Matayo 24

Yesu alomaloma hu husihiriswa hw'Enyuumba ya Nasaae

(Mrk 13:1,2; Luk 21:5,6)

1Yesu niyali naatula mu Nyuumba ya Nasaae, abeeki bae beecha bamweekesa koti lu Nyuumba ya Nasaae eyo yoombahwa bulai. 2Nae yabakobolamo ati, “Eng'we mubona ebiindu bino byoosi koti lu biri? Mbaboolera obwadyeeri endi, libulao ekina lichia ohudoong'a hu liindi nilitaagemuulwe.”

Obudinyu neende ohusaandisibwa

(Mrk 13:3-13; Luk 21:7-19)

3Yesu niyali niyehaale hu lugulu lw'Emiseituuni, abeeki bae beecha yaali mu bweekisi, baamusaba nibaboola bati, “Tuboolereho oludaalo lweene lu biindu bino byahakwiireo, haandi halolero siina ahalyeekesa ohwiicha hwao neende enjakamo y'esyaalo?”

4Yesu yabakobolamo ati, “Mweliinde omuundu yeesi ahaye ohubabachirisaho naabakosa. 5Olwohuba, abaandu baangi baheeche mu liita lyaange nibaboola bati, ‘Niise Kristo,’ mani bachia ohukosa abaandu abaangi. 6Haandi mwahawulire ebiita by'aambi neende eby'eyale, nae mutesiinduhaanga hulwabyo daawe, olwohuba bino nibyo ebiindu bihoyere ohubaao, nae enjakamo y'esyaalo nayo yisisiiri ohwoola. 7Olwohuba, esyaalo silala syahaseete esiindi, haandi obutuki bwosi bwahaseete obutuki buundi. Haandi yahakweeo enjala neende ohutengereha hw'esyaalo mu bituundu biingi. 8Bino byoosi nihwo sa ohuchaaka hw'ohusaanda, koti obuchuuni butaangiraanga ohuba hu muhasi omwaana naali aambi ohwiibulwa.

9 # Mat 10:22. “Mani bachia ohubawaamba babasaandye, haandi babeete. Haandi abaandu boosi bachia ohubasyuulaanga hulw'eliita lyaange. 10Abaandu baangi bahalehuulire efukiirira hulweebyo, #24:10 bahalehuulire: Oba baheegumule. bahobe abaasyaabwe, mani basyuulane abeene-na-beene. 11Nae abanabbi bobubacha baangi bachia ohwiicha babache abaandu baangi, mani babakose. 12Obwonooni bwahemeede bwaasaalaanira mu syaalo mani byaakera obuheeri bw'abaandu baangi bwaanyita. 13#Mat 10:22. Nae, omuundu wahagumire ebidinyu ebyo ohwoola hu njakamo, niye owahawone. 14Haandi Emboosi Ndai y'Obwaami bwa Nasaae buno, yichia ohuyaalwa mu syaalo syoosi, sibe esyohuboneraho eyiri abaandu boosi, hu njakamo y'esyaalo yimale yoole.

Obuti bw'amakana

(Mrk 13:14-23; Luk 21:20-24)

15 # Dan 9:27; 11:31; 12:11. “Mani nimubonaanga amatiichasi k'amasira k'omunabbi Danieli yalomalomaho hale niketeengeehe abuundu woolerefu, (leha omuundu osoma emboosi chino, amanyirise amahuluundu kachio), 16nilwo lu baandu bali mu Yudea baheeruhire mu ngulu. 17#Luk 17:31. Nae omuundu wahabe hu sirama sy'enyuumba, haba siyahanyaleho ohwiiha aasi ohubukula ebiri mu nyuumba yae. 18Haandi omuundu wahabe naali mu ndalo, haba siyanyaleho ohukobola engo wae ohweenda engubo chae. 19Chiahaakaane muno abahasi baliba nibali aasito, mu ndaalo echo, alala neende abahasi baliba nibali neende abaana badoto basiinuuna! 20Nae eng'we musabe muti ebiha by'ohwiiruhiramo hweeng'we ebyo, bihaye ohubaao mu ndaalo ch'etoocho, oba hu ludaalo lwa Sabbaato! 21#Dan 12:1; Hubwi 7:14. Olwohuba ebiha ebyo ohusaanda hwamakana huchia ohubaao ohutabechaangahoo ohutula esyaalo nisiloongwa ohwoola bulaanu buti, haandi sihwahabeeo ehabi liindi daawe. 22Haandi endaalo echo chiba nichitaheendeeswaho, abulao omuundu yeesi owahaonere daawe. Nae hulw'obulai bw'abaandu balobole ba Nasaae, endaalo echo chaheendeeswaho. 23Mani omuundu yeesi n'ababooleraanga ati, ‘Mubone Kristo, nguno!’ Kata ati, ‘Ngula’ mutasifukiiriraanga. 24Olwohuba yahabeeo abelaanga Kristo bataali badyeeri, neende abelaanga abanabbi abataali badyeeri. Bachia ohwoola baholeenge eby'amayia biingi by'ohubachirisa abaandu, haandi nisinyaliha bakose kata neende abadoole ba Nasaae bosi. 25Mani sakira mweliinde, mbao malire ohubalabula hale-hale oludaalo olwo nilutoola. 26#Luk 17:23,24. Sakira, nibababooleraanga bati, ‘Boneho ngula ali mu sichiimi sira,’ mutachichaangayo; haandi nibaboola bati, ‘Boneho nguno yeekisire muno, mutasifukiiriraanga.’ 27Olwohuba koti lu lumesu lw'efula lumesuhaanga ohutula ebukwe ohwoola emuumbo, nilwo nasilala lu hwiicha hw'Omwaana w'Omuundu huchia ohuba. 28#Luk 17:37.Olwohuba, yi mulaambo kuli, niwo yi ngosya chaheebuusire alala.

Ohukobola hw'Omwaana w'Omuundu

(Mrk 13:24-27; Luk 21:25-28)

29 # Yis 13:10; Yoel 2:10,31; 3:15; Hubwi 6:12; Yis 13:10; Esek 32:7; Yoel 2:10; 3:15; Yis 34:4; Hubwi 6:13. “‘Ohusaanda hw'endaalo echo nihwahawe huti; elyuuba lyaheerime, haandi omwoosi sikwahaaduhe. Eng'ining'ini chahabuluunguhe ohutula Muukulu, haandi amaani ko Muukulu kachia ohudengaana.’ 30#Dan 7:13; Sak 12:10-14; Hubwi 1:7. Ao niwo yi halolero h'omwaana w'Omuundu hachia ohubonehera Muukulu, haandi abaandu bohu syaalo boosi bachia ohulira haandi bachia ohubona Omwaana w'Omuundu naakobolera mu maleesi ko Muukulu naali neende amaani alala neende oluyaali luhoongo muno. 31Mani achia ohutuma bamalaika bae ohuubba eturumbete neende ekono hoongo, mani babuuse alala abalobole bae ohutula mu mbeka ch'esyaalo choosi, ohutula hu lubeka lulala lw'ekulu ohwoola hu luundi.

Amahuluundu ka hweeka ohutula hu mutuli

(Mrk 13:28-31; Luk 21:29-33)

32“Bulaanu mweeke elyeeko ohutula hu mutuli. Esaga lyakwo nililoha sa amasaafu madoto liti, ni mumanyirao muti, endaalo ch'esiminyu chiri aambi. 33Sakira eng'we mwesi nimubona ebiindu bino byoosi nibyeehola, manyeenge muti, ali aambi ohwoola, ali hu siruwa bweene. 34Mbaboolera obwadyeeri endi, oluse luno silwahafwe lwaawa ebiindu bino byoosi nibiteeholeha. 35Ekulu neende esyaalo bichia ohuwaao, nae emboosi chaange haba sichahaweeo daawe.

Abulao omanyire oludaalo kata ebiha

(Mrk 13:32-37; Luk 17:26-30,34-36)

36“Nae oludaalo lweene olwo, kata ebiha byeene, abulao omuundu omanyireho, kata bamalaika bo Muukulu, kata Omwaana #24:36 kata Omwaana: Ebyandiiko bihuluundu bihale biindi bileha ‘kata Omwaana.’ ohutusaho Laataang'ene yeeng'ene niye obimanyire. 37#Huc 6:5-8. Koti lu byali mu ndaalo cha Nowa, haandi nilwo nasilala lu bichia ohuba hu ludaalo lu Omwaana w'Omuundu yaheechereho. 38Olwohuba, oludaalo lw'amaachi k'ofwomboole, nilusiiri ohwoola, abaandi balichaanga, bang'wa, abasaacha badeehya, haandi abahasi badeeha, ohwoola hu ludaalo lu Nowa yeengiriraho mu lyaato. 39#Huc 7:6-24. Nae haba sibanyala ohumanyaho ohwoola lu maachi k'ofwomboole keechera kaabamira. Nasilala nilwo lu byahabe hu ludaalo lu Omwaana w'Omuundu achia ohukoboleraho. 40Ebiha ebyo, abasaacha babiri bahabecheenge mu ndalo, mani mulala abukulwa, nae owaasye alehwa. 41Abahasi babiri bahabecheenge nibasia hu lukina, mani mulala abukulwa nae owuundi alehwa. 42Mani sakira mbaboolera endi mubecheenge abeetekefu, olwohuba mukoterwe oludaalo lu Omwaami yahakaluhireho. 43#Luk 12:39,40. Nae mumanyeenge muti, omweene nyuumba aba niyahamanyireenge ebiha by'esiro bi mwiibi yeecheramo, aba yaheetekeeheenge, mani ahaya ohukanya omwiibi yaafunaka enyuumba yae. 44Sakira eng'we mwesi mubecheenge abeetekefu, olwohuba Omwaana w'Omuundu achia ohukobola mu biha bi mutamubaasirisiramo.

Omuhalaabani mweesikwa neende otaali omweesikwa

(Luk 12:41-48)

45“Nae muundu siina oba omuhalaabani mukesikesi haandi omweesikwa? Niye yi mwaami wae ataawo ohuliindaanga edaala lyae neende ohuberesaanga abaandu bomuungo mwae ebyohulya mu biha bihoyera. 46Omuhalaabani oyo, aba ali ow'ehabi, yi mwaami wae akobola, mani yaamwaakaana naahola emirimo kyae ekyo. 47Mbaboolera obwadyeeri endi, omwaami wae oyo aba achia ohumuhola aliinde emyaandu kyae kyoosi. 48Nae niwiichuhira omuhalaabani yaaba omubi, omweene yachaaka ohweeboolera mu mwooyo kwae ati, omweeneengo wae ahiindire muno ohukobola, 49mani yachaaka ohuhuya abahalaabani baasye, haandi yachaaka ohulya neende ohung'wera alala neende abameesi, 50omwaami wae aba achia ohukaluha hu ludaalo lw'atamubaasirisiramo neende mu biha bi ataamanyire. 51Omweeneengo oyo aba achia ohumusaandya, #24:51 ohumusaandya: Oba ohumudonya-donyamo. haandi amube esinyaaso alala neende abebachirisi, eyo niyo yi baba bachia ohulirira alala nibeesia ameeno.

Currently Selected:

Matayo 24: SAMIA

Highlight

Copy

Compare