Yobbu 27
27
Yobbu
1Yobbu yemeeda neende ohukaniaaya hwae, n'aboola ati:
2“Ndeechubire mu moni wa Nasaae mulamu, oyo owandusaho ebiindu bilai,
haandi Omunyala w'ebiindu byoosi, okerere omwooyo kwaange kwaahaya ohuba neende omuleembe;
3nisisiiri omulamu,
haandi nisiyeera omuuya ku Nasaae yamberesa;
4emboosi y'obubacha haba siyicha ohutulaho mu munwa kwaange,
haandi olulimi lwaange haba silucha ohulomalomaho eby'obubacha.
5Ese haba siinyala ohuboola endi muli abadyeeri;
haandi nisisiiri ohufwa siinja ohuleha obulai bwaange.
6Nyomiirira hu buluungifu bwaange, haandi haba siinja ohubuleha;
mu bulamu bwaange bwoosi sibulao esiindu si mwooyo kwaange kuunjolobya.
7“Leha omusuku waange abe koti omuhola-mbi,
haandi leha oyo owunyiingania abe koti omuundu otaali omuluungifu.
8Olwohuba esuubi ly'omuundu otatya Nasaae liri yeena Nasaae naamulaanga,
Nasaae naamalao obulamu bwae?
9Mubaasa muti Nasaae achia ohuwulira amaliro kae,
obudiinyu nibumukwaaho?
10Mani achia ohusaangaalira mu w'Obunyala bwoosi?
Achia ohulaama Nasaae endaalo choosi?
11Njia ohubeekesa ebidiira hu muhono kwa Nasaae;
lehe haye ohubakisa ebiri neende ow'Obunyala bwoosi.
12Bone, eng'we mwesi-mweesi mwamala ohweboneraho abeene;
lwasiina haandi mweholere koti abataamanyireho elalira?
13“Kuno nikwo omukabo kwa Nasaae eyiri omuhola-mbi,
neende obusiha bu muundu osaandya abaasye anyoola ohutula eyiri ow'Obunyala bwoosi.
14Abaana bae nibeengiya, beengiyira olugaanga;
haandi abeechuhulu bae haba sibacha ohuba neende ebyohulya bibamala.
15Abo abahawone bachia ohufwa oluumbe,
haandi abahasi baabwe bafwiirwe haba sibacha ohulira abafu baabwe.
16Kata yahabuusa ebituuli b'efeesa byaaba koti olufu,
haandi yahung'aania engubo chaaba koti eloba;
17anyala ohuchihung'aania, nae abaandu balai nibo abachia ohuchefwaala,
haandi ababula omusaango nibo abachia ohukabana efeesa.
18Enyuumba yi yoombaha yiri koti ey'olububi,
yiri koti esikaali si muliindi w'endalo ahola.
19Achia ohweyalisa naali omuyiinda, nae saacha ohukobolamo ohuba atyo haandi;
asimuha mani yaanyoola obuyiinda bwae nibubweereo.
20Ebitiisa bimukwaaho koti amaachi k'omuhula;
esifuusye simudumuula syaamumalao esiro.
21Omuyaka kutula ebukwe kumudumuula aakulu mani kamumalao;
kumweeya kwaamutusa mu bwiihalo bwae.
22Nasaae amufuumula ataali ohusaasira hwoosi;
nibateema ohwiiruha nibeewonia.
23Omuhono kwa Nasaae kumudiira kwamwomiisa,
mani yaayulira Nasaae naali mu bwiihalo bwae.
Currently Selected:
Yobbu 27: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
