Engaado 15
15
1Ohukobolamo kaala hwakamya etima,
nae emboosi ch'obwaalaba chisiingisa etima.
2Abakesi balomaloma ebiindu bihoyera,
nae abasiru balomaloma ebitahoyera.
3Omwaami abona buli abuundu,
atubona nihuhola esibi oba esilai.
4Ohulomaloma neende esisa huleeta obulamu,
nae enomanoma y'obwalaba yimalamo omwooyo.
5Omusiri alekeeresa engeraka ya laatang'ene,
nae oyo omuundu muwuliri afukiirira ohwolobwa.
6Mu madaala k'abaandu baluungifu mubaamo obuyiinda buungi,
nae mu ngaanga ch'abahola-mbi haba simubaamo omuleembe.
7Abakesi bi balomaloma byeekesa ohumanya,
nae ebibaaso by'abasiru haba sibiri bityo.
8Esiyaanwa sy'abahola-mbi syoomusiro eyiri Omwaami,
nae ohwekongooya hwo muluungifu husangaasa Omwaami.
9Omwaami haba saadaha engeri y'abahola-mbi,
nae adaha abateemaho ohuhola ebiluungifu.
10Oyo otula hu ngira y'obwadyeeri, wohusaandisibwa muno,
oyo otadaha hukololwa achia ohufwa.
11Omwaami amanyire ebidiira hu emakoombe neende Abbadoni,
mani siina esimukayira ohumanya ebidiira hu myooyo ky'abaandu!
12Omuundu mulekeresi haba s'adaha hwolosibwa;
haandi haba s'adaha ohweteebaho hu baandu bamuhiraho amakesi.
13Omusangaafu mu mwooyo, amweenya,
nae owengisa mu mwooyo, omumanyira mu moni.
14Ebibaaso bw'omuundu muwuliri bikoonya ohumanya,
nae abasiru basangaala mu butamanya.
15Endaalo choosi ech'abaandu basaandisibwa mbi nicho,
nae abasangaafu mu mwooyo bali koti abali mu sidyaalo sy'endaalo sitakama.
16Ohuba neende ebidiidi notya Omwaami,
silai ohuhira ohuba neende ebiingi nonyoola ebidinyu.
17Silai ohulya elyaani ni mwaheerana,
ohuhira ohulya ebiriiro nimuhayaane.
18Omuundu w'etima asiingisa obusoolo,
nae omudiira kaala amalao amayiingi.
19Engira y'omukata, lukaka lw'amawa,
nae omuhoosi kw'omuluungifu, nikwo engira ngwalaafu.
20Omwaana mukesi, niye esangaalo lya laatang'ene,
nae omuundu musiru aswaasa ng'ina.
21Otali omukesi asangaalire obudoondobanu,
nae omuundu muwuliri adaha ohuhola ebilai.
22Ataali ohukerakirwa, s'onyala huhola esilai,
nae nooli neende abahukerakira, buli siohola sibitamo.
23Ohukobolamo ebyadyeeri, nilyo esangaalo ly'omuundu,
haandi emboosi yadyeeri mu biha bilai, ndai niyo.
24Abaandu b'amakesi badiira engira yicha eyiri obulamu,
hu banyale ohwebwaaba eyihirira Seyoli mu makoombe.
25Omwaami asihirisa amadaala k'abaandu beehuduumbasa,
nae aliinda haandi yomiisa ebiindu by'abahasi bafwiirwe.
26Ebibaaso by'abahola-mbi by'omusiro eyiri Omwaami,
nae asangaalira emboosi ch'abaandu boolerefu.
27Oyo olaluhira engaanga yanyoola mu ngira mbi, aleetera edaala lyae ebidinyu,
nae oyo otakulirirwa, niye owahawangaale.
28Abaandu baluungifu babaasa mberi hu bakobolamo,
nae ababi balomaloma ebitahoyerwa.
29Omwaami haba s'adeeba hu bahola-mbi,
nae awulira ohwekongooya hw'abaluungifu.
30Omuundu oli neende esangaalo mu moni aleeta esangaalo mu mwooyo,
haandi emboosi ndai chileeta omwehoyo.
31Omuundu ofukiirira ohukerakirwa ebimwoombaha,
achia ohubalirwa mu b'amakesi.
32Oyo ohaya ohukerakirwa, omweene yefwiirisa,
nae oyo ofukiirira ohukololwa, yemeeda ohumanya.
33Ohutya Omwaami, nihwo ohukerakirwa mu makesi,
haandi obuloonga nibwo obutaangirira ohunyoola oluyaali.
©Bible Society of Kenya, 2019
©Bible Society of Uganda, 2019