Engaado 14
14
1Amakesi k'omuhasi niko akoombaha edaala,
nae obusiru bwae nibwo obulisihirisa.
2Oyo okeendera mu buluungifu yekesa koti lu yeesa oluyaali mu Omwaami,
nae omudoondobanu yekesa koti lu alekeeresa Omwaami.
3Enomanoma y'omusiru niyo endawusi yimuhuya,
nae enomanoma y'abakesi niyo eyibaliinda.
4Ataali endaawu chirima, ebyaaki by'emere biba ebihaya;
nae ali endaawu chirima, ebyaaki biichulamo emere.
5Omuloli w'obwadyeeri haba saabacha,
nae omuloli w'obubacha alomaloma eby'obubacha byoong'ene.
6Omuundu mulekeresi akoonya amakesi mani yahaya ohukanyoola,
nae omuundu muwuliri amanya bwaangu.
7Tula eyiri omusiru
olwohuba abula esilai syahweekesa.
8Amakesi k'omuundu muwuliri kamweekesa esy'ohuhola,
nae obusiru bw'abasiru bubabachirisa.
9Nasaae asaandya abahola-mbi,
nae abaluungifu banyoola esisa syae.
10Omwooyo kweene nikwo okumanyire engisa yakwo,
haandi abulao omuundu wuundi omanyire esangaalo lyakwo.
11Enyuumba y'omubi yahasihiriswe,
nae esikaali sy'omuluungifu syahadoong'e nisyeemere.
12 #
Eng 16:25. Engira yi muundu yabaasirisa ati ndai,
nayo niyo eyimuyira mu hufwa.
13Enjeho chinyala ohukisa engisa,
haandi esangaalo yatulamo ohweyendeherera.
14Omuundu muhyaamu yeechulamo ebyaamo by'engira chae mbi, nae omuundu mulai yeechulamo ebyaamo byae bilai.
15Omuundu musiru afukiirira buli siindu,
nae omumanyirisi ataangira yehaliirisa mberi yali ohuchia.
16Omuundu mukesi yehaliirisa bulai mani yaahaya ohuhola esitahoyera,
nae omusiru saadebayo mani yaabbibbilihana bwaangu ohwonoona.
17Omuundu w'etima lya bwaangu ahola ebitaalimo amakesi,
nae omuundu mukesi mudiira kaala niye.
18Abasiru banyoola ebihoyera neende obusiru bwaabwe,
nae abakesi banyoola omukabo kwohumanya.
19Ababi beenamira abalai,
abahola-mbi bahekweede abaluungifu.
20Abulao omuundu odaha omumanani, kata yaahaba owaasye mweene,
nae abayiinda baba neende abeecha baangi.
21Oyo olekeeresa owaasye, muhola-mbi niye,
nae oyo okwiira abamanani esisa, aba neende ehabi.
22Ababaasa ohuhola ebibi badoondobanu,
nae ababaasa ohuhola ebilai banyoola oluyaali haandi babesika.
23Muhudidiihana hwoosi mulimo engaanga,
nae ohulomaloma hwoong'ene huleeta obumanani.
24Omusaara kw'abaandu bakesi nikwo amakesi kaabwe,
nae abasiru obamanyira mu busiru bwaabwe.
25Omulori alomaloma obwadyeeri awonia obulamu,
nae oyo owebwangula neende obubacha, alya mu baandu olukwe.
26Mu hutya Omwaami, omuundu anyoola obugumu,
haandi abaana bae bahanyoole obweyikamo.
27Ohutya Omwaami nimwo mu bulamu butula,
hu muundu anyale ohuwona emiteego ch'ohufwa.
28Oluyaali lw'omutuki lweema hu buungi bw'abaandu baatuka,
nae omutuki obula abaandu baatuka abula oluyaali.
29Oyo otanyolera bwaangu awulira muno,
nae ow'etima lya bwaangu, akinia obusiru.
30Oyo oli neende omuleembe mu mwooyo, omubiri kwae kwosi kuba omulamu,
nae embaliha yikera amakuumba nikahomaka.
31Oyo ofwiinyirira omumanani, aba alekeeresa omuloongi wae,
nae oyo okwiira esisa ababi mu budahano, yeyisamo oluyaali.
32Abahola-mbi basihirira mu huhola ebyonoono hwaabwe,
nae abaluungifu bafwa nibali neende esuubi.
33Amakesi kamenya mu bibaaso by'omuundu muwuliri,
nae esiri mu myooyo ky'abasiru haba sisimanyihaane.
34Obuluungifu buleetera esyaalo oluyaali,
nae esyonoono simala oluyaali mu muundu yeesi.
35Omuhalaabani ohola emirimo kyae neende amakesi asangaasa omutuki,
nae anyoolerera oyo ohola eby'esoni.
©Bible Society of Kenya, 2019
©Bible Society of Uganda, 2019