Yeremia 25
25
Omusuku ohutula emukulu
1 #
2 Abat 24:1; 2 Biha 36:5-7; Dan 1:1,2. Mu mwaaka kwohune, kw'obutuki bwa Yehoyakimu, omwaana wa Yosia, omutuki wa Buyudaaya, ese Yeremia ndanyoola emboosi y'Omwaami, eyidiira hu baandu bomu Buyudaaya. (Okwo nikwo okwali omwaaka kwaamberi okw'obutuki bwa Nebukadineesa, omutuki wa Bbabbilooni.) 2Mani nimboolera abaandu bomu Buyudaaya boosi, neende abomu Yerusalemu boosi endi: 3“Ohutula hu mwaaka kw'ehumi-na-hadatu, okw'obutuki bwa Yosia omwaana wa Amoni, omutuki wa Buyudaaya, ohwoola buti, Omwaami abeere n'alomalomaanga naange, mani syesi nitaakama ohubeekesaanga bi aboola, nae eng'we nimuhaya ohuwulira. 4Mwahaya ohuwulira, kata sa ohutaahooho omwooyo daawe, nae Omwaami yemeeda ohubatumiraanga abahalaabani bae boosi, koti abanabbi.” 5Bababooleraanga bati, Bulaanu kaluuhane, buli muundu alehe ebiima byae bibi, neende ebiholwa byae bibi, mani munyale ohumenya hu syaalo si Omwaami yababeresa ohuba esyeeng'we, neende bakuuka yeeng'we, ohutula hale-na-haandi. 6Bababooleraanga bati, mutahalaabaniraanga banasaae baandi, haandi mwabeenamiraanga, oba ohunyoolesa Omwaami nimwiinamira ebyo bi mwahola neende amahono keeng'we. Mani Omwaami haba saachia hubaholaho esibi. 7Nae Omwaami mweene aboola ati, mwahaya ohumuwulira. Mani nimumudiisa etima hulw'ebiindu bi mwahola, abeene mani nimweleetera ohusaanda.
8Mani sakira Omwaami w'Obunyala aboola ati, Olwohuba mwahaya ohuwulira bi mboola, 9bone, njia ohutuma abaandu boosi abatula emukulu, neende omuhalaabani waange, Nebukadineesa, omutuki wa Bbabbilooni, mani mbaleete balwaanie Buyudaaya neende ebyaalo bino byoosi ebisyebodohaanie, Omwaami niye oboola. Njia ohusihirisira elalira esyaalo sino, neende ebyaalo bisyebodohaanie, mani mbahole esitiisa, esirekereswa, haandi ekuunda endaalo choosi. 10#Yer 7:34; 16:9; Hubwi 18:22,23. “Njia ohunyisa amakono kaabwe k'ohwehoya, ak'esangaalo neende ak'esidyaalo syohudeehisania, alala neende amakono k'ohusya hu lukina, haandi haba sibahabe neende amafuta mu taara. 11#2 Biha 36:21; Yer 29:10; Dan 9:2. Esyaalo sino syoosi syaheehole ekuunda haandi esitiisa, mani ebyaalo bino byahahalaabanire omutuki wa Bbabbilooni ohumala embaka y'emyaaka amahumi kataanu-na-kabiri. 12Nae emyaaka amahumi kataanu-na-kabiri nikyahawe, njia ohusaandya omutuki wa Bbabbilooni neende esyaalo esyo, esyaalo sy'Abakalidaaya, hulw'ebibi byaabwe. Njia ohusihirisa esyaalo esyo mani sihole ekuunda endaalo choosi. 13Njia ohukwiisa hu syaalo esyo ebyo byoosi bi ndasiboolaho, buli siindu syoosi esyandiikwa mu sitabo, bi omunabbi Yeremia yalaangirira mu liita lyaange. 14Ndahetuungire hu Babbabbilooni ohweema hu biindu bi bahola. Mani ebyaalo biingi neende abatuki bahunuufu, bahabahole baaba abawaambe baabwe.”
Nasaae aheengera ebyaalo omusaango
15Ao mani Omwaami, Nasaae wa Yisiraeli, yamboolera ati: “Bukula esikoombe siri mu muhono kwaange sino, esikoombe sirimo efiini yihaliihe, esichuule obwaalaba bwaange, mani osing'weese ebyaalo byoosi bi Omwaami ahutumamo. 16Bachia ohusing'waaho badaandaamire, mani balaluhane hulw'ebiita bi ndi ohubasiindihamo.”
17Ndambukula esikoombe ohutula mu mahono k'Omwaami, mani ning'weesa abaandu bomu byaalo byoosi bi Omwaami yali n'atumire. 18Abomu Yerusalemu neende abomu biko byomu Buyudaaya, abatuki baabwe neende abachweenufu baabwe, mani ebiko ebyo binyale ohuba amakuunda katiisa haandi ebilekeereswa, abaandu beehoonyereenge ameeta kabyo nibabwaaba, nilwo lu basiihola ohwoola buti. 19Abaandi abahang'we hu sikoombe sino nibo bano: omutuki wa Misiri, neende abahalaabani bae, neende abachweenufu bae, neende abaandu bae boosi, 20neende bawalukeenda boosi abali mu Misiri. Neende abatuki boosi abali mu syaalo sya Wuusi, neende abatuki boosi abomu biko by'Abafilisiti (Asukelooni, Gasa, Ekironi, neende abadoong'ao mu Asudooti); 21abaandu boosi abomu Edomu, Moabbu, neende abaana ba Abaamooni. 22Abatuki boosi aba Tiiro, Sidoni, neende abatuki boosi ab'ebyaalo by'engereha biri hu ndulo w'enyaanja. 23Abaandu bomu biko bya Dedani neende Tema, neende Bbusi, neende abaandu boosi abaheheta obweeni bwaabwe. 24Abatuki boosi abomu Araabbia, neende abatuki boosi ab'enjia chikabuhaane echiri mu siparara. 25Abatuki boosi aba Simuri, Elamu, neende Media. 26Abatuki boosi abomu byaalo by'emukulu, ab'eyale neende ab'aambi, buli mulala otulayo, neende obutuki bwohu syaalo bwoosi. Mani abatuki bano boosi nibahamale ohusing'waaho, omutuki wa Bbabbilooni niye owahamaliiriheyo ohusing'waaho.
27Omwaami w'Obunyala, Nasaae wa Yisiraeli yamboolera ati: Baboolere oti Omwaami aboola ati, “Mung'we, mumeere, musale, mukwe aasi mani muhaye ohusiingiraho haandi, hulw'ebiita bi ndi ohubasiindihamo.”
28Nae nibahaya ohubukula esikoombe siri mu muhono kwao mani baasing'waaho, oba ochia ohubaboolera oti, Omwaami w'Obunyala aboola ati: muli neende ohusing'waaho! 29Olwohuba bone, njia ohuhola esibi hu siko syaange syeene, mani abulao omuundu otahasaande. Abulao owahawone ohusaanda, olwohuba njia ohusiindiha ebiita mu baandu bohu syaalo syoosi. Omwaami w'Obunyala niye oboola.
30Mani sakira, ewe Yeremia, olibalaangirira emboosi chino choosi, oliboolera abaandu bano oti:
“Omwaami alihuumula naali Muukulu,
yahaduluhane naali mu bwiihalo bwae bwoolerefu.
Yahahuumule neende amaani n'alwaania abaandu bae,
mani yaayula koti abo abanyuha emisabbiibbu,
mani buli muundu oli hu syaalo awulire.
31Mani ekono lyae lyahoole yi syaalo syaakama,
olwohuba yiluwo omusaango ku Omwaami afwaambya ebyaalo.
Omwaami ali ohuyaala omusaango neende abaandu boosi.
Ababi, baheetwe neende olugaanga,
Omwaami niye oboolere.”
32Omwaami w'Obunyala aboola ati:
“Bona, amasira kali ohulaandaala
ohutula hu syaalo silala ohwoola hu siindi,
haandi omuyaka kw'amaani kuchia ohuwuucha
nikutulira mu soonda ch'ebyaalo by'eyale.”
33Hu ludaalo olwo, emilaambo ky'abaandu ba Omwaami aliita kyahasalaanire buli abuundu, ohutilira elalira yi syaalo sichaakira ohwoola yi syaakamira. Haba sibahewunamireho daawe, oba abulao owakibuuse alala, oba yaakisiiha. Kyahadoong'e humukulu kyaaba koti embolera.
34“Hubbe embuungu, eng'we abeemirisi, haandi mulire,
eng'we abeemirisi, mwefuufule mu kohe.
Olwohuba endaalo choolere mwiitwe, haandi musalaaniswe,
mani mwahabe koti amakoondi kahiramo obulai.
35Eng'we abeemirisi, haba simwahabeeho neende owohwiiruhira,
noomba owohweeyibira mwawona.
36Wulire, amaliro k'abeemirisi
neende embuungu ch'abaami!
Olwohuba Omwaami anyaasire esyaalo syaabwe.
37Mani esyaalo syaabwe esyabechaangamo omuleembe,
Omwaami mu tima lyae asisihiriise.
38Omwaami alehere abaandu bae, koti lu dalang'i yahaleha eng'uungu yaayo.
Esyaalo syaabwe syeeholere ekuunda
hulw'ebiita bitiisa,
neende obwaalaba bw'etima ly'Omwaami.”
Currently Selected:
Yeremia 25: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
