Yeremia 3

Obuteesikwa bwa Yisiraeli

1Omwaami aboola ati: “Omusaacha naalehanira elalira

neende omuhasi wae mani omuhasi wae oyo

yaadeehera omusaacha wuundi,

omusaacha oyo haba siyahamweekobosaho haandi.”

Esyaalo esyo haba sisinyala ohukwaamo ebidinyu?

Nae eng'we Abaisiraeli mweeholere abacheke, muli neende abasaacha baangi;

nae haandi mudaha ohuungobolera.

2Tingaale aakulu w'ebigulu, mani mubone.

Ali hoo abuundu y'oyaholeraho obucheke?

Waliindiriraanga abadya bao hu ndulo w'engira

koti lu Muaraabbu aliindirira abaandu mu siparara.

Wanyaasa esyaalo neende obucheke bwao bubitiirifu;

nootaaliho neende esoni kata nabudiidi.

3Sakira efula yihayire ohukwa,

haandi efula y'etoocho yihayire ohwiicha.

Nae ewe ohayiire mubucheke,

haandi ohayire ohudiirwa esoni kata nabudiidi.

4“Ewe haba sotula ohunaanga sa buti oti,

‘Laata, niiwe owaaheera ohutula mubuyere bwaange

5Onanyoolereenge buli ludaalo?

Onadiire etima endaalo choosi?’

Bona, omalire ohulomaloma,

nae odoong'ere n'ohola ebyonoono byoosi by'onyala.”

Yisiraeli neende Buyudaaya bihoyere ohweyolobya

6 # 2 Abat 22:1—23:30; 2 Biha 34:1—35:27. Omwaami yamboolera mu ndaalo ch'Omutuki Yosia ati: “Obweene Yisiraeli omuhasi otali omweesikwa aholere? Yaandulireho yaaholera obucheke hu buli sigulu sileeyi neende aasi wa buli musaala mubisi. 7Mani nimbaasa endi, ‘Niyahamale ohuhola ebyo byoosi, yahaangobolere’; nae yaahaya ohukobola. Kata Buyudaaya, mwanaang'ina otaali omweesikwa, yasibona. 8Buyudaaya yabona ati ndali nimbereese Yisiraeli ebbarwa yohulehanira elalira. Nae Buyudaaya mwanaang'ina Yisiraeli otaali omweesikwa oyo, yahaya ohutya, mani yesi yeehola omucheke. 9Olwohuba yali naadaha obucheke muno, yanyaasa esyaalo, niyeenamira amakina neende emisaala. 10Mani ebyo byoosi nibimalire ohukwaao, Buyudaaya otaali omweesikwa, mwanaang'ina Yisiraeli, haba siyakobola yi ndi neende omwooyo kwae kwoosi, ohumalaho yeebachirisa sa. Ese Omwaami, Niise olomaloome.”

11Omwaami yamuboolera ati: Kata syahaba mbwe Yisiraeli yandebwaaba, yekeese ati mulai hooho ohuhira Buyudaaya otaali omweesikwa. 12Chia olaangirire emboosi chino eyiri Yisiraeli nooboola oti:

Yisiraeli otaali omweesikwa, kobola yiindi,

Omwaami niye oboola.

Haba siinjia hunyoolera naawe,

olwohuba ndi ow'esisa,

Omwaami niye oboola;

haba siinjia huhunyoolerera endaalo choosi.

13Fukiirira sa omusaango kwao,

oti wajeemera Omwaami Nasaae wao

waasalaanisira obuheeri bwao mu banasaae bateende aasi wa buli musaala mubisi,

haandi oti haba si siwawuliraho ekono lyaange,

Omwaami niye oboola.

14Mukobole, eng'we abaandu bataali abeesikwa,

Omwaami niye oboola;

Njia ohutusa mulala hu eng'we mu buli siko, neende babiri mu buli daala,

mani mbaleete hu Lugulu Siyooni.

15Njia ohubaberesa abeemeresi balai bahola bi ndaha, abachia ohubaliindaanga nibali neende amakesi neende ohumanya. 16Nimwahabe nimwiingiiye haandi nimwemeedere mu syaalo, mu ndaalo echo, abaandu haba sibahabooleenge bati, “Esanduuku ly'Endagaano y'Omwaami.” Haba sibahalibaaseengeho daawe, kata sa ohuliichulisa daawe, haba sibahalidaheenge daawe; haandi sibahaliholeenge ehabi liindi daawe. 17Mu biha ebyo, Yerusalemu syahalaangwe siti, Obwiihalo bw'Omwaami, mani ebyaalo byoosi byahebuusire eyo, ohwiinamira Ese Omwaami. Bahabe nibaakaame ohuhola ebiindu bi myooyo kyaabwe myoomeranu haandi emibi kibaboolera ohuhola. 18Mu ndaalo echo, abomu Yisiraeli baheeyambaanie neende abomu Buyudaaya, mani alala bahatule mu syaalo sy'obuwaambe sy'emukulu, mani bachie mu syaalo si ndaberesa bakuuka yaabwe ohuba esyaabwe endaalo choosi.

Obutaali obweesikwa bw'Abaandu ba Nasaae

19Omwaami aboola ati: “Eng'we Abaisiraeli,

ndabaasa muno ohubabalira mu baana baange basyaani,

mani mbaberese esyaalo silai,

esihiriramo elalira obulai mu byaalo byoosi.

Mani ndabaasa endi muchia ohunaanga muti, ‘Laata yaange’,

mani mwaakame ohuundulaho.

20Nae koti omuhasi otaali omweesikwa lu aleha wamwe,

nilwo lu eng'we ab'enyuumba ya Yisiraeli mutabeere abeesikwa yindi,

Ese Omwaami, Niise oboola.”

21Ekono ly'Abaisiraeli libulirihaane aakulu w'ebigulu,

ni lirira haandi nilyekweeda,

olwohuba beeyira bubi muno,

mani nibeebirira Omwaami nasaae waabwe.

22Omwaami aboola ati: “Mukobole, eng'we mweesi abatabeere abeesikwa,

njia ohubawonia, mani mbahole mube abeesikwa.”

Naang'we mani nimuboola muti: Bona, mbao hwiicha yooli;

olwohuba niiwe Omwaami Nasaae weefwe.

23Mubwadyeeri bweene, abulao omusaango kusuubirwa ohutula hu bigulu,

neende ohuyokera ohutula hu ngulu.

Mubwadyeeri bweene, obuwonia bwa Yisiraeli buli mu Omwaami Nasaae weefwe. 24“Nae ohutulira elalira hale, mu buraaga bweefwe, ohwiinamira nasaae muteende odiisa esoni, niye omalireo ebiindu byoosi bi bakuuka yeefwe badidiihanira, ebyaayo byaabwe neende eng'oombe chaabwe, abaana baabwe basyaani neende abaana baabwe bahaana. 25Lehe hweeyalise aasi mu soni cheefwe, haandi lehe hwebwiihe engisa yeefwe; olwohuba hwonoona eyiri Omwaami Nasaae weefwe, efwe neende balaata yeefwe, ohutulira elalira mubuyere bweefwe, ohwoola buti. Mani haba sihwawuliraho ekono ly'Omwaami Nasaae weefwe.”

Currently Selected:

Yeremia 3: SAMIA

Highlight

Copy

Compare