Obbadia 1
1
1Buno nibwo obunabbi bu Obbadia yanyoola ohutula eyiri Omwaami Nasaae obudiira hu Edomu.
Omwaami achia ohusaandya Edomu
Omwaami atumire wamwaanda wae eyiri ebyaalo,
mani huwuliire emboosi yae yiboola yiti:
“Eng'we mweetekehe! Lehe huchie huseete Edomu husilwaanie ebiita!”
2Omwaami aboolera Edomu ati: “Ese njia ohuhukatayasa;
mani olekeereswe muno neende ebyaalo biindi.”
3Ohwehuduumbasa hwao huhubachiriise.
Wombaha esiko syao hu lwaanda lwoomu;
edaala lyao liri aakulu mu ngulu,
mani weteeba omweene oti:
Wiina mweene owahanyale ohuunyanula ohutula eyo?
4Kata owaheeyaniha aakulu koti eeswi,
mani esiyu syao syaaba koti esiri mu ng'ining'ini,
nae njia ohuhwaanulayo wiihe aasi.
5Abeebi beecha esiro,
bayiraanga ebiindu bi badaha byoong'ene.
Abaandu nibanoka emisabbiibbu,
baleheraangaho abamanani ekiindi.
Nae ewe abasuku bao bahahusihirisire elalira.
6Obuyiinda bw'abeechuhulu b'Esau
buyaayirwe bwoosi.
7Abo boosi bamwaholeraanga alala nabo bababachirisa sa,
mani nibabeerusa ohutula mu syaalo syeeng'we.
Abaandu bamwauliirisanianga nabo bulaanu babayingiire;
Abeecha beeng'we bamwesikaanga nibo ababatekere omuteego.
Babalomalomaho bati: “Eng'we mubulamo amakesi.”
8Omwaami aboola ati: “Hu ludaalo olwo,
ndahasihirise abaandu bakesi bomu Edomu,
haandi abamanyihana bahawe hu lugulu lwa Esau.”
9Mani abaandu balwaani b'amaani bomu Temani bahakweemo oluteengo,
mani buli munamaye omulwaani yaheetwe.
Esifune sy'ohusaandya Edomu
10Koti lu mwayaaya haandi mwetaanga abeeho beeng'we beene abo, ab'olwiibulo lwa Yakobbo,
mwahasihiriswe sa,
mani esoni chaabadiira endaalo choosi pe.
11Hu ludaalo lu basuku bafunakiraho enjiki chaabwe,
eng'we mweema sa hu ndulo mwaawuleera.
Mwesi mwali ababi koti bawalukeendwa abo,
abanyaka ebiindu mu Yerusalemu
mani nibabikabanamo.
12Nae eng'we haba simwahahoyere ohusangaalira oludaalo
lu beeho beeng'we banyooleraho amasira.
Haba simwahasangaalire olwohuba Abayudaaya
banyoola ebidinyu hu ludaalo olwo.
Simwahahoyeere ohubacheha
nibali mu bidinyu daawe.
13Mwali nimutahoyera ohwiingira mu siko sy'abaandu baange
hu ludaalo lw'amasira kaabwe.
Simwahahoyeere ohuyaaya ebiindu byaabwe
hu ludaalo lw'amasira kaabwe olwo.
14 #
Yis 34:5-17; 63:1-6; Yer 49:7-22; Esek 25:12-14; 35:1-15; Amos 1:11,12; Mal 1:2-5. Mwali simuhoyeere ohweema sa hu masang'aangira
nimudiira abo abali nibeeyonia.
Eng'we haba simwali nimuhoyeere ohubakedaanga nimubokobosa eyiri abasuku baabwe
hu ludaalo lwaabwe lw'amasira daawe.
Nasaae achia ohuheengera ebyaalo omusaango
15“Oludaalo luli aambi ohwoola, lu Ese Omwaami
njia ohuheengera ebyaalo byoosi omusaango.
Ewe Edomu, esiindu si wahola, wesi sichia ohuhweeholaho.
Ebiindu bi wahola byahahweeholeheho ewe omweene.
16Olwohuba abaandu baange bamala ohung'weera hu lugulu lwaange lwoolerefu esikoombe silulu syohusaanda.
Nae ebyaalo byoosi ebyebodoohaanie,
bichia ohung'wechaanga esikoombe sihiramo obululu esy'ohusaanda;
Byahasiinywe neende emisi mani byaasihirisirwa elalira.
Ohuyiingira hw'Abaisiraeli
17Nae abaandu baandi bachia ohuwonera hu Lugulu lwa Siyooni,
haandi bahabe aboolerefu.
Mani ab'olwiibulo lwa Yakobbo baheekalusire esyaalo syaabwe syeene.
18Ab'olwiibulo lwa Yakobbo
neende ab'olwiibulo lwa Yosefu bahabe koti omuliro;
mani bahasaambe ab'olwiibulo lwa Esau koti lu muliro kwahasaamba amasaanja.
Bahabasaambe mani baabasihirisa,
mani yibuleo ow'olwiibulo lwa Esau owahadoong'e naali omulamu.”
Olwohuba Ese Omwaami Niise oboolere.
19Abomu Negebbu, bahayire Olugulu lwa Esau,
haandi abomu Sefela, bahayire esyaalo sy'Abafilisiti.
Abaisiraeli bahayire esyaalo sy'Efuraimu neende Samaria.
Abomu Bbenjamini, bahayire esyaalo sya Gileadi.
20Mani ab'Amaye ba Yisiraeli abayiingirirwa mu Haala
bahakobole mani bawaambe Foenisia ohwoolera elalira Sarefaati.
Haandi eye ly'abo abatula mu Yerusalemu, abayiingirirwa mu Saridiisi
bahawaambe ebiko bya Negebbu.
21Abahayiingire bahaniine hu Olugulu lwa Siyooni
mani batuke Olugulu lwa Esau;
mani obutuki buchia ohuba obw'Omwaami mweene.
Currently Selected:
Obbadia 1: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
