Esabbuli 21
21
Ohufumia hulw'ohuyiingira.
1Ewe Omwaami, amaani kao kaleeteraanga omutuki esangaalo; haandi yehoya olwohuba obuhoonyi bwao eyiri omutuki buungi muno.
2Omubereese esiindu si mwooyo kwae kwekoomba, haandi haba somwiimire esiindu si yahusaba.
3Olwohuba omubereese ehabi nyiingi muno;
omufwaalire ekofia y'esaabbu hu mutwe kwae.
4Yahusaba obulamu, mani waamuberesa,
yayiindira endaalo choosi pe.
5Oluyaali lwae luungi muno ohweema hu buhoonyi bwao;
wamubereesa efuma neende amaani.
6Eee, wakera yaaba neende ehabi nyiingi muno endaalo choosi;
wakera yehoya neende esangaalo olwohuba ewe oli nae.
7Olwohuba omutuki oyo yeesika Omwaami;
haandi ohweema hu buheeri butaakama bw'oyo ow'Aakulu Muno, achia ohwomiira.
8Omuhono kw'omutuki kuchia ohukiiya abasuku bae boosi;
omuhono kwao muluungi kuchia ohuwaamba abo abatahudaha.
9Wahabahole baaba koti omuliro kw'esiroombe
oludaalo lu wahabonehereho.
Omwaami achia ohubasihirisa abamaleo mu tima lyae;
haandi omuliro kuchia ohubasihirisa.
10Ochia ohusihirisa olwiibulo lwaabwe lutule hu syaalo,
haandi abaana baabwe bosi batule hu lwiibulo lw'abaandu.
11Nibaba neende endekeha embi nibahuyiingania,
nibaheenga ohuhulyamo olukwe, haba sibahanyale.
12Olwohuba ochia ohukera beeruhe;
n'obachomiisye obusaale bwao mu moni waabwe.
13Omwaami ofumisibwe hulw'amaani kao!
Huchia ohweemba haandi hukinie amaani kao.
Currently Selected:
Esabbuli 21: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
