Yosua 1
1
Nasaae alagira Yosua ohuchia alwaanie ayiingire Kanani
1Luunyuma lw'ohufwa hwa Musa omuhalaabani w'Omwaami, Omwaami yalomaloma neende Yosua omuhoonyi wa Musa, haandi omwaana wa Nuuni. 2Yaboola ati, “Omuhalaabani waange Musa mbano afwiire. Mani ewe weetekehe bulaanu, ewe alala neende abaandu ba Yisiraeli boosi, mwaambuhe Omwaalo kwa Yorodaani mwiingire mu syaalo si ndi ohubaberesa. 3#Amal 11:24,25.Koti sa lu ndaboolera Musa, ese malire ohuhuberesa alala neende abaandu baange boosi eloba lyoosi li muchia ohunyala ohuhuumbaho. 4Enjaho cheeng'we chichia ohutulira elalira hu siparara emwaalo ohwoolera elalira hu Ngulu cha Lebbanooni emukulu; ohutulira elalira hu mwaalo muhunuufu Omwaalo kwa Ewufuraate ebukwe, ohubitirania mu syaalo sy'Abahiiti, ohwoolera elalira hu Nyaanja Hoongo ya Mediterania emuumbo. 5#Amal 31:6,8; Abaib 13:5.Ewe Yosua, abulao oyo yeesi onanyala ohuhuyiingira n'osisiiri omulamu. Njia ohuba naawe koti lu ndabeechaanga neende Musa. Njia ohuba naawe ebiha byoosi; haba siinjia ohuhujwaang'aho kata sa nabudiidi. 6#Amal 31:6,7,23.Jiing'a haandi ogume, olwohuba ewe niiwe ochia ohuba omwiimirisi w'abaandu bano nibanaba hu beengira ohuyira esyaalo sino si ndasuubisa bakuuka yaabwe. 7Ewe maliirira sa, haandi ogume; haandi mani omale wehaliirise oliinde sa Amalako koosi ka Musa omuhalaabani waange yababeresa. Mutalekeeresaangaho kata esituundu syako, nimuba muchia ohubitaangamo buli yi muchia ohuchichaanga. 8Yomiseenge ohubona muti esitabo sy'Amalako sisomwa mu hwiinamira Nasaae hweeng'we hwoosi. Sisomeenge esideete neende esiro, haandi mubona muti mwiisa oluyaali mu buli siindu syandiikwamo. Mani ao muba muchia ohubeechaanga abanyali haandi ababitamo mu buli siindu sibahola. 9Yichulisa oti mbeere hulagiire ohuba omumaliirifu haandi omugumu! Otabeechaanga omuti oba omusinyifu, olwohuba ese Omwaami Nasaae wao, ndi naawe eyo yoosi y'ochiira.”
Yosua alagira abaandu
10Bulaanu Yosua yalagira abeemirisi 11ohuchia babite mu kaambi yoosi nibaboolera abaandu bati, “Tekeheho ebyohulya, olwohuba mu ndaalo chidatu enaamba munaba nimuchiire ohwaambuha Omwaalo Yorodaani ohuchia ohuyira esyaalo si Omwaami Nasaae weeng'we ali ohubaberesa.”
12 #
Hub 32:28-32; Amal 3:18-20; Yos 22:1-6. Yosua yaboolera enono cha Rubbeeni neende Gaadi neende esituundu sy'enono ya Manaase ati, 13“Mwiichulise bulai koti Musa omuhalaabani w'Omwaami, yeecha yi muli mani yaababoolera ati, Omwaami Nasaae weeng'we yali n'achia ohubaberesa eloba lino eliri hu lwaande lw'ebukwe wa Yorodaani ohuba edaala lyeeng'we. 14Abahasi beeng'we, abaana beeng'we, alala neende ebituke byeeng'we byoosi, muchia ohudoong'a ano, nae ab'amaye beeng'we, abakingiire elalira ebilwaaniso nibetekeehe ohuchia ebiita, nibo abachia ohutaangiramo mu moni w'Abaisiraeli basyaabwe boosi, ohubahoonya ohulwaana 15ohwoola lu bananyalira ohuyira eloba liri hu lwaande lw'emuumbo wa Yorodaani, li Omwaami Nasaae weeng'we ababereese. Naaba n'amalire ohuliinda enono choosi echa Yisiraeli, hu bulaanu muba muchia ohukobolera engo abweene ao, mani mwaamala mwaamenya ano mu loba lyeeng'we lyeene eliri ebukwe wa Yorodaani, li Musa, omuhalaabani w'Omwaami yababeresa.”
16Boosi bakobola mu Yosua bati, “Efwe huchia ohuhola buli siindu syoosi sy'otuboleere, haandi huchia ohuchichaanga buli yoochia ohututumaanga. 17Huchia ohuhwisaangamo oluyaali, koti lu hwesaanga oluyaali ebiha byoosi mu Musa, mani haandi Omwaami Nasaae wao oyo ahoya yaaba naawe koti sa lu yabeechaanga neende Musa! 18Oyo yeesi ochia ohukanakanaanga obunyala bwao, oba ohuhayaanga ohwiisa oluyaali mu buli malako kao, achia ohwitwaangwa sa. Ewe ba omumaliirifu haandi omwomiifu!”
©Bible Society of Kenya, 2019
©Bible Society of Uganda, 2019