Yeremia 38
38
Yeremia mu sidiba syahama
1Bulaanu Sefatiya omwaana wa Matani, neende Gedalia omwaana wa Pasuhuri, neende Yukali omwaana wa Selemia, neende Pasuhuri omwaana wa Malukiya nibawulira bati Yeremia yali n'aboolera abaandu boosi ati, 2“Omwaami aboola ati, oyo yeesi odoong'a mu siko muno achia ohufwiirwa mu biita, oba ohufwa enjala, oba ohufwa endwaae. Nae buli muundu onaatule mani yeyaanayo eyiri Abakalidaaya, achia ohuwona, haba saachia hwiitwa. Oyo niye onaawonienge obulamu bwae, mani abe omulamu.” 3Omwaami aboola ati, “Esiko sino sichia ohudiiswa mu mahono k'eye ly'omutuki wa Bbabbilooni mani siwaambwe.” 4Ao mani abachweenufu abo nibaboolera omutuki bati: “Leha omusaacha wuno yeetwe, olwohuba amala amaani mu basikaari neende abaandu badoong'ere mu siko sino, neende mu baandu boosi, n'aboolera emboosi chiri chityo. Olwohuba omusaacha wuno haba saadahisa abaandu bano omuleembe, nae abadahisa ebidinyu byoong'ene.” 5Mani omutuki Sedekia n'abakobolamo ati, “Bone, nguyo ali mu mahono keeng'we. Olwohuba ese koti omutuki, sibulao siinyala ohubakayira.” 6Mani nibadiira mani nibaasukuna mu sidiba sya Malukiya, omwaana w'omutuki, esyali mu lwaanyi lw'omuliindi, mani nibaanjira aasi neende emikoye. Esidiba esyo syali nisyahamamo amaachi, ohutusaho amadosi niko akalimo, mani nibaanyiniha omwo.
7Nae Ebbedimeleki Omuitiopia mulade, owalichiingi mu dooho ly'omutuki, yawulira ati basukuune Yeremia mu sidiba. Esiha esyo omutuki yali niyehaale mu Siruwa sya Bbenjamini. 8Ebbedimeleki naachiayo mani n'aboolera omutuki ati: 9“Omwaami waange, ewe omutuki, abasaacha bano baholere bubi muno. Yeremia omunabbi bamusukuune mu sibida, mani achia ohufwiira omwo enjala, olwohuba emigaati kiweere mu siko.” 10Mani omutuki n'alagira Ebbedimeleki Omuitiopia ati, “Bukula abasaacha badatu ochie nabo mani mwiinulule Yeremia omunabbi mu sidiba n'asisiiri ohufwa.” 11Mani Ebbedimeleki naachia neende abasaacha abomu dooho ly'omutuki, n'atusamo engubo ngofu echataanduha, nachiboya hu mikoye, mani n'achiisa aasi mu sidiba eyiri Yeremia. 12Ebbedimeleki Omuitiopia n'aboolera yeremiya ati: “Engubo ngofu echo, chite muuhwaaya mwao, emikoye kihaye ohuhuheenga.” Yeremia yahola atyo, 13mani nibeenulula Yeremia ohutula mu sidiba. Mani Yeremia n'adoong'a mu lwaanyi lw'omuliindi.
Sedekia yeteeba hu Yeremia
14Ao mani omutuki Sedekia naatuma balaange Yeremia omunabbi, mani n'amwaakaanira hu mulyaango kwohudatu okwomu nyuumba y'Omwaami. Omutuko n'aboolera Yeremia ati: “Siriyo esiindu siindaha ohuhuteeba; otaangisa esiindu syoosi daawe.” 15Yeremia n'amukobolamo ati, “Nihuboolera nitahukisire esiindu syoosi, ochia ohuunjita. Haandi nihukerakira, haba soochia huwulira emboosi chaange.” 16Mani omutuki Sedekia nandechubira mu bweekisi n'aboola ati: “Ndeechuba eyiri Omwaami mulamu, oyo owatuba obulamu, endi haba siinjia huhwiita daawe oba ndaahuyaanayo eyiri abo abakiiya ohuhwiita.”
17Mani Yeremia yaboolera Sedekia ati: Omwaami, Nasaae w'Amaye, Nasaae wa Yisiraeli aboola ati: “Niweyaanayo eyiri abachweenufu b'omutuki wa Bbabbilooni, ochia ohuwonia obulamu bwao, haandi esiko sino haba sisichia husaambwa omuliro. Ewe neende abomu nyuumba yao muchia ohuwonia obulamu bweeng'we. 18Nae noohaya ohweyaanayo eyiri abachweenufu b'omutuki wa Bbabbilooni, manya oti esiko sino sichia ohukwa mu mahono k'Abakalidaaya, mani bachia ohusisaamba omuliro, mani wesi haba soochia hubeyibaho daawe.” 19Mani omutuki Sedekia naakobolamo ati, “Tya Abayudaaya abeyaanayo eyiri Abakalidaaya. Nyala ohweyaanayo mu mahono kaabwe mani baasaandya.” 20Yeremia n'amukobolamo ati, Haba soochia hweyaanayo eyiri abo daawe. Hwekweeda bulaanu owulire ekono ly'Omwaami mu ebyo bi huboolera, mani ochia ohuba bulai, haandi owonie obulamu bwao. 21Nae noohaya ohweyaanayo, huno nihwo ohubonehera hu Omwaami yaanjekeese; 22Bona, abahasi boosi abadoong'a mu dooho ly'omutuki wa Buyudaaya, bachia ohuyirwa eyiri abachweenufu b'omutuki wa Bbabbilooni, haandi bachia ohuchia nibaboola bati,
Abeecha bao baweesikaanga bahubacha
mani nibahuyiingira.
Bulaanu babweene bati oyaandire mu madosi
nabo nibeeyiruhira.
23“Haandi abahasi bao boosi neende abaana bao bachia ohubayaanayo eyiri Abakalidaaya, mani ewe mweene haba soochia ohubeyiibaho daawe, nae ochia ohuwaambwa neende omutuki wa Bbabbilooni; mani esiko sino sichia ohusaambwa omuliro.”
24Mani omutuki Sedekia n'aboolera Yeremia ati, “Leha omuundu yeesi atamanyaho emboosi chino, mani sibulao esibi syahahukweeho daawe. 25Nae abachweenufu nibawulira bati nomanoome naawe mani bahuteeba bati, ‘Tuboolere, siina syeene sy'oboolere omutuki, haandi omutuki ahuboolere siina; otatukisa esiindu syoosi, ataali ao huchia ohuhwiita,’ 26obakobolamo oti, Mbeera saba omutuki endi bataangobosa mu nyuumba Yonatani ohufwiira omwo.” 27Abahunuufu boosi nibeecha eyiri Yeremia mani nibamuteeba, mani n'abakobolamo koti lu omutuki yamulagira. Mani nibawaao, olwohuba abulao owaali nawuliire ebyalomwalomwa. 28#Esek 33:21.Yeremia yadoong'a sa mu lwaanyi lw'omuliindi ohwoola hu ludaalo lu Yerusalemu syawaambirwaho.
Currently Selected:
Yeremia 38: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
