Engaado 19
19
1Omumanani oholera hu bwadyeeri
ahira omubacha musiru.
2Haba sisilai ohuhola esiindu notabaasire mberi,
haandi ohutesimirisira ebiindu hukera watula hu ngira ndai.
3Omuundu n'ahola eby'obusiru omweene yereetera ohusihirira,
mani haandi n'achaaka ohwolobya Omwaami.
4Omuyiinda yemeeda sa ohuba neende abeecha bayaaha,
nae omumanani abeecha bae bamwiiruhaho.
5Oyo otusa obuloli bw'obubacha yahasaandisibwe,
haandi oyo owebbwangula neende obubacha abula obuchiiro.
6Baangi muno abakoonya obuhoonyi eyiri omuundu mukabi,
haandi buli muundu yekoomba ohuba omwiicha w'omuundu oberesa ebiyaanwa.
7Kata abeeho b'omuundu mumanani babula obuhoonyi yaali;
sakira abeecha bae bamwiiruhaho.
Ateemaho koti lu anyala ohubekweeda, nae nibawaao haba sibakobola haandi daawe.
8Oyo onyoola amakesi omweene yeedaha;
haandi oyo owichulisa bi yeeka achia ohuhula-hulana.
9Oyo otusa obuloli bw'obubacha yahasaandisibwe,
haandi oyo owebbwangula neende obubacha yahasihirire.
10Omusiru haba saahoyera ohumenya mu bulamu bulai,
nasilala haandi omuwaambe haba saahoyera ohutuka abaana b'abatuki.
11Ow'amakesi haba s'anyoolera bwaangu,
haandi luba oluyaali lwae ohutadeeba hu abamuholera esibi.
12Etima ly'omutuki liri koti ohuwoola hw'edalangi,
nae esisa syae siri koti olume lunyisa obunyaasi.
13Omwaana musiru aleetera laatang'ene ohusihirira,
haandi obusoolo bw'omuhasi nibwo efula yitaakama.
14Enyuumba neende obuyiinda obitusa hu laatao,
nae ohunyoola omuhasi muwuliri siba esiyaanwa ohutula eyiri Omwaami.
15Omuundu mukata yeyalisa endoolo nyiingi muno,
nae oyo otahola emirimo yahalumwe enjala.
16Oyo oliinda ebilagiro, aliinda obulamu bwae;
nae oyo olekeeresa emboosi yahafwe.
17Oyo okwiira abamanani esisa, ali koti oweyosa Omwaami,
Omwaami achia ohumutuunga ohweema hu biholwa byae.
18Kolola omwaana wao ebiha nibisisiiri,
ohaye ohumufwiirwa.
19Omuundu w'etima liingi, engisa yahamunyoole;
olwohuba kata nomuwonia ehabi litaangira, oli neende ohumuwonia ehabi liindi haandi.
20Tekeresaanga ohukerakwa haandi ofukiirire ohweeka,
hu onyale ohuba neende amakesi buli ludaalo.
21Abaandu batekeha ebiindu biingi muno eby'ohuhola,
nae Omwaami bi adaha nibyo obyolereera.
22Esikera omuundu yekoombwa nisyo esisa syae,
haandi kata omumanani ahira omubacha.
23Ohutya Omwaami huleeta ohuyiindira;
haandi oyo oli nahwo aba omugumu;
esidinyu haba sisyahamwooleho.
24Omukata ata omuhono mu nuungiro yenula,
mani yahaya ohuta ebyohulya muhanwa.
25Saandya omulekeeresi, mani abaloonga neende amakesi banyoole elyeeko,
kerakira omuundu muwulisi, mani achia ohwemeeda amakesi.
26Oyo osaandya laatang'ene, oba yeerusa ng'ina,
niye omwaana wereetera esoni haandi yemalamo oluyaali.
27Mwaana waange, niwaakama ohukerakirwa
wahebirire kata ebiindu bi wali niwamanya.
28Omuundu otusa obuloli butaalimo obuhoonyi, alekeeresa obwadyeeri,
haandi omunwa kw'abahola-mbi kwekoomba ohuhola ebibi.
29Abalekeeresi bahahirwe omusaango,
haandi abasiru bahahuywe endawusi.
©Bible Society of Kenya, 2019
©Bible Society of Uganda, 2019