Matayo 25

Olukaado lw'abahaana ehumi

1 # Luk 12:35. “Sakira Obwaami bwo Muukulu bulifwaananisibwa neende abahaana ehumi, abakiinga amataara kaabwe, baachia ohubukaanira omweeya musaacha. #25:1 omweeya musaacha: Ebyandiiko bihuluundu bihale biindi bimeedaho biti, ‘alala neende omweeya muhasi.’ 2Bataanu hu abo, baba abasiru, nae bataanu baaba abakesi. 3Abahaana bataanu basiru balala, bakiinga amataara kaabwe, nae sibakiinga amafuta kayera daawe. 4Nae abahaana bataanu bakesi bala, bakiinga echupa ch'amafuta kayera alala neende amataara kaabwe akamala. 5Nae, koti lu mugole musaacha oyo yahiinda ohwoola, boosi bachaaka ohukuunuhaanga, mani endoolo chaamala chaabayira. 6Mani mu siro akati, esihu syechiira nibaboola bati, ‘Bone, omweeya musaacha nguno yoolere! Mutule mumubukaanire!’ 7Abweene ao, abahaana abo boosi basiingira mani bawaambia amataara kaabwe. 8Bulaanu abahaana basiru bala bachia baaboolera abakesi bala bati, ‘Eng'we mutubeeho hu mafuta keeng'we, mbano amataara keefwe kadaha ohusima.’ 9Nae abahaana bakesi bakobolamo bati, ‘Wiichuhana amafuta ka huli nako kaahaya ohutuyera, efwe naang'we. Silai muchie eyiri abakusa amafuta, abeene mweekulire.’ 10Nae nibali bachiire ohukula amafuta, omweeya musaacha oyo yeecha yoola, mani abali nibamalire ohweetekeha, beengira nae mu bugole; baamala beekalao omulyaango. 11#Luk 13:25.Nae luunyuma abahaana baandi bala beecha baakobola mani baboola bati, ‘Omwaami twiikulireo.’ 12Nae yakobolamo ati, ‘Mbaboolera obwadyeeri endi, haba siimbamanyire.’ 13Sakira eng'we mweetekehe, olwohuba haba simumanyire oludaalo kata neende ebiha.

Olukaado lw'abahalaabani badatu

(Luk 19:11-27)

14 # Luk 19:11-27. “Obwaami bwo Muukulu buchia ohufwaananisibwa neende omwaami wuundi owali achia olukeendo eyale, mani yalaanga abahalaabani bae, yaabalehera obuyiinda bwae babuliinde. 15Yaberesa omuundu mulala etalaata chitaanu, #25:15 Etalaata: yino yali yihira omusaara kw'omuhalaabani okw'emyaaka ehumi neende chitaanu. owuundi “etalaata” chibiri, nae omuundu wuundi “etalaata” ndala, ohweema hu maani kabuli muundu. Omwaami oyo yaamala atyo mani yaachia hu lukeendo lwae. 16Omuundu yi baba “etalaata” chitaanu, yachia bwaangu yaachurusiramo, mani yanyoola etalaata chitaanu chiindi. 17Omuundu yi baberesa “etalaata” chibiri, yesi yachia yaafuna “etalaata” chibiri chiindi, 18nae omuundu yi baberesa etalaata ndala wula nae yachia yaayaba eliina mu loba yaasiihamo obuyiinda bw'omwaami wae. 19Luunyuma, ebiha bileeyi nibibitireo, omwaami w'abahosi abo yakobola, yachaaka ohubaliirira emyaandu kyae ki yali naabaleheere. 20Omuundu yi baberesa “etalaata” chitaanu wula, yaachia yatusayo “etalaata” chitaanu chiindi mani yaboola ati, ‘Omwaami, waamberesa etalaata chitaanu, mbano ndanyola chitaanu chiindi.’ 21Omwaami wae oyo yakobolamo n'aboola ati, ‘Weebale muno, omuhalaabani mulai haandi omweesikwa; weekese obweesikwa bwao mu biindu bidiidi, njia ohuhuberesa ebiindi bihira hoo; yingira mu sangaalo ly'Omwaami wao.’ 22Nae omuundu yi baberesa “etalaata” chibiri yaboola ati, ‘Omwaami, ngandi ewe waamberesa etalaata chibiri choong'ene, mbano ese funiireho chibiri chiindi.’ 23Omwaami wae yamukobolamo yaboola ati, ‘Weebale muno, ewe omuhalaabani mulai haandi omweesikwa; weekeese obweesikwa mu biindu bidiidi bino, mani njia ohuhuberesa ebiindu biindi bihira hooho; yingira, mu sangaalo ly'Omwaami wao.’ 24“Nae omuundu yi baberesa “etalaata” ndala yoong'ene, yesi yaboola ati, ‘Omwaami, ngaandi ese manyire sa endi ewe, oli omuundu mwoomeranu. Okesaanga abuundu wootataakire esiindu syoosi, haandi obuusaanga ebiindu abuundu wootabakaaleho. 25Sakira obuti bwandiira mani ndaachia ndaabiiha “etalaata” yao eyo, mu loba. Mani bukula sa ebiindu byao byeene bino, mbano hukalusiire abweene.’ 26“Nae omwaami wae yamukobolamo ati, ‘Ewe omuhalaabani mubi haandi omukata, hane wamanya sa oti ese ngesaanga abuundu yi taataakire, haandi mbuusa abuundu yi taabakaaleho? 27Lwasiina siwabukula sa eseende chaange mani waachibiiha yi baandu baandi babiihaanga eseende chaabwe, mani nindahakoboole, sindahaduuhaaneho ebiindu byaange nibyemeedere hooho? 28Mani nibiri bityo, mumutuseho sa “etalaata” yeene eyo, mani muyiberese oyo oli neende etalaata ehumi. 29#Mat 13:12; Mrk 4:25; Luk 8:18.Olwohuba omuundu yeesi oli nabyo, achia ohumeedwaho ebiindi, mani abe neende ebihiraho neende byaaba naadaha. Nae omuundu otaaliho neende esiindu syoosi-syoosi, kata sa syabaasa ati ali nasyo, bachia ohumutusaho. 30#Mat 8:12; 22:13; Luk 13:28.Mani omuhalaabani oyo owuma obuhoonyi, mumusukune sa erwaanyi mu siirima siingi, yi aba achia ohuliriraanga niyeesia ameeno.’

Ohuheengerwa omusaango kw'enjakamo

31 # Mat 16:27; Mat 19:28. “Mani Omwaana w'Omuundu naalikobolera mu luyaali lwae, alala neende bamalaika bae boosi, nilwo lu achia ohwiihalira hu sisala sy'obutuki syae syooluyaali. 32Enjia choosi chaheeche chebuusira mu moni wae, mani akabulemo abaandu amahabi kabiri, koti lu omwaayi lwaakabulaanga amakoondi neende embusi. 33Achia ohuta amakoondi hu muhono kwae muluungi, nae embusi hu muhono mukaada. 34Mani omutuki oyo achia ohuboolera abo abali hu muhono kwae muluungi ati, ‘Eng'we ba Laata yaange yaberesa ehabi, mwiiche mubukaane obwaami bubabatekehera ohutula ohuloongwa hw'esyaalo; 35olwohuba ndali niinumwa enjala, mwaamba ebyohulya; ndali niinumwa obuluwo, waamba esyohung'wa; ndali omukeni yooli, waambukanira; 36ndali mbula esy'ohwefwaala, wafwaasa; ndali omulwaae, weecha waambona; ndali mu jeela, weecha waangeniya.’ 37Nae aboolerefu abo bamukobolamo bati, ‘Omwaami, ni liina lweene lu hwahubona enjala niyihuluma, ndaahuliisa, kose n'olumwa obuluwo, ndaahuberesa esyohung'wa? 38Haandi liina lu ndahubona n'olwaala, kose n'obula esy'ohwefwaala ndaahufwaasa? 39Haandi liina lu ndahubonaho n'olwaala, kose nooli mu jeela ndaahukeniya?’ 40Nae Omutuki oyo achia ohubakobolamo ati, ‘Huboolera obwadyeeri endi, koti lu waholera esyo oyo ohiramo obudiidi hu baandu baange, waholera sa ese.’ 41Nae achia ohuboolera abo abali hu muhono kwae mukaada ati, ‘Mumbweere-eyi, eng'we ababwaabwa! Mwiingire mu muliro kutasima okwatekeherwa Sitaani neende bamalaika bae; 42olwohuba enjala yali niyiinuma, wahaya ohuumberesaho esyohulya, obuluwo bwali nibuunuma, wahaya ohuumberesa esyohung'wa, 43ndali omukeni, waahaya ohuunjakaanira; ndali mbula esy'ohwefwaala, mwahaya ohufwaasa; ndali omulwaae, haandi ndali mu jeela, wahaya ohuungeniya.’ 44Mani abo bosi bachia ohukobolamo bati, ‘Omwaami, liina lu ndahubona enjala niyihuluma, kose obuluwo nibuhuluma, kose nooli omukeni, kose noowuma esy'ohwefwaala kose n'olwaala kose nooli mu jeela, mani ndaahaya ohuhuhoonya?’ 45Nae achia ohubakobolamo ati, ‘Mbaboolera obwadyeeri endi, koti lwootaholaho esyo syoosi eyiri mulala ohiramo obudiidi hu baandu baange bano, nilwo lumutaaholeraho syeesi.’ 46#Dan 12:2. Mani abafwaana batyo bachia ohutula ao, beengire musinyaaso esitaakama, nae abaholaanga ebihoyera batyo bahachie mu Bulamu butaakama.”

Currently Selected:

Matayo 25: SAMIA

Highlight

Copy

Compare