Yeremia 37
37
Ohusaba hwa Sedekia eyiri Yeremia
1 #
2 Abat 24:17; 2 Biha 36:10. Sedekia omwaana wa Yosia, yi Nebukadineesa omutuki wa Bbabbilooni yahola ohuba omutuki wa Buyudaaya, mu bweyaango bwa Koniya omwaana wa Yehoyakimu. 2Nae Sedekia neende abahoongo bae oba abaandu bomu syaalo nabo nibahaya ohuwulira emboosi ch'Omwaami chi omunabbi Yeremia yalomloma.
3Omutuki Sedekia yatuma Yehukaali omwaana wa Selemia, neende omulaamisi Sefaniya, omwaana wa Maseya, eyiri omunabbi Yeremia n'aboola ati: “Tusabire eyiri Omwaami Nasaae weefwe.” 4Bulaanu Yeremia yali n'asisiiri ohuboywa, mani yali nasiikeendaanga mu baandu koti lu adaha. 5Ebiha bino eye lya Hofura, omutuki wa Misiri lyoolere emwaalo hu lwaaho lwa Buyudaaya. Nae eye ly'Abakalidaaya nilyawulira lityo, lyamala lyaatula mu Yerusalemu. 6Mani Omwaami yaboolera omunabbi Yeremia ati: 7“Omwaami Nasaae wa Yisiraeli aboola ati, Chia oboolere omutuki wa Buyudaaya, oyo ohutumire yiindi ohundeteebaho oti, ‘Bona, eye lya omutuki wa Misiri eliichire ohuhuhoonya mbao liri aambi ohukobola mu syaalo syaalyo sya Misiri.’ 8Mani Abakalidaaya bachia ohukobola balwaanie esiko sino. Bachia ohusiwaamba mani basisaambe omuliro.” 9Omwaami aboola ati, Mutebacha abeene nimuboola muti, “Abakalidaaya haba sibachia hukobola daawe, olwohuba mubwadyeeri bachia ohukobola. 10Kata mwahayiingira eye ly'Abakalidaaya elibalwaania lyoosi, mani badoong'ao abasikaari banyaalihe boong'ene nibeyaliise mu yeema, abo bachia ohusiingira sa basaambe esiko sino omuliro.”
Yeremia adiirwa haandi aboywa
11Bulaanu eye ly'Abakalidaaya nilyali nilitulire mu Yerusalemu olwohuba eye lya omutuki wa Misiri lyali nilisudire aambi, 12Yeremia yatula mu Yerusalemu yaachia mu syaalo sya Bbenjamini eyiri abeeho bae anyoole omukabo kwae. 13Nae niyoola hu Siruwa sya Bbenjamini, omuhuluundu w'abaliindi owali ao, eliita lyae nilyo Yiriya omwaana wa Selemia, omwiichuhulu wa Hanania, namwemesa, n'aboola ati, “Ewe oli ohweyiba ochie hu Bbabbilooni.” 14Nae Yeremia naakobolamo ati, “Haba siindi hweeyiba ohuchia hu Bbabbilooni.” Nae Yiriya naatawulira daawe, nae yandiira yaanjira eyiri abahoongo. 15Mani abachweenufu nibaanjalabira muno, haandi nibaahuya mani nibaamboyera mu nyuumba ya Yonatani omwaandiiki eyali niyeeholere ejeela. 16Baanda mu jeela y'aasi mu liina, niimalamo endaalo yiingi. 17Ebiha nibyabitao, omutuki Sedekia yatuma baanaange. Nindali mu dooho lyae, omutuki wandeeba mu bweekisi n'aboola ati, “Yiluwo emboosi yooli nayo ohutula eyiri Omwaami?” Mani ningobolamo endi, “Yiriwo.” Nimuboolera endi, “Ochia ohudiiswa mu mahono k'omutuki wa Bbabbilooni.” 18Haandi ndateeba omutuki Sedekia endi, “Sibi siina siiholere eyiri ewe, oba eyiri abahalaabani bao oba eyiri abaandu esikera nimuumboya? 19Abanabbi beeng'we bali yeena abo ababalaamiraanga nibaboola bati, ‘Omutuki wa Bbabbilooni haba saachia ohubaseeta oba yaseeta esyaalo sino’? 20Bulaanu ewe omutuki, omwaami waange, hwekweeda owulire mani ofukiirire si husaba: otangobosa mu nyuumba ya Yonatani omwaandiiki, nyale ohufwiira eyo.” 21Ao mani omutuki Sedekia n'alagira mani nibamboyere mu lwaanyi lw'omuliindi w'edooho. Mani nindoong'a omwo, mani nibambechaanga buli ludaalo omugaati mulala, ohutula eyiri omuubbi w'emigaati, ohwoola lu migaati kyoosi kyawa mu siko.
Currently Selected:
Yeremia 37: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
