Yobbu 34
34
1Elihu yeemao yaaboola ati,
2“Muwulire emboosi chaange, eng'we abasaacha bakesi,
haandi mundekeerese, eng'we abamanyire ebiindu;
3olwohuba omuundu yawuula emboosi endai neende eyitaali endai ohweema hu bi awuliire
koti olulimi lu lwaawula ebyohulya binyunyuula neende ebichalaafu.
4Lehe hukabuhanie esyadyeeri;
lehe abeene huheengeo si hubona huti silai.
5Olwohuba Yobbu aboola ati, ‘Mbulaho omusaango,
nae Nasaae yaandusaho ebiindu bilai;
6Kata ndahaba ni ndi omulai, naangwa omubacha;
kata neende niimbulaho omusaango, nae nyaalirwe muno.’
7Yobbu muundu w'engeri siina,
owekotyoombera obulekeeresi koti ong'wa amaachi,
8adaha muno ohuba alala neende abonooni
haandi akeendaanga neende abonooni.
9Olwohuba aboolere ati, ‘Abulao esiindu si muundu anyoola
naahola ebisaangaasa Nasaae.’
10“Mani sakira muteke amatwi muumbulire, eng'we abasaacha abategeera,
sisinyalihana nabudiidi Nasaae ohuhola esiindu sitahoyera,
haandi Omunyala w'ebiindu byoosi haba saanyala ohuhola esiindu sibi.
11 #
Sab 62:12. Olwohuba Nasaae yahabe omuundu omukabo kwae ohweema neende ebiholwa byae,
haandi omuundu yahabone ati esiindu sy'anyoolere sihoyerwa ebiima byae.
12Syadyeeri syeene mbwe Nasaae haba saholaanga esiindu sibi,
haandi Omunyala w'ebiindu byoosi haba sa fwiinyiriraanga omuundu yeesi mu huhalaka omusaango hwae.
13Wiina owamuba obunyala bw'ohuliindaanga esyaalo
haandi wiina owamudiisa esyaalo syoosi?
14Nae Nasaae n'aheengao ohwekobosera omweene omwooyo kwae,
haandi yefunyisira omuuya kwae kwobulamu,
15buli siindu silamu siba sichia ohusihiriha,
mani abaandu bahakobole mu loba haandi.
16“Nimuli ab'amakesi, mubulire sino;
mutekeerese bi mboola. 17Omuundu otadaha obwadyeeri mani anyala yaatuka?
Wahayaasa omuluungifu haandi ow'amaani omusaango mani waamuhira? 18Oyo oboolera omutuki ati, ‘Obula obuhoonyi,’
neende abaami ati, ‘Muli babi’;
19niye oyo oteehubira mani yakwiira abaami,
oba yaadaha abayiinda ohuhira abamanani,
olwohuba Nasaae niye owabaloonga boosi.
20Musiiha silala nibafwa sa;
nae akatikaati w'esiro abaandu badengaanisibwa mani baasihirira,
mani abaandu b'amaani batuswao naabulao omuundu obadiirireho.
21“Olwohuba Nasaae atingaala engeri yi muundu yeebisiramo,
haandi abona buli abuundu yachiira.
22Abulao esiirima, kata syahaba esy'amaani sitye
yi bahola-mbi banyala ohweekisa Nasaae.
23Olwohuba haba sisihoyera mbwe Nasaae aboolere omuundu yeesi ebiha
hu amale achie yaali ohumuheengera omusaango.
24Nasaae haba saateberesaanga mberi hu amala atusao ab'amaani,
mani akobosao abaandi mu bweyaango bwaabwe.
25Olwohuba amanyire ebiholwa byaabwe,
abasukuna mu siro silala mani baasihirira.
26Abahuyira mu moni w'abaandu
hulw'ebyonoono byaabwe,
27olwohuba baleha ohumuloondaho,
haandi baahaya ohudeeba hu malako kae,
28mani bakera amaliro k'abamanani kamwoolaho,
mani yaabulira ohulira hw'abaandu basaanda.
29Nasaae mani n'aheengao ohubuleera, wiina onyala ohumuheengera omusaango ohumuhira?
Naheengaho ohweekisa, wiina onyala ohumubona,
oba syahaba esyaalo kose omuundu?
30Omuundu otatya Nasaae, haba s'ahoyeere ohutuka,
hu ahaye ohusukuna abaandu mu muteego.
31“Olwohuba aliwo omuundu owaboolera Nasaae ati,
‘Saandire muno; haba siinja ohwonoona haandi;
32njekese ebiindu bi tabona;
niimba nindahola esyonoono, haba sisikobolamo ohusihola.’
33Obaasa oti nasaae achia ohuhuleha,
olwohua wekaana oti obula omusaango?
Mani omweene heengao, nae ataali ese;
sakira boola sy'omanyire.
34Abaandu bamanyirifu bachia ohumboolera,
neende buli muundu olimo amakesi owulira ebyaange achia ohumboolera:
35‘Yobbu alomaloma byaataamanyire,
emboosi chae chibulamo amakesi.’
36Yobbu aba niyaoseswa bulai,
muba mwabona muti akobolamo koti omuhola-mbi.
37Olwohuba ameeda obujeemu hu bibi byae;
yeema akatikaati weefwe,
mani yemeeda ohulomaloma bubi hu Nasaae.”
Currently Selected:
Yobbu 34: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
