Ohubala 30
30
Amalako kadiira hu hweechuba
1Musa yaberesa ebilagiro bino biti abeemirisi b'enono ch'Abaisiraeli. 2#Amal 23:21-23; Mat 5:33.Omuundu yeesi niyeechuba ohuberesa Omwaami esiindu nabulebe, oba alayira ohwekaya esiindu syoosi, haba s'ahoyeere ohuhalaka esisuubise esyo daawe, nae ahoyere ohuholaanga buli siindu syoosi syaaba n'aboolere ohuhola.
3Omuhaana naaba nasiimenyere mu nyuumba ya laatang'ene, niyeechuba ohuberesa Omwaami esiindu syoosi, oba asuubisa ohwekaya ohuhola esiindu syoosi, 4aba ahoyere ohuholaanga buli siindu syaaba niyeechubire oba nasubiise, ohutusaho laatang'ene niyeecha yasiyiingania naaba niyeechere yaasiwulira. 5Nae nikali mbwe laatang'ene niye omukayira ohwooseresa esisuubise esyo naaba hu siyahasiwuliraho, haba saaba ahoyera ohusyoseresa daawe. Omwaami aba achia ohumuleheramo, olwohuba laatang'ene niye oba naamukayiire ohusyooseresa.
6Omuhasi otadeeha n'ahola esichubo, oba n'achiiririire oba n'adoondobaane sa, oba n'asuubisa ohwekaya esiindu syoosi, niyeecha luunyuma haandi yadeeha, 7aba asiihoyeere sa ohuhola yooseresa esyo syoosi syaaba niyeechuba oba niyasuubisa, ohutusaho, wamwe niyeecha yaasiyiingania niyeechere yaasiwuliraho. 8Nae wamwe naamukaira ohusyooseresa esichubo esyo naasiwuliireho, haba saaba nasiihoyera ohusyooseresa daawe. Omwaami aba achia ohumuleheramo.
9Omuhasi mufwiirwe oba omuhasi walehanira elalira neende ebyohudeehisania, ahoyere ohwooseresaanga buli sichubo syaahola, haandi neende buli sisuubise syaahola ohwekaya esiindu syoosi.
10Omuhasi wadeeha n'ahola esichubo oba esisuubise ohwekaya esiindu syoosi, 11aba ahoyere ohwoseeresaanga buli siindu syaaba niyeechuba oba niyasuubisa, ohutusaho wamwe niyeecha yaahaya naaba nasiwuliireho. 12Nae wamwe niyeecha yaamukaana ohwooseresa esichubo esyo naaba nasiwuliireho, haba saaba bulaanu ahoyere ohusyooseresa daawe. Omwaami aba achia ohumuleheramo olwohuba wamwe niye oba namukaanire ohwooseresa esichubo eyo. 13Wamwe ali neende obufunaanibwa ohwomiisa oba ohufuufuyasa esichubo syoosi oba esisuubise syoosi syaaba niyahola. 14Nae nikali mbwe, oludaalo olulaamba luwa ohutula naaba n'amalire ohusiwuliraho, naahayire ohuleeta ohusiyiingania hwae, omuhasi oyo aba ahoyere ohuhola yooseresa buli siindu si yechuba oba si yasuubisa ohuhola. Wamwe aba amalire ohusiimana neende esichubo esyo neende ohuhaya ohusikaanirao n'aba niyasiwulira. 15Nae n'aba niyeecha ohufuufuyasa esichubo esyo, aba ahoyere ohutuunga omutaango kw'ohuhaya ohwooseresa esichubo esyo.
16Kano niko amalako k'Omwaami yaberesa Musa akadiira hu bichubo biholwa neende omuhasi otadeeha nae owamenya mu nyuumba ya laatang'ene, oba neende omuhasi otadeeha yeesi.
©Bible Society of Kenya, 2019
©Bible Society of Uganda, 2019