Ohubala 31
31
Ebiita byoolerefu hu Midia
1Omwaami yaboolera Musa ati, 2“Chia osaandye Abamidia hulw'esiholwa sibahola abaandu ba Yisiraeli. Noomala otyo, ewe omweene ochia ohufwa.”
3Mani Musa yeecha yaboolera abaandu ati, “Eng'we mwetekehere ebiita, hu muchie museete Midia, mubabonerese hulw'esiholwa sibahola Omwaami. 4Ohutula hu buli nono ya Yisiraeli tusaho abasaacha elifu ndala obatume bachie mu biita.”
5Mani abasaacha elifu ndala baalobolwa ohutula mu buli nono, boola obuungi bw'abasaacha elifu ehumi neende chibiri (12,000) abeetekefu ohulwaana ebiita. 6Musa yaabatuma bachie mu biita nibemiriirwe neende Finehaasi omwaana wa Eliasaari omulaamisi, owali omuliindi w'ebiindu bilafu neende eturumbete chitusa esilolero. 7Baseeta Midia, koti lu Omwaami yali n'alagiire Musa, mani baanyala ohwiita abasaacha boosi, 8n'oyiriiremo neende abatuki bataanu aba Midia: Efi, Rekemu, Suuri, Huuri, neende Rebba. Haandi beeteramo neende Bbalamu omwaana wa Bbeyori.
9Abaandu ba Yisiraeli banyala ohupeeya abahasi Bamidia neende abaana beene, baayira neende eng'oombe chaabwe, neende amakoondi kaabwe, bayaaya obunyali bwaabwe bwoosi, 10haandi baamala basaamba ebiko byaabwe byoosi, haandi neende amakaambi kaabwe koosi. 11Beecha mani bakiinga ebiwaambe byoosi bi bali nibapeeyere, noyiriire alala ababoye neende ebisolo byoosi, 12babileeta eyiri Musa neende Eliasaari haandi neende eyiri omukaanda kw'abaandu ba Yisiraeli kwoosi, abali nibali mu kaambi eyali syaalo sikwalaafu sya Moabbu engereha wa Yorodaani n'otulira Yeriko.
Eye likobola
13Musa, Eliasaari, alala neende abeemirisi baandi boosi baatula erwaanyi w'ekaambi, ohuchia ohubukaanira eye. 14Musa yeecha yanyoolerera muno abahoongo b'eye, abahoongo b'ebitaliani neende amakaambuni, abakobola ohutula mu biita. 15Yeecha yaabateeba ati, “Eng'we lwasiina mulehere abahasi boosi nibali abalamu? 16#Hub 25:1-9.Mwiichulise muti yali omuhasi niye owaloonda ebilagiro bya Bbalamu, mani nibali Peyori yeemirira abaandu bahaya ohufukiirira mu Omwaami. Esyo nisyo esyeecha syaleeta oluumbe lubi muno ohwiita abaandu b'Omwaami. 17Mani bulaanu, yite buli mwaana musyaani neende buli muhasi wamala ohukonaho neende omusaacha, 18nae mweelehere abaana bahaana boosi boong'ene neende abahasi boosi abali nibataamanyaho eby'abasaacha. 19Nae bulaanu, eng'we mweesi abeetereho omuundu yeesi, oba abadiirireho hu mulaambo kwoosi, muhoyere ohudoong'a erwaanyi w'ekaambi ohumala endaalo chitaanu-na-chibiri. Hu ludaalo lwa hadatu, haandi neende hu ludaalo lwa hataanu-na-habiri, muhoyere ohwelabyaanga alala neende abahasi beeng'we bamupeeyere. 20Muhoyere haandi ohulabya buli ngubo yoosi neende buli siindu syoosi esyaholwa mu seero, obwooya bw'embusi, oba embaao.”
21Eliasaari omulaamisi yeecha yaboolera abasaacha bali nibakoboole ohutula mu biita ati, “Bino nibyo ebilagiro bi Omwaami yaberesa Musa. 22Esaabbu, efeesa, omugasa, ebichuma, amabbaati, neende leedi, nibyo ebihoyeere ohulabiswa neende ohubiswa mu muliro. 23Nae buli siindu syoosi esitanyala ohuta mu muliro sihoyeere ohulabiswa neende amaachi k'ohulabisibwa. 24Hu ludaalo lwa hataanu-na-habiri muhoyere ohwosaanga engubo cheeng'we; ao muba muchia ohubechaanga nimuli abalafu, mani muba muchia ohuba nimunyala ohufukiirirwa ohwiingira mu kaambi.”
Ohukabana ebipeeyerwe
25Omwaami yaboolera Musa ati, 26“Ewe neende Eliasaari, alala neende abeemirisi baandi b'omukaanda kuno, muhoyere ohubala buli siindu syoosi esyapeeywa, n'oteereho neende abaandu baboe boosi neende ebisolo byoosi. 27Kabulemo ebiindu byoosi ebyapeeywa mu mahabi kabiri akaakanirira, esituundu silala sichiire abalwaani, nae esituundu siindi sibe esy'omukaanda kuno kwoosi okw'abaandu. 28Ohutula hu situundu sy'abalwaani, tusaho omusolo kw'Omwaami okwa mulala hu buli baboe emia chitaanu, haandi obuungi bwaakana butyo obw'eng'oombe, esuhiri, amakoondi neende embusi. 29Mu biberese Eliasaari omulaamisi koti obuhoonyi bw'enjaulo eyiri Omwaami. 30Nae ohutula hu situundu esyabereswa abaandu boosi, bukulaanga mulala ohutula hu baboe amahumi kataanu, haandi obuungi bwaaka butyo obw'eng'oombe, esuhiri, amakoondi, alala neende embusi. Mu biberese Abaleefi abali mu buliindi bw'Eyeema ly'Omwaami.” 31Musa neende Eliasaari baahola sa koti lu Omwaami yali n'alagiire.
32Bulaanu, ebyapeeywa byali nibidoong'ereho ohutula hu biindu byayaaywa bi basaacha balwaani babukulaanga byali: amakoondi elifu emia chisaasaba neende amahumi kataanu-na-kabiri neende chitaanu (675,000), 33eng'oombe elifu amahumi kataanu-na-kabiri neende chibiri (72,000), 34esuhiri elifu amahumi kasaasaba neende ndala (61,000), 35nae abaandu elifu amahumi kadatu neende chitaanu (35,000) alala, abahasi bali nibatanyaho eby'abasaacha nibatakonaho nabo. 36Haandi neende esituundu, omukabo kw'abo abali nibachia mu biita, alala mu buungi kali amakoondi elifu emia chidatu neende amahumi kadatu neende chitaanu-na-chibiri neende emia chitaanu (337,500), 37nae omukabo kwali okuchiira Omwaami kwali amakoondi emia chisaasaba neende amahumi kataanu-na-kabiri neende kataanu (675). 38Eng'oombe chali elifu amahumi kadatu neende chisaasaba (36,000), echaliho neende omukabo kw'Omwaami okw'eng'oombe amahumi kataanu-na-kabiri neende chibiri. 39Esuhiri chali elifu amahumi kadatu neende emia chitaanu (30,500) nichiriho neende omukabo kw'Omwaami kw'esuhiri amahumi kasaasaba neende ndala. 40Abaandu bali elifu ehumi neende chisaasaba (16,000) n'oteereho omukabo kw'Omwaami okw'abaandu amahumi kadatu neende babiri. 41Mani katyo, Musa yeecha yaaberesa Eliasaari omusolo okwo koti obuhoonyi bw'enjaulo eyiri Omwaami, koti lu Omwaami yali n'alagiire Musa.
42Ohutula hu situundu sy'abaandu ba Yisiraeli, si Musa yakabula ohutula hu sy'abasaacha bali nibachia mu biita 43bulaanu esituundu sy'omukabo kw'abaandu kwali nikwoola amakoondi, elifu emia chidatu neende amahumi kadatu neende kataanu-na-kabiri neende emia chitaanu (337,500), 44eng'oombe elifu amahumi kadatu neende chisaasaba (36,000), 45neende esuhiri elifu amahumi kadatu neende emia chitaanu (30,500), 46neende abaandu elifu ehumi neende chisaasaba (16,000) 47Ohutula hu mukabo kuno, Musa yeecha yaabukulaanga silala hu buli amahumi kataanu ak'abaandu oba ebisolo, mani koti Omwaami yali n'alagiire, naaberesaanga Abaleefi abali nibaliindire Eyeema ly'Omwaami.
48Mani abahoongo bali nibeemiriire eye bachia eyiri Musa 49mani baboola bati, “Ewe omuhuluundu, hubalire abalwaani boosi abali aasi weefwe, nae abulao kata mulala obulaho. 50Mani huli ohuleeta ebyefwaalo byesaabbu, amaroonge kohumahono, enyolo choohu mahono engila chohuunjala, ebitaadi by'ohumatwi, enyolo chomuukosi bi buli otula hweefwe yali n'abukuule. Huli ohubiyaanira Omwaami, koti omutaango kwobulamu bweefwe, hu anyale ohutuliindaanga.” 51Musa neende Eliasaari babukula esaabbu eyo yoosi eyali niyiri mu biindu byeefwaalwa hu mubiri. 52Ebyebuusa ohutula hu bahoongo byeecha byaanyala ohuyera obusito bwa ekiloguraamu emia chibiri (200). 53Nae abo boosi abali nibataali abahoongo bahayira hu byayaaywa bi bali nibabukuule. 54Mani Musa neende Eliasaari, baabukula esaabbu eyo, mani nibamala nibayiyira mu Yeema, hu Omwaami anyale ohuliinda abaandu ba Yisiraeli boosi.
©Bible Society of Kenya, 2019
©Bible Society of Uganda, 2019