Yobbu 28
28
Muhufumia Makesi
1“Mubwadyeeri aliwo esiroombe si bayabamo efeesa,
haandi abuundu yi boosera esaabbu.
2Esyuuma siyabwa ohutula mu loba,
haandi omugasa kusaanguluswa ohutula mu makina.
3Abaandu bayaba efeesa bamalao esiirima,
mani nibakeenda aasi mu siroombe mwoosi
nibayaba mu siriima sya titititi amakina k'engaanga.
4Beekula emyaanda mu hooho yi baandu bataali;
yi bawalukeenda bataamanyire,
mani baboya emikoye yi baandu batoola, mani bachaaka ohwesuuba.
5Nae mu loba nimwo mu eby'ohulya bitula;
nae aasi walyo ali koti yi omuliro kuli.
6Amakina komu loba elyo kalimo emyaalo midiidi ky'amaachi kafwaana bbulu,
haandi kalimo olufu lw'esaabbu.
7“Libulao eyoni libburuha elimanyire engira yichia hu biroombe ebyo,
haandi abulao engosya eyali niyibibweene.
8Ebisolo byaalaba haba sibibitaangaho hu ngira eyo;
kata edalang'i yoosi haba siyayibitaho.
9“Abaandu baata amakina mu lwaanda lwoomu,
mani basihula engulu nibachaakira aasi wacho.
10Batema emyaanda ohubita mu nyaanda,
mani babona buli siindu sy'engaanga.
11Beekalira esulo mani chaahaya ohusooha,
mani esiindu syali nisyeekisa syaaboneha alafu.
12“Nae amakesi kanyoolehana yeena?
Haandi obwiihalo bw'ohumanya buli yeena?
13Omuundu haba s'amanyire engira yikoolaho,
haandi haba sikanyoolwa mu syaalo sy'abaandu balamu.
14Obusiba bw'amaachi buboola buti, ‘Haba sikali mweese,’
haandi enyaanja yiboola yiti, ‘Haba sikali mweese.’
15Haba sikanyala ohukulwa neende esaabbu,
haandi ebbeyi yako siyinyala ohukeraanisibwa hu feesa.
16Soonyala ohukakeraania hu saabbu yihiramo obulai,
oba kata hu byuuma by'ebbeyi y'aakulu muno.
17Esaabbu neende egilaasi haba sibinyala ohwaakana nako,
oba sikanyala ohukulaasaniamo neende ebikoombe by'esaabbu ndai muno.
18Mu huba neende obuhoonyi, amakesi kahirira eyale muno amakina kalaangwa kati Koraali oba Marijaani;
engaanga y'amakesi yiri aakulu ohuhira amakina ka rubbia.
19Topaasi yitula Etiopia haba soonyala ohuyikeraania hu makesi,
oba waakakeraania neende esaabbu ndai muno.
20“Nae amakesi katula yeena?
Haandi obwiihalo bw'ohumanya buli yeena?
21Ebiindu bilamu byoosi haba sibinyala ohukabona,
neende amayoni kabburuha kosi sikanyala ohukamanya.
22Abbadoni neende emakoombe biboola biti,
‘Hwabulira neende amatwi keefwe olubweeru lu kadiiraho.’
23“Nasaae amanyire engira yi koolaho,
haandi amanyire obwiihalo bwako.
24Olwohuba Nasaae abona ohwoola yi syaalo syaakama,
haandi abona buli siindu siri aasi w'Ekulu.
25Niyaberesa omuyaka obusito,
haandi yaapiima amaachi neende esikero;
26niyaholera efula elako,
haandi yaaholera engira olumesu lw'ehubba;
27yabona amakesi mani yaakalaangirira;
yaakeemehao, mani yaakeesika.
28 #
Sab 111:10; Eng 1:7; 9:10. Mani yaboolera omuundu ati,
‘Bona, ohutya Omwaami, ako niko amakesi;
haandi ohutula mu syonoono nihwo ohumanya.’ ”
Currently Selected:
Yobbu 28: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
