Engaado 20
20
1Amalwa kabachirisa abakang'wa, haandi ebimeesa bikera nibayokera;
haandi oyo yeesi yikakosa aba omusiru.
2Omutuki n'anyoolera aba koti edalang'i yiwoola;
mani oyo amunyoolesa aba yeyiita omweene.
3Sy'oluyaali omuundu ohwekaya obusoolo;
nae abasiru nibo abadaha ohusoolanaanga.
4Omukata haba salima efula niyikwa;
yahakoonye esy'ohukesa mani ahaye ohunyoola.
5Esichiririra sy'ebibaaso by'omuundu siri koti amaachi komulusiba,
nae omuundu muwuliri niye okadaya.
6Abaandu baangi beelaanga abeene bati b'esisa haandi b'obwadyeeri,
nae wiina mweene onyala ohwakaana omuundu wadyeeri?
7Omuundu muluungifu akeendera mubwadyeeri bwae haandi omweesikwa
abaana bae baliba ab'ehabi naafwiire.
8Omutuki niyehala hu sisaala sy'ohuheenga omusaango,
atingaala neende emoni n'amanya esibi neende esilai.
9Wiina onyala ohuboola ati, “Ndalabya omwooyo kwaange;
ndi omwoolerefu, mbulaho esibi syoosi”?
10Elatiri hyaamu neende ebipiimiro bihyaamu
Omwaami sabadahiraho elalira.
11Kata omwaana muyere yeesi byaahola byeekesa koti lwaali,
onyala ohumanya oti w'obwadyeeri haandi mulai niye.
12Amatwi kawulira neende emoni chibona,
byoombi Omwaami niye owabiloonga.
13Otekoombaanga endoolo, oba wekoonyera obumanani;
bechaanga mwaaywe, mani olinyoola ebyohulya biingi.
14Omukuli aboola ati, “Sino sibi nisyo, sino sibi nisyo,”
nae naamala ohusikula awaao niyepaaha ati, “Sino ndoolere budoola”.
15Yiriyo esaabbu, haandi yiriyo amakina k'engaanga maangi muno;
nae siriwo esy'engaanga sitahirwa, niye omuundu olomaloma ebyaamakesi.
16Omuundu wemerera omuteende ahoyera ohusingao engubo yae,
haandi omweene ohuyera ohwesingao niyeemerera bawalukeendwa.
17Omuundu anyunyuulirwa ebiindu bi aduhaane mu bubacha,
nae luunyuma bimwechuuhira yaaba koti olya omusenye.
18Silai ohukerakirwa mberi hu wahola esiindu;
kata ohulwaana hwosi hudaha omuundu oberesa amakesi.
19Oyo okeesa otuhuwa-huwa haba sabiiha esyaama;
mani sakira otabechaanga omwiicha w'omuundu olomaloma eby'obusiru.
20Omuundu n'abwaaba laatang'ene oba ng'ina,
obulamu bwae bwahabe koti etaara lisimiiswe mu siirima sya titititi.
21N'onyoola ebiindu byotatangiire ohuhalaabanira,
muhumaliiriha sibirimo ehabi.
22Otaboola oti, “Njia ohwetuunga esibi”
liinda Omwaami mani achia ohuhuhoonya.
23Elatiri hyaamu ch'omusiro eyiri Omwaami,
haandi ebipiimiro bitaali ebyadyeeri haba si bilai.
24Omwaami niye otuka engeenda yeefwe;
mani omuundu anyala atye ohumanya engira y'obulamu bwae yi adiirire.
25Kuba omuteego eyiri omuundu ohwanguya ohuboola ati, “Syoolerefu nisyo,”
mani yachaaka ohweyichulisa luunyuma n'amalire ohweeyama.
26Omutuki mukesi amanya bumanya abahola-mbi,
mani yabasaandya neende obwalaba.
27Omwooyo kw'omuundu nilyo etaara li Omwaami yamutaamo.
28Esisa neende obweesikwa nibyo ebikera omutuki yayiindira mu butuki,
haandi obuluungifu bwae nibwo obwomiisa esisaala syae.
29Oluyaali lw'abaraaga nilwo amaani kaabwe,
nae oluyaali lw'abakofu nicho embuchi chaabwe.
30Endawusi yiwumisa niyo eyikolola esaambo mbi,
haandi ohuhuywa humalamo emise mibi.
©Bible Society of Kenya, 2019
©Bible Society of Uganda, 2019