, mumwiisemo oluyaali!
24Olwohuba haba salekeeresaanga oba yebwaaba
ebidinyu by'omuundu wusaanda;
oba ohumufudatira, haba s'abasyuula,
nae awulira amaliro kae.
25Niiwe owukeraanga niihufumia ni ndi mu lwichuule lw'abaandu;
njia ohwolereresa esyeyamo syaange mu moni waabo abamutya.
26Abamanani bachia ohulya mani beekute;
abo abakoonya Omwaami bachia ohumufumia.
Leha bayiindire endaalo choosi!
27Esyaalo syoosi sichia ohwiichulisa
mani abaandu basyo bakaluhe eyiri Omwaami;
haandi abaandu bomu syaalo boosi
bachia ohwiinamira Omwaami.
28Olwohuba Omwaami niye omweene bunyala,
haandi niye owutuka ebyaalo byoosi.
29Abaandu balya byoosi bi badaha, baamala bamwiinamira;
Eee, abehuduumbasa bohu syaalo boosi bachia ohumwiinamira; neende abo boosi abachia ohufwa bachia ohumwiinamira, neende oyo yesi owutanyala ohubao omulamu hulwae omweene.
30Abaandu baheebulwe bachia ohumuhalaabanira;
abaandu bachia ohweekesa olwiibulo lwiicha ebidiira hu Omwaami,
31mani bayaalire abaandu basisiiri ohwiibulwa obuwonia bw'Omwaami,
bati Nasaae niye owahola sino.
Currently Selected:
Esabbuli 22: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
